4. Mojžišoskero 14:17-39

¹⁷Akana, RAJEJA, mangav tut, sikav amenge tiri zor a ker, sar phenďal:

¹⁸‘Me, o RAJ, na choľisaľuvav sigo, presikavav o pačivalo kamiben a odmukav o binos the e vzbura. Ale ňikas na mukav bi o trestos; vaš le dadengere bini marav le čhaven dži andro trito the štarto pokoleňje.’

¹⁹Mangav tut, odmuk kale manušenge prekal tiro baro pačivalo kamiben, avke sar lenge odmukehas akorestar, sar avle avri andral o Egipt, dži akana.”

²⁰O RAJ leske odphenďa: “Odmukav lenge, avke sar mangehas.

²¹No avke sar dživav a sar miri slava pherarel caľi phuv,

²²aňi jekh kale manušendar na džala andre odi phuv. Bo dikhle miri slava the o zazraki, so keravas andro Egipt the pre pušťa, a the avke man dešvar pokušinenas a na šunenas.

²³Vašoda ňiko lendar na džala andre odi phuv, pal savi phenďom, hoj la dava lengere dadenge. Na dikhela la ňiko, ko man tele dikhľa.

²⁴Ale mire služobňikos le Kaleb ľidžava andre phuv, andre savi imar sas. Bo sas andre leste aver duchos a džalas pal mande cale jileha. A leskero potomstvos chudela e phuv sar ďeďictvos.

²⁵Tajsa džan prekal e pušťa ko Lolo Moros, bo andre dolina bešen o Amaleka the o Kanaančana.”

²⁶Paľis o RAJ phenďa le Mojžišoske the le Aronoske:

²⁷“Dži kana cerpinava kale nalačhe manušen, save pre ma furt reptinen? Dos šunďom le Izraelitengero reptišagos pre ma.

²⁸Phen lenge: ‘Avke sar dživav, phenel o RAJ, kerav tumenca avke, sar tumen šunďom te vakerel.

²⁹Pre kadi pušťa ačhena mule ťela savoredženengere, kaske sas akor, sar sas pisimen andre, biš (20) berš the buter – savore tumendar, save pre ma reptinenas.

³⁰Ňiko lendar na džala andre phuv, pal savi diňom la veraha lav, hoj andre bešena. Džana andre ča o Kaleb, le Jefunnoskero čhavo, the o Jozua, le Nunoskero čhavo.

³¹No tumare čhaven, pal save phenenas, hoj ena zaile, me ode ľidžava a on sprindžarena odi phuv, so na kamľan te prilel.

³²Ale tumare mule ťela ačhena pre kadi pušťa.

³³Tumare čhave ena saranda (40) berš pasťjera pre kadi pušťa. On cerpinena vaš oda, hoj mange na pačanas, medik na merela posledno dženo tumendar pre pušťa.

³⁴Avke sar saranda dživesa predikhenas e phuv – jekh berš pes rachinela vaš jekh džives – saranda berš cerpinena vaš peskero nalačhipen, hoj te sprindžaren, so oda hin, te me džav pre tumende.

³⁵Me, o RAJ, oda phenďom a avke kerava savore kale nalačhe manušenca, save pes vzburinde pre mande. Pre kadi pušťa merena.’ ”

³⁶O murša, saven o Mojžiš bičhaďa te predikhel e phuv, save avle pale a vakerenas o načačipen pal e phuv a oleha kerde upre le Izraeliten, hoj te reptinen pro RAJ,

³⁷jekhvareste mule le meribnaskere nasvaľibnaha anglo RAJ.

³⁸Olendar, save sas te predikhel e phuv, ča o Jozua the o Kaleb ačhile te dživel.

³⁹Sar o Mojžiš phenďa kala lava le Izraelitenge, ačhile igen smutne.