2 BƐKPÀÀTÌBƐ̀ 15:1-30

¹Isidɑyɛɛribɛ kóo kpɑ̀ɑ̀tì Sedoboɑmmu kpɑ̀tì benni sipísìdɛ́ nɛ̀ diyiénnì miɛkɛ nkɛ Amɑsiɑ birɛ Asɑdiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì.

²Ò do yóó di tikpɑ̀tì kɛ mɔkɛ yɛbie ntɛpíítɛ̀ nɛ̀ yɛ̀kuɔ̀ ndi kɛ́ntɔ tikpɑ̀tì kɛ dɔ̀ yɛbie nsipísìnùmmù nɛ̀ yɛ̀dɛ́ɛ̀ kɛ bo Sedisɑdɛmmu. O yɔ̃ yètìrì do tú: Yekodiyɑuu nwe Sedisɑdɛmmu ɛì kou.

³Kòo ndɔɔri ti Yiɛ̀ nKuyie ndɔ́ dɛ̀ o cicɛ Amɑsiɑ do dɔɔ̀rìmɛ̀.

⁴Kɛ̀ yɛtɔ̀rɛ̀ nɛ́ nkpɑɑ́ bo kɛ̀ bɛnìtìbɛ̀ feu iwũɔ̃ kɛ tuɔ̀ ntihúúntì yɛ ĩ́nkɛ̀.

⁵Kɛ̀ ti Yiɛ̀ nKuyie nhò potɛ́ kòo muɔkɛ tikɔ̀ntì kɛ̀ bɛ̀ɛ ò cɑ̃̀ńnɛ́ kòo mbo omɑ́ɑ̀ borɛ̀ kòo birɛ Yotɑmmu weè mbɑkɛ́ tɛkpɑ̀ɑ̀tìcĩ́ɛ̃̀tɛ̀ kɛ ni bɛnìtìbɛ̀, kòo mmɛ ndò nkɛ yɑ̀ɑ kúnɛ̀.

⁶Asɑdiɑ dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

⁷Kòo kú kɛ̀ bɛ̀ɛ ò kũnnɛ́ o yɛmbɛ̀ fɔ̃ti Dɑfiti ɛì miɛkɛ. Kòo birɛ Yotɑmmuu sɔɔtɛ́ tikpɑ̀tì.

⁸Sudɑɑ kɔbɛ kóo kpɑ̀ɑ̀tì Asɑdiɑ kpɑ̀tì benni sipísìtɑ̃ɑ̃ti nɛ̀ diniínnì miɛkɛ nkɛ Sedoboɑmmu birɛ Sɑkɑrii nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ bɛtɑ̃̀ɑ̃̀bɛ̀ bɛ̀kuɔ̀ kɛ bo Sɑmmɑrii.

⁹Kòo ndɔɔri ti Yiɛ̀ nKuyie nyí dɔ́ dɛ̀ o yɛmbɛ̀ do dɔɔ̀rìmɛ̀, ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.

¹⁰Kɛ̀ Yɑbɛsi birɛ Sɑdummuu cómmú kɛ bo ò bɔ. Mɛm̀mɛ kóo ò potɛ́ Ibedeɑmmu ɛì kɛ́kuɔ, kɛ́fietɛ tikpɑ̀tì.

¹¹Sɑkɑrii kó tinɑ́ɑǹtì sɔnti wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

¹²Ti Yiɛ̀ nKuyie ndo nɑ̀kɛ́ tì nti Yeu kɛ dɔ̀: A yɑɑ̀bí nɛ̀ ɑ yɑɑ̀bíyúó bo nkɑ̀rì Isidɑyɛɛribɛ kpɑ̀ɑ̀tìkɑ̀rì ĩ́nkɛ̀.

¹³Sudɑɑ kɔbɛ kóo kpɑ̀ɑ̀tì Osiɑsi kpɑ̀tì benni sipísìtɑ̃ɑ̃ti nɛ̀ diwɛínnì miɛkɛ nkɛ Yɑbɛsi birɛ Sɑdummu nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́tɔ tikpɑ̀tì kɛ dɔ̀ otɑ̃̀nkù òmɑ́ɑ̀ kɛ bo Sɑmmɑrii.

¹⁴Mɛm̀mɛ Kɑdi birɛ Mɛnnɑɛmmu ìtɛ́mɛ̀ Tidisɑɑ kɛ́kɔtɛ kɛ́tɑ Sɑmmɑrii kɛ́potɛ́ okpɑ̀ɑ̀tì kɛ́kuɔ kɛ́fietɛ tikpɑ̀tì.

