1 Utaáchich Kuraka 22:21-40

²¹Itaru, minumamari Apanll wasundurur anush kusarangu, Apanllee, Nuw amb ashimaam waritaktana, tárangu, Apanllsha, Ashiriya, ¿shiy tamayareezish amb ashtachish? tárangiya.

²²Ansha Apanll wasundurur, Ashiriya, nuw naayaruri, apanllpanee urkar ichingaroo wayangichirireem wayachima. Ashkachuri, uwshtisin mangutari ngichchinllinaya, tárangu, Apanllsha, Shiy amb ashimaam waritaktishcha. Yuwari táyarish anuri shishincha, Apanll tárangiya.

²³Ashirucha, na in Apanll waana nishuchee ichingaru apanllpan urkar mangutari tsiyatamaam wayarangu, mangutaritssin tamasingayarusin tsiyatkanaya, watam Apanll waana shiyaa tsipamaam wayaranguwa, Mikayas kurakaa tárangiya.

²⁴Anootsshat, Sedekiyas Kenaanarini wip mazinarangu, kapung tsiyantayaru, Mikayasaa wachush puwarangiya. Sheeru, ¿Mayaamsha ngutish ngichiksha? ¿Yapsha Apanll wasundurur shiyash kuseeru, tsiyataranga? tárangiya.

²⁵Mikayassha, Uru minush zar kundarareetsish punikush, kamungpi átush, suwayaranllush, pangusish tapishta, minushsha pangus tapishta shitarachus, anush uru yuwaa nuw táyanlli anoo chinachsha, tárangiya.

²⁶Ashiriya, kuraksha Israelchich, Natu Mikayasaa naturi putayarus, kurakap Amónap yakta ksutamapanip machingints. Sheerus, kurak Jowasapsha nuwap ipari machintstamtsa.

²⁷Anushsha kuseerus, kuraktanda Ajab kamachtayaru, tumanshishish tumanamaama, tángtsa, sheersin, watungasheemsha yuw pang' yutarita an kunguptamari panachinllinpa. Nuw tapazip wanasir matambshi kanapeechuri, anush tashitungachinipa, tárangiya.

²⁸Mikayassha yusur aranginasha tsiyatarangu; Wánariya shiy matambish kanapkachush, ashiri nuw ngichkuparina tsiyatarangina. Apanllee kuk nda kaapa itsinsaru kamanirangina, tárangiya.

²⁹Tárangusin, anumun kurak Israelchich, mishat kurak Utaáshuch Josafattam ashirusin wasundurur ichingarusin yakat Romotap Galaadshuchip watsapun waratamaam naataranganaya.

³⁰Naayarandsin, anush apus kurak Israelchich Josafataa tsiyatarangu; Ashiriya, nuw shiyaam kamareetsi yusheeruri panachinllpa. Shiysha kamartancha. Síriyshuch wasundurur nuwaa natstarundama, aturi, nllitarit nuw kamartayaruri, pshtuchima, tárangu, wamaree yusheeru, nllitaritsha kamartayaru, tapazish pshturangiya.

³¹Itaru, kuraksha Síriyshuch pachampanee kapitanaa ipuseeru, kapaachush pshiyrshini tapazpanish naakchusin anoo, tputsee nllitarita mangutaritis pcharintspa. Kurakaatsimari Israelchichee pakchus, pachayarus ksantsa, táyaru kamachtarangiya.

³²Ashiriya, kapitanshitisin kapaachush pshiyrshini kusarangsin, Josafataa kurak ashiru parangusin, Kurak wataparee Israelchichi atusin, pachamaam taturpiranganaya. Anootssha Josafat parangu, puniku, Pacharispa. Nda nuw kurakima. Tapachindangasinda, wamkureetssha, tárangiya.

³³Anootssha, kapitan natstarangusin, ¿Antaati in Israelchicheeja kurak? atusin, anoo kasaranganaya.

³⁴Itaru, misha sundar mangutari msanguru tsak ashiranllu, kurakaa Israelchichee msangeeru mangu xiru' ashirangiya. Timbanllizsha ngusamb kararu anush pshtuyaru, tsipamaamari kayungarangiya. Ashirangsin, kurak Israelchich kizpur wanguytarangu, kapaachoo pshiyrshini putampanee, Pzaya. Nuwaa piyam macheerush, naruwanda tsipamamaritamta kayungeenda, tárangitaa,

³⁵itaru tapazsha nda pastaku, kuraksha kizpur wanguyataa, ashiritaa pshiyrshishimun xiyaru, wasundurureem kutaku, anootsiri tasasarangu, kurassha kayungamash kapung zaw zaw ashirangu, pshiyrshishush kapung ksheewarangu, zar pukamachu tsiparangiya.

³⁶Ashirangu, zar pumarisha sundar ichingarusin anoo tsiyatssee mazinarangusin, waanpatatin, Watstaya. Yaanpeetam tsapunip suwayani.

³⁷Watam kurak tsipayanlluwa, atusin wapitam kanaputaranganaya. Ashiriya, kurakaatssha tsiparee wapitam yáyarandsin, yakat Samariyash yushindayarusin, mapuranganaya.

³⁸Sheersin, kapaachootssha pshiyrshini yáyarusin, anshuri yakat Samariyash yuwash kiz yutaritshishpan chumakana, anushsha kurasee kuparanganaya. Ashirangsin, anootssha kurakaa Ajaba ursir tumuzsha iputaranganaya. Yuwartatam Apanll Elíyasaa kamanirangu anuritam tuminurangiya.

³⁹Ashiriya, kurakaa Ajaba watarawzuree, misha yuwaatsitam pangoom wanasir pangurangu anootsitam, misha yuwaatsitam yaktaatstam wayayaranllu, anootsitam ichingaru kirak Krónikash yuwaa ichingarusin Israelchicheem kurak kinayaranllina, anoo ichingaru arangeem kamankiya.

⁴⁰Ashiriya, kurak Ajab tsiparamchu, anumun yusur wipsha Okosiyas waparish zamurangu, uwsha Israelchicheem kurak kinarangiya. Ashiriya, na kamaneena yuwaa kurakaa Ajabaa pacharangana anootsi. Wapparee. Watamcha tsiyatsis yuw Utaáchchee urkar ichtaru taarangana ano.