2 Utaáchich Kuraka 14:10-16

¹⁰Nuw yasakina yuwaa shiy Edomshuchee ashparit pacharangish anootsi. Yuw ashirangish an wanasirinaa wanasircha. Itaru, shiy anumand shaanaatsi kizpureem ínaksha. ¿Mayaamsha shiy nuwapa yachamaam zandaksha? Papcha, tsiparush. Nda ashimaam, pangishiritish mapiyrush taangcha. Ndunnaa ashkush, shaanaatsi kapung tayutaritamaam taariya. ¿Mayaamsha Utaáchchee ashchiri tayutaritamaam zandaksha? tárangiya.

¹¹Tárangitaa, itaru Amasiyassha kurakaa kuk nda payurangiya. Ashirucha, Jowassha ashpari wasundururee Amasiyaspa waratamaam tushaneerangiya. Ashirangu, tsap sur Bet-semesash Utaásh watsapuni pachamaam shaniyaranganaya.

¹²Ashirangsin, Israelchichsha kurak Utaáchchee zapan pacharangu, wamari kasirangiya. Utaáchich sundar kizpur puniksin, zapan waanpeetam pangup suwasuwaranganaya.

¹³Ashirangsin, anush tsap Bet-semesish Utaáchchee kurak Amasiyasaa putayarandsin, waptam watsapunip Irusarinap machtarangusin, Irusarinush kuseersin, yaktashsha watandpun 180 metor kapeetarangiya. Efrayinimand washitungashi yáyaru, yuwamunari washitungashi watandpunoo tutsiparatu ashchiri wazuranirini kapeetarangiya.

¹⁴Ashirangsin, ichingaru maachta oroo, misha kurikeetsitam waamatarisha itutsiranganaya. Mishat, yuwaatstam oroo kurik Apanllish pang' maachi zapan wayakana, anoo waamataritam yarangiya. Ashirangu, anumun ashpatam tputsee undararee putambeerandsin, waanpeesha yaktarin Samariyap machtaranganaya.

¹⁵Ashiriya, nee tsiyatsis arangeem yasamaam zandkus, kurakaa Jowasa taárash, misha yuwaatsitam Amasiyas Utaáchich kurak waratarangana anoo yasamaam zandkus, yandam taariya, yuwashutam ichingaroo kurak Israelchichee kamanku anshutamta.

¹⁶Ashiriya, kurak Jowas tsiparangu, yaktash Samariyash mapuranganaya, yuwashtam kurakawaa Israelchichee mapurangana anshutamta. Ashirangu, anumun wipsha Jerobowamsha kurakaam kinarangiya.