2. King 13:4-22

⁴Mürin, Jehoahas a iotek ngeni ewe Samol mi Lapalap, nge ewe Samol mi Lapalap a aüselinga i, pun a küna usun än ewe kingen Siria ariaföüü chon Israel.

⁵Iwe, ewe Samol mi Lapalap a fang ngeni chon Israel eman chon amanau mi angaserela seni ekewe chon Siria. Iei mine ekewe aramasen Israel ra nonom lon lenier fän kinamwe usun me lom.

⁶Nge resap chök likitala ekewe tipis Jeropoam a föri, lupwen a emweniir ngeni tipis, pun ra chök sopwela le föriir. Iwe, uluulun ewe anüfefin Asera a pwal nonomotiu lon Samaria.

⁷Iwe, esap chüen wor nöün Jehoahas mwichen sounfiu, chilon chök lime chon wawa oris, engol waan woken me engol ngeröü sounfiu mi fetal. Pun ewe kingen Siria a niela ekewe lusun o ipweriir pwe ra usun chök pwül moromor.

⁸Nge lusun pworausen än Jehoahas föför meinisin, pwal an pwora, a mak lon puken uruwon ekewe kingen Israel.

⁹Jehoahas a mäla, nge ra peiaseni lon Samaria. Iwe, Jehoas nöün we mwän a siwili lon wisan wisen king.

¹⁰Iwe, lon ilik me fisuen ierin mwün Joas ewe kingen Juta, Jehoas nöün Jehoahas we mwän a tolong lon wisan wisen king o nemeni Israel. A nom lon Samaria o nemenem lon ükükün engol me wonu ier.

¹¹Nge Jehoas a pwal föri mine a ngau me fän mesen ewe Samol mi Lapalap. Esap likitala ekewe tipis meinisin ewe king Jeropoam a föri, lupwen a emweni chon Israel ngeni tipis, pwe a chök sopwela le föriir.

¹²Nge lusun pworausen än Jehoas föför meinisin, pwal an pwora le maun ngeni Amasia ewe kingen Juta, a mak lon puken uruwon ekewe kingen Israel.

¹³Iwe, Jehoas a mäla, nge ra peiaseni lon Samaria ren ekewe kingen Israel, nge Jeropoam nöün we mwän a siwili lon wisan wisen king.

¹⁴Iwe, lupwen a tori Elisa ewe samau epwe mäla ren, Jehoas ewe kingen Israel a feila ren, a kechü ngeni o üra, “Semei, semei! En ewe chon peni Israel mi manaman.”

¹⁵Nge Elisa a üreni, “Kopwe angei efoch esefich me ekoch föün.” Iei mine Jehoas a angei efoch esefich me ekoch föün.

¹⁶Mürin, Elisa a üreni ewe kingen Israel, “Kopwe emeia ewe esefich.” Iwe, a emeia. Nge Elisa a anomu pöün won pöün ewe king

¹⁷o üreni pwe epwe suki ewe asammwacho mi sap ngeni Siria. Iwe, a suki. Mürin, Elisa a üreni, “Kopwe pekiela ewe föün esefich.” Iwe, a pekiela. Nge Elisa a üra, “Enan wok wokun ewe Samol mi Lapalap föün esefich mi win, ewe föün esefich mi akufu Siria. Pun en kopwe maun ngeni ekewe chon Siria me lon Afek tori kopwe aroserela.”

¹⁸Mürin, Elisa a üreni ewe kingen Israel, “Kopwe angei ekewe lusun föün esefich o wichi ewe pwül ngeniir.” Iwe, ewe king a angeer o wichi ewe pwül ngeniir fän ülüngat, mürin a ükütiu.

¹⁹Ren ei Elisa a song ngeni ewe king o üreni, “Are kopwe wichi ewe pwül fän limu ika fän wonu, mürin kopwe akufu chon Siria tori repwe rosola. Nge iei kopwe chök akufu chon Siria fän ülüngat.”

²⁰Iwe, Elisa a mäla, nge ra peiaseni. Iteiten ier ekoch mwichen sounfiu seni Moap mi küt liaper ra sou tolong lon ewe fanü Israel.

²¹Nge a fis, pwe lupwen ekoch aramas ra feila pwe repwe peiaseni eman mwän, ra küna ena sokun mwich. Iwe, ekewe aramas ra aturalong ewe somä lon peiasen Elisa o süla. Nge lon ewe otun ewe somä a torii chün Elisa, a manausefäl o ütä.

²²Iwe, Hasael ewe kingen Siria a ariaföüü chon Israel lon ükükün fansoun än Jehoahas nemenem.