4. Mojžišoskero 21:1-12

¹Sar pes o Kanaaňiko kraľis andral o Arad, savo bešelas andro Negev, došunďa, hoj o Izraeliti aven le dromeha andro Atarim, geľa anglal lende, marelas pes lenca a varesaven the zaiľa.

²Akor o Izraeliti dine lav le RAJES: “Te amenge deha andro vasta kale nipen, paľis calkom zňičinaha lengere fori.”

³O RAJ len šunďa a diňa lenge andro vasta le Kanaančanen. Avke o Izraeliti calkom zňičinde len the lengere fori a dine ole thaneske nav Chorma.

⁴Le verchostar Hor džanas le dromeha ko Lolo Moros pro juhos, hoj te obdžan e phuv le Edomčanengeri. Ale o manuša pal o drom našade o avriľikeriben

⁵a reptinenas pro Del the pro Mojžiš: “Soske amen iľan avri andral o Egipt? Hoj te meras pre pušťa? Se nane ade aňi maro, aňi paňi! A imar amenge nane mištes kale džungale chabenestar!”

⁶Akor o RAJ bičhaďa pro manuša jedovate sapen. On len danderenas a but le Izraelitendar mule.

⁷O manuša avenas ko Mojžiš a phenenas leske: “Kerďam binos, sar reptinahas pro RAJ the pre tu. Mang tut vaš amenge ko RAJ, hoj amendar te odlel kale sapen!” Avke pes o Mojžiš chudľa te mangel vaš o manuša.

⁸O RAJ phenďa le Mojžišoske: “Ker brondzune sapes a prichude les upre pro kaštuno drukos. Te vareko le manušendar, ko sas danderdo le sapendar, dikhela pre leste, ačhela te dživel.”

⁹Avke o Mojžiš kerďa brondzune sapes a prichudľa les upre pro drukos. Te oda, ko sas danderdo le sapendar, dikhelas pre oda sap, ačhelas te dživel.

¹⁰O Izraeliti džanas dureder a kerde peske taboris pašal o Obot.

¹¹Paľis odgele andral o Obot a kerde peske taboris paš o Ije-Abarim pre pušťa, so hiňi pro vichodos le Moabostar.

¹²Odarik odgele a kerde peske taboris andre dolina Zered.