4. Mojžišoskero 14:3-23

³Soske amen o RAJ ľidžal andre kadi phuv? Hoj te meras la šabľaha andro mariben? Hoj te zalen amare romňijen the čhavoren? Na uľahas amenge feder te džal pale andro Egipt?”

⁴Jekh avreske phenenas: “Kidas peske avri vodcas a džas pale andro Egipt!”

⁵Sar oda o Mojžiš the o Aron šunde, pele le mujeha dži pre phuv angle savore Izraeliti.

⁶O Jozua, le Nunoskero čhavo, the o Kaleb, le Jefunnoskero čhavo, save sas olendar, save predikhle e phuv, pre peste dukhatar čhingerde o ruchi

⁷a phende savore Izraelitenge: “E phuv, so samas te predikhel, hiňi igen lačhi.

⁸Te avaha le RAJESKE pre dzeka, doanela amen andre odi phuv, kaj čuľal o thud the o medos, a dela amenge la.

⁹Ča pes ma vzburinen pro RAJ! Ma daran pes le manušendar, save ode bešen, bo lokes len domaraha. O RAJ hin amenca! Lengere devla len na chraňinen. Vašoda ma daran pes lendar!”

¹⁰Ale savore Izraeliti vriskinenas, hoj len te murdaren le barenca. Androda pes savore Izraelitenge sikaďa le RAJESKERI slava paš o Sentno Stanos.

¹¹O RAJ prevakerďa ko Mojžiš: “Dži kana man kala manuša tele dikhena? Dži kana mange na pačana, se maškar lende kerďom bare znameňja?

¹²Bičhavava pre lende baro nasvaľiben a zňičinava len, ale tutar kerava bareder the zoraleder narodos, sar hine on.”

¹³Ale o Mojžiš odphenďa: “Dodžanena pes pal oda o Egipťana! Lendar iľal avri kale manušen tira zoraha

¹⁴a on oda dena te džanel le manušenge, save bešen andre odi phuv. Ola manuša imar šunde, hoj tu, RAJEJA, sal maškar lende a hoj lenge diňal te dikhel tut le jakhenca. Šunde, hoj tiri chmara ačhel upral kala manuša, hoj dživese džas angle lende andre chmara a rači andro jagalo slupos.

¹⁵Te akana zňičineha savore tire manušen, o narodi, save šunde o hiros pal tu, phenena:

¹⁶‘O RAJ našťi doanďa peskere manušen andre odi phuv, pal savi len diňa la veraha lav, vašoda len murdarďa pre pušťa.’

¹⁷Akana, RAJEJA, mangav tut, sikav amenge tiri zor a ker, sar phenďal:

¹⁸‘Me, o RAJ, na choľisaľuvav sigo, presikavav o pačivalo kamiben a odmukav o binos the e vzbura. Ale ňikas na mukav bi o trestos; vaš le dadengere bini marav le čhaven dži andro trito the štarto pokoleňje.’

¹⁹Mangav tut, odmuk kale manušenge prekal tiro baro pačivalo kamiben, avke sar lenge odmukehas akorestar, sar avle avri andral o Egipt, dži akana.”

²⁰O RAJ leske odphenďa: “Odmukav lenge, avke sar mangehas.

²¹No avke sar dživav a sar miri slava pherarel caľi phuv,

²²aňi jekh kale manušendar na džala andre odi phuv. Bo dikhle miri slava the o zazraki, so keravas andro Egipt the pre pušťa, a the avke man dešvar pokušinenas a na šunenas.

²³Vašoda ňiko lendar na džala andre odi phuv, pal savi phenďom, hoj la dava lengere dadenge. Na dikhela la ňiko, ko man tele dikhľa.