4. Mojžišoskero 11:1-22

¹O manuša anglo RAJ chudle te reptinel vaš lengero pharipen. O RAJ ada šunďa a sas igen choľamen avke, hoj zlabarďa la jagaha o avrune agora le taboriskere.

²Akor o manuša chudle te vičinel pro Mojžiš, hoj lenge te pomožinel. Sar pes o Mojžiš modľinďa ko RAJ, e jag preačhiľa te labol.

³Vašoda dine ole thaneske nav Tabera, bo le RAJESKERI jag labolas maškar lende.

⁴Varesave bitanga manuša, save sas le Izraelitenca, kamenas igen te chal mas. A the o Izraeliti chudle pale te vičinel rovibnaha: “Te amen uľahas varesavo mas!

⁵Leperas peske, sar chahas andro Egipt o ribi, o ogurki, o duduma, o poros, e purum the o cesnakos.

⁶Se imar sa šučiľam avri. Ňič na dikhas, ča kadi manna!”

⁷E manna dičholas sar slabo šargo korijandroskero zrnos.

⁸O manuša džanas a kidenas la, erňinenas la andro mľinkocis abo rozmarenas la andro čaro pro aro. Tavenas la andre piri the pekenas o marikľa, so chuťinenas sar o maro peko le olivovo olejoha.

⁹Sar rači perelas e rosa pro taboris, akor perelas the e manna.

¹⁰O Mojžiš šunďa, hoj o manuša roven, dojekh famelija paš peskero stanoskero vudar. Sas leske igen pharo a o RAJ sas choľamen pro Izraeliti.

¹¹A phenďa le RAJESKE: “Soske avke keres tire služobňikoha? So kerďom, hoj mange kada zaslužinďom? Soske mange diňal pre meň savore kale manušen?

¹²So me som lengero dad a on mire čhave, hoj mange vakeres, hoj len te ľidžav pro vasta sar e džuvľi, savi del te pijel le cikne čhavores, a hoj len te anav andre phuv, pal savi diňal veraha lav lengere daden?

¹³Khatar lava kajci mas kale savore manušenge? Roven a mangen mandar: ‘De amen mas! Kamas te chal!’

¹⁴Kadi buči hiňi phari prekal ma. Sar šaj man korkoro starinav pal kala manuša?

¹⁵Te kames manca kavke te kerel, feder mange ela, te man murdareha, hoj te na dikhav pre miro trapišagos – te som tuke pre dzeka.”

¹⁶Akor o RAJ phenďa le Mojžišoske: “Zvičin eftavardeš (70) vodcen le Izraelitendar, pal save džanes, hoj hine le manušengere vodci. An len ko Sentno Stanos a mi ačhen ode tuha.

¹⁷Avava tele a vakerava tuha. Lava le Duchostar, so hino pre tute, a dava pre lende. On ľidžana le manušengero pharipen jekhetane tuha. Imar na ľidžaha oda pharipen korkoro.

¹⁸Le Izraelitenge pheneha: ‘Sentňaren tumen pro tajsa. Chana mas, bo rovibnaha vičinenas ko RAJ: “Te amen uľahas varesavo mas! Sar amenge sas mištes andro Egipt!” Akana o RAJ tumen dela mas a čačes les chana.

¹⁹Na chana les ča jekh džives abo duj dživesa, aňi pandž dživesa vaj deš dživesa, aňi biš (20) dživesa,

²⁰ale chana les calo čhon, medik tumenge na avela prekal o nakh a medik na džungľola tumenge. Vašoda, bo odčhiďan pašal peste le RAJES, savo hino maškar tumende, bo rovibnaha pre leste vičinenas: “Soske avľam avri andral o Egipt?” ’ ”

²¹O Mojžiš pre oda phenďa: “Kade manca hin 600 000 murša a tu phenes: ‘Dava len mas a on les chana calo čhon!’

²²Choc te murdaraha savore amare bakren the dobitkos, abo te chudaha savore riben andro moros, the avke na ela oda prekal lende dos.”