2. Kraľengero 10:9-30

⁹Tosara o Jehu geľa avri, ačhiľa paš savore manuša a phenďa: “Tumen na san vinovate. Me man vzburinďom pre miro raj a murdarďom les, ale ko murdarďa kale savoren?

¹⁰Akana šaj džanen, hoj dojekh lav, so phenďa o RAJ pre le Achaboskeri famelija, pes the ačhiľa. O RAJ kerďa oda, so phenďa prekal peskero služobňikos Eliaš.”

¹¹Paľis o Jehu murdarďa savoren le Achaboskera famelijatar, save ačhile andro Jezreel, the savore leskere anglune manušen, prijaťeľen the rašajen. Ňikas lendar na mukľa te dživel.

¹²Sar o Jehu džalas andre Samarija le dromeha andro Bet-Eked, so hin o than le pasťjerengero,

¹³arakhľa le muršen le Achazijoskera famelijatar. O Achazijah sas Judsko kraľis, saves murdarďa. Phučľa lendar: “Ko san?” “Sam le Achazijoskeri famelija a džas te dikhel le kraľiskere the la kraľovnakere čhaven,” phende leske.

¹⁴“Chuden len, ale mek len ma murdaren!” prikazinďa o Jehu. Avke sar len chudle, ľigende len paš e bari chev paš o Bet-Eked a ode savoren murdarde, saranda the duj (42) muršen. Ňikas lendar na mukľa te dživel.

¹⁵Sar odarik odgeľa, arakhľa le Rechaboskere čhaha, le Jonadaboha, savo džalas angle leste. O Jehu pozdravinďa les a phučľa lestar: “Me som tuha, sal the tu čačes manca?” “He,” phenďa o Jonadab. Paľis o Jehu phenďa: “Akor de mange o vast.” Avke leske diňa o vast a scirdľa les ke peste pro verdan.

¹⁶O Jehu leske phenďa: “Av manca, hoj te dikhes, sar caľa zoraha služinav le RAJESKE.” Avke ov leha džalas pre leskero verdan.

¹⁷Sar dogele andre Samarija, murdarďa ode dojekhes la Achaboskera famelijatar a ňiko lendar na ačhiľa, avke sar o RAJ prevakerďa prekal o Eliaš.

¹⁸Paľis o Jehu diňa te vičinel savore manušen a phenďa: “O Achab služinelas le Baaloske frima, ale me leske služinava buter.

¹⁹Akana vičinen ke mande savore le Baaloskere proroken; dojekhes, ko les lašarel the savore leskere rašajen. Mušinen savore te avel, bo kerav bari obetno hoscina prekal o Baal. Ko na avela, ela murdardo.” Kavke lenca o Jehu kamľa te thovel avri, hoj te murdarel savoren, save lašarenas le Baal.

²⁰Mek phenďa: “Den avri sentno džives, hoj te lašaren le Baal.” Paľis avke the kerde

²¹a diňa oda te phenel avri pal calo Izrael. Avke pes zgele savore, save lašarenas le Baal, a ňiko lendar na chibaľinelas. Gele andro chramos le Baaloskero a pherarde les jekhe agorestar dži ko aver.

²²Akor o Jehu prikazinďa oleske, savo merkinelas pro gada: “De o gada olenge, save lašaren le Baal.” Avke ov lenge diňa.

²³Paľis geľa o Jehu le Jonadaboha andre le Baaloskero chramos a phenďa olenge, save les lašarenas: “Rozdikhen tumen pašal peste a merkinen, hoj ade tumenca te na el ňiko le RAJESKERE služobňikendar, ale ča ola, save lašaren le Baal.”

²⁴Akor chudle te kerel o obeti the o labarde obeti, ale o Jehu imar rozačhaďa ochtovardeš (80) muršen avri, savenge phenďa: “Ole muršen dav andre tumare vasta. Ko tumendar mukela te denašel varesave muršes, počinela vaš leste peskere dživipnaha.”

²⁵Paľis, sar dokerde e labarďi obeta, o Jehu prikazinďa le stražňikenge the le veľiťeľenge: “Aven andre, murdaren len! Ňiko lendar te na denašel!” Sar len murdarde le šabľenca, čhivkerde len avri. Paľis odľigende khatar o andruno than, andral le Baaloskero chramos,

²⁶o sentne slupi a zlabarde len.

²⁷Čhide tele le Baaloskero sentno slupos the leskero chramos a kerde lestar budaris, kaj phiren dži adadžives.

²⁸Avke o Jehu zaačhaďa o lašariben le Baaloskero andro Izrael.

²⁹Ale o Jehu na omukelas o bini, so kerďa anglal leste o Jeroboam, le Nebatoskero čhavo, savo ľidžalas le Izrael, hoj te lašaren le somnakune gurumňoren andro Betel the andro Dan.

³⁰O RAJ phenďa le Jehuoske: “Tu kerďal oda, so hin mange pre dzeka, bo kerďal la Achaboskera famelijake savoro, so kamavas, vašoda tire čhave bešena dži andro štarto pokoleňje pro Izraeliko tronos.”