2. King 15:4-19

⁴Nge ekewe lenien fel won ekewe leni tekia resap katala. Iwe, ekewe aramas ra chök sopwela le asor o keni ar apach mi pwokus wor.

⁵Iwe, ewe Samol mi Lapalap a afeiengaua ewe king, pwe a üri rupun pwötür tori an mäla. A imwüla o nonom lon eu imw. Nge Jotam nöün ewe king we mwän a samolun chon leimwen ewe king o nemeni aramasen ewe fanü.

⁶Nge lusun pworausen än Ussia föför meinisin a mak lon puken uruwon ekewe kingen Juta.

⁷Iwe, Ussia a mäla, nge ra peiaseni ren an kewe lewo lon ewe telinimwen Tafit. Nge Jotam nöün we mwän a siwili lon wisan wisen king.

⁸Iwe, lon ilik me waluen ierin mwün Ussia ewe kingen Juta, Sekaria nöün Jeropoam we mwän a tolong lon wisan wisen king o nemeni Israel. A nom lon Samaria o nemenem lon ükükün wonu maram.

⁹Nge Sekaria a föri mine a ngau me fän mesen ewe Samol mi Lapalap, usun semelapan kewe ra föri. Esap likitala ekewe tipis ewe king Jeropoam nöün Nepat we a föri, lupwen a emweni chon Israel ngeni tipis.

¹⁰Iwe, Salum nöün Japes we mwän a rawangauei ewe king Sekaria o niela me lon Ipleam. Mürin a siwili lon wisan wisen king.

¹¹Nge lusun pworausen än Sekaria föför meinisin a mak lon puken uruwon ekewe kingen Israel.

¹²Iei usun ewe pwon ewe Samol mi Lapalap a eäni ngeni Jehu a pwönüetä, “Mwirimwirum kana repwe nom lon ewe wisen king lon Israel tori arüanün tettelin aramas.”

¹³Iwe, lon ilik me tiuen ierin mwün Ussia ewe kingen Juta, Salum nöün Japes we mwän a tolong lon wisan wisen king o nemeni Israel. A nom lon Samaria o nemenem lon ükükün eu maram.

¹⁴Mürin, Menahem nöün Kati we mwän a feila seni Tirsa o feila Samaria. Iwe, a niela Salum nöün Japes we mwän me lon Samaria o siwili lon wisan wisen king.

¹⁵Nge lusun pworausen än Salum föför meinisin, ewe rawangau a föri, a mak lon puken uruwon ekewe kingen Israel.

¹⁶Lon ena fansoun, lupwen Menahem a feila seni Tirsa, a ataela ewe telinimw Tapua me ekewe fanü ünükün. A pwal niela meinisin mi nom lon, pun resap fangatä ngeni an epwe tolong lon ar telinimw. Iei mine a ataela ewe telinimw, a pwal mwo nge esetina luken ekewe fefin mi pwopwo meinisin.

¹⁷Iwe, lon ilik me tiuen ierin mwün Ussia ewe kingen Juta, Menahem nöün Kati we mwän a tolong lon wisan wisen king o nemeni Israel. A nom lon Samaria o nemenem lon ükükün engol ier.

¹⁸Nge Menahem a föri mine a ngau me fän mesen ewe Samol mi Lapalap. Lon unusen ränin manauan esap likitala ekewe tipis Jeropoam nöün Nepat we mwän a föri, lupwen a emweni Israel ngeni tipis.

¹⁹Iwe, Tiklat-pileser ewe kingen Asiria a tolong lon ewe fanü pwe epwe maun ngeni. Nge Menahem a ngeni Tiklat-pileser ilik me walu ton silifer pwe epwe alisi le anüküchara an nemenem.