1Bidi me deli bidai, te bidi nogi Kis, te Benjamin hani bidi. Kis te Abielgo ogwa, tama Abiel te Serorgo ogwa, tama Seror te Bekoratgo owga, aga te Afiago ogwa dao. Kisgo doado bage hauwa elaluali, tama te gasa bidi dabe tomode te aga nogi elalubo bidi bidai.
2Tama agai ogwa deli elaluali, te aga nogi Sol. Sol aga te bomai bidi, tama dili bobage uganu yai bidi, tama te gasa Israel bidi dabe te aga bobage yali tiwai me isiąwai. Tama me aga te sawi gesabidi mu yai, tama te gasa Israel dabe me te aiyaba elaluali.
3Tialima, me sogo deli te bidi Kisgo donki kibu meba te tedela pelama, tama hagawai. Tama tibaso, Kisgo te tiwai po Solbolo wai, “Sol, nago te sę bidi me deli selama, dage sigo te donki dabe gegegi pao,” wali.
4Tialima, augwali hogodama, te Efraimgo bage buluba