¹⁵Sɑdummu kó tinɑ́ɑǹtì sɔnti ò bɔ mmɛ̀ɛ̀ botí okpɑ̀ɑ̀tì dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

¹⁶Mɛm̀mɛ Mɛnnɑɛmmu domɛ̀ Tɑpuɑ ɛì kɛ́potɛ́ bɛ̀ɛ̀ kó dimɑ̀ɑ̀ bo di miɛkɛ nɛ̀ di tempɛ̃ nyimɔu kɔbɛ kɛ́tɑunnɛ̀ Tifisɑ kɛ́puotí bɛpɔupómpómbɛ̀ bɛ̀ɛ̀ kó dimɑ̀ɑ̀ dɛ̀ bo. Dɛ kó dihɛì kɔbɛ í yiemmɛ̀ koò kpetɛ́ yɛbòrɛ̀.

¹⁷Sudɑɑ kɔbɛ kóo kpɑ̀ɑ̀tì Asɑdiɑ kpɑ̀tì benni sipísìtɑ̃ɑ̃ti nɛ̀ diwɛínnì miɛkɛ nkɛ Kɑdi birɛ Mɛnnɑɛmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie ntɛpíítɛ̀ kɛ bo Sɑmmɑrii.

¹⁸Kòo dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi Nɛbɑti birɛ nSedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.

¹⁹Weè kó dimɔ̀nnì ndi Asidii kóo kpɑ̀ɑ̀tì Pudi bɛ̀ domɛ̀ kɛ̀ Mɛnnɑɛmmuu ò duɔ́ ntimɑ́tì pɛ́ítì tɔ́nnì sipísìtɑ̃ɑ̃ti kòò bo ò teennɛ̀ kɛ́kpénkùnnɛ o kpɑ̀tì.

²⁰Mɛnnɑɛmmu do cuɔ́ dɛ kó timɑ́tì pɛ́ítì Isidɑyɛɛribɛ kó bɛkotibɑɑbɛ̀ borɛ̀ ndɛ bɑ́ wè yuu ĩ́nkɛ̀ mɛdítíbii nsipísìnùmmù kɛ́ dɛ̀ wɛ̃nnɛ́ kɛ́duɔ́ nhAsidii kóo kpɑ̀ɑ̀tì kòo bɛ̀ yóu kɛ́wɛ̃tɛ.

²¹Mɛnnɑɛmmu dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

²²Kɛ̀ Mɛnnɑɛmmuu ku, kòo birɛ Pekɑyɑɑ sɔɔtɛ́ o kpɑ̀tì.

²³Sudɑɑ kóo kpɑ̀ɑ̀tì Asɑdiɑ kpɑ̀tì benni sipísìnùmmù kpɛri miɛkɛ nkɛ Mɛnnɑɛmmu birɛ Pekɑyɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nyɛ̀dɛ́ɛ̀ kɛ bo Sɑmmɑrii.

²⁴Kòo dɔɔ̀ ti Yiɛ̀ nKuyie nyí dɔ́ dɛ̀ ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.

²⁵Mɛm̀mɛ Demɑdiɑ birɛ Pekɑɑ wèè tɔu o kpɑ̀rìnɛntì, kòo cómmú kɛ bo ò bɔ, kòo mbo Sɑmmɑrii tɛkpɑ̀ɑ̀tìcĩ́ɛ̃̀tɛ̀ kó kudieku mɑkù, kòo ò potɛ́ kɛ́kuɔ, kɛ́kuɔnɛ̀ Adikɔbu nɛ̀ Adiyee, kɛ́nɛinɛ̀ Kɑdɑɑdi ɛì kɔbɛ sipísìnùmmù, ò mɛ nhò kùɔ kɛ́fietɛ tikpɑ̀tì.

²⁶Pekɑyɑɑ borimɛ sɔmmɛ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.

²⁷Sudɑɑ kɔbɛ kóo kpɑ̀ɑ̀tì Asɑdiɑ kpɑ̀tì benni sipísìnùmmù nɛ̀ didɛ́rínnì miɛkɛ nkɛ Demɑdiɑ birɛ, Pekɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nsipísìdɛ́ kɛ bo Sɑmmɑrii.

²⁸Kòo dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi Nɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.

²⁹Isidɑyɛɛribɛ kóo kpɑ̀ɑ̀tì Pekɑɑ kpɑ̀tì miɛkɛ nkɛ Tekɑdɑti-Fɑdɑsɑɑ Asidii kóo kpɑ̀ɑ̀tì bɛ̀ domɛ̀ kɛ́fietɛ Nɛfutɑdii tenkɛ̀ kɛmɔu: Iyɔ̃ɔ̃ nɛ̀ Abɛdi-Bɛti-Mɑɑkɑ nɛ̀ Yɑnnɔɑ nɛ̀ Kedɛsi nɛ̀ Asɔɔ nɛ̀ yɛhɛkɛ̀ diɛyɛ̀ Kɑdɑɑdi nɛ̀ Kɑdidee, kɛ́pĩ́mmú bɛnìtìbɛ̀ kɛ́kònnɛ̀ Asidii.

³⁰Kɛ̀ Edɑɑ birɛ Osee cómmú kɛ bo bɔ nDemɑdiɑ birɛ Pekɑɑ kóò potɛ́ kɛ́kuɔ, kɛ́fietɛ tikpɑ̀tì.