2. King 10:9-30

⁹Iwe, lon ewe sosoran, Jehu a feila ren ewe asamalap o üreni ekewe aramas meinisin, “Ämi ousap tipis. Ngang ätewe mi rawangauei king Joram o niela. Nge iö a niela ätekei meinisin?

¹⁰Iei oupwe mefi pwe än ewe Samol mi Lapalap kapas meinisin usun chon leimwen Ahap ra pwönüetä. Pun ewe Samol mi Lapalap a föri usun mine nöün we chon angang Elias a apasa fän alon.”

¹¹Mürin, Jehu a niela chokewe meinisin mi chüen manau seni chon leimwen Ahap me lon Jesrel, pwal nöün kewe meilap mi iteföüla, chiechian kewe me nöün kewe souasor, tori esap chüen wor eman mi manau me leir.

¹²Mürin, Jehu a towu seni Jesrel o feila Samaria. Nge lupwen a nom won ewe al o kan ngeni Pet-eket ewe lenien chon fofol sip,

¹³Jehu a churi märärin Ahasia ewe kingen Juta o aisiniir, “Ämi märärin iö?” Nge ir ra pälüeni, “Äm märärin Ahasia. Äm aia feito, pwe aipwe churi än ewe king famili me än kiwin Isipel famili.”

¹⁴Nge Jehu a üreni ekewe mwän mi eti, “Oupwe turumanaueer.” Iwe, ra turumanaueer o nirela ükükün faik me ruoman mwän ünükün ewe chönüttu lon Pet-eket. Jehu esap amanaua eman me leir.

¹⁵Iwe, lupwen Jehu a feila seni ikenan, a churi Jonatap nöün Rekap we mwän, pun a feito pwe epwe churi. Jehu a kapong ngeni o aisini, “Ifa usun, lelukom a wenechar ngeniei usun lelukei ngonuk?” Jonatap a pälüeni, “Ewer.” Mürin, Jehu a üreni, “Ika a iei usun, sipwe kamwöchüpöüfengen.” Iei mine ra kamwöchüpöüfengen, nge Jehu a amwöchätä, pwe epwe mot ren won waan woken.

¹⁶Iwe, Jehu a üreni, “Kopwe etiei pwe kopwe küna ai tiliken fän iten ewe Samol mi Lapalap.” Iwe, a eti Jehu le sai won waan woken.

¹⁷Nge lupwen ra tori Samaria, Jehu a niela meinisin mi chüen manau seni chon leimwen Ahap, tori a aroserela usun Elias a apasa fän alon ewe Samol mi Lapalap.

¹⁸Mürin, Jehu a achufengeni ekewe aramasen Samaria meinisin o üreniir, “E fen kükün än king Ahap angang ngeni ewe anü Paal. Nge ngang epwe kon watte ai angang ngeni.

¹⁹Iei mine oupwe körato rei nöün Paal kewe soufos meinisin, ekewe chon fel ngeni, pwal nöün kewe souasor meinisin. Esap tiwela mwo eman, pun a wor eu asor mi watte üpwe eäni ngeni ewe anü Paal. Iteiten eman me eman mi tiwela epwe mäla.” Nge Jehu a föri ei fän rawangau, pwe epwe arosala chokewe meinisin mi fel ngeni ewe anü Paal.

²⁰Mürin, Jehu a allük, “Oupwe asilefeili eu mwich mi pin fän iten Paal.” Iwe, ra asilefeili ei pworaus.

²¹Jehu a pwal tinala chon künö lemenen Israel meinisin, pwe repwe körato ekewe chon fel ngeni ewe anü Paal meinisin. Iwe, ra feito meinisin, pwe esap wor eman a tiwela. Ra tolong lon ewe imwen Paal, pwe ewe imw a urela seni esop tori esop.

²²Iwe, Jehu a üreni ätewe mi wisen tümwünü ekewe üf, “Kopwe uwawu ekewe üf mi pin fän iten chokewe meinisin mi fel ngeni Paal.” Iei mine a uwawu ekewe üf mi pin fän iter.

²³Mürin, Jehu me Jonatap nöün Rekap we mwän ra tolong lon ewe imwen Paal. Iwe, Jehu a üreni ekewe mi fel ngeni Paal, “Oupwe pii pwe esap wor eman nöün ewe Samol mi Lapalap chon angang epwe nom leimi, pwe ämi chök chon fel ngeni Paal.”

²⁴Iwe, Jehu a tolong, pwe epwe eäni asor ekewe mönün asor me asoren kek ngeni Paal. Nge Jehu a anomu walik mwän lükün ewe imwen Paal o üreniir, “Oupwe niela ekei aramas meinisin. Ika eman me leimi a mwütätä pwe eman me leir epwe süla, ätewe epwe mäla.”

²⁵Lon ewe otun, lupwen Jehu a wes le eäni ewe asoren kek, a üreni ekewe chon mas me ekewe meilap, “Oupwe tolong o nirela, nge ousap mwüt ngeni eman epwe süla.” Iwe, ra tolong o nirela ren ketilas o atururowu lükün. Mürin ra tolong lon ewe rumwen lon ewe imwen Paal,

²⁶ra uwawu ewe ür mi pin mi nom lon o kenala.

²⁷Iei usun ra atai ewe ür mi pin me ewe imwen Paal. Nge aramas ra eäni ewe imw lenien ngasala tori ikenai.

²⁸Iei usun Jehu a aükätiu än aramas fel ngeni ewe anü Paal me lon Israel.

²⁹Nge Jehu esap kul seni ekewe tipis Jeropoam nöün Nepat we mwän a föri, lupwen a emweni chon Israel ngeni tipis. Pun a sopwela le fel ngeni ekewe uluulun kow seni kolt mi nom lon Petel me Tan.

³⁰Iwe, ewe Samol mi Lapalap a üreni Jehu, “Pokiten ka angangöch le föri mine a pwüng fän mesei, ka pwal föri ngeni chon leimwen Ahap meinisin mine üa ürenuk, mwirimwirum kewe repwe wiseni ewe wisen king me lon Israel seni ei tettel tori arüanün.”