A Kakailai I Lia 1:8-17

⁸Gala pa u nunure, u nina u boina ta ra vaden par, Una mur ra nga kai ra umana sip, Ma una tabar kaum lavur nat na me maravai ta ra umana pal na mal kai ra umana tena balabalaure sip.

⁹Kaugu vakak, iau tar valarue u ma ra nat na os ai ra kiki na vinavana kai Parao;

¹⁰A ura pagupagu na ngiem dir boina, ra pepe na ulum nina di vir ia i vamong dir, Ma ra inoam bula, nina di vakurue ma ra kurkurua i ngatngat.

¹¹Avet a vi kaum ta vivi na goled, Ma avet a vapetep vanavana tar ta silva tana.

¹²Ba ra king i ga ki boko ta kana vatar, Kaugu varku i ang na vuai.

¹³Kaugu vakak i da ra vinvin bira na davai Nina i va ta ra bongobongogu.

¹⁴Kaugu vakak i da ra tur a pupu na davai i ang na vuai Ta ra uma na vain aro En-Gedi.

¹⁵Ea, kaugu vakak, u a valilingina; ea, u a valilingina, Ma a ura kiau na matam dir da ra kiau na mata i ra uka.

¹⁶Ea, kaugu vakak, u bula a valilingina, maia, a magit na varmananai; Ma kador vava i limut.

¹⁷Ra umana bolo ta kador pal, a umana tagatagal, Ma ra umana ivarai tana a umana iara iat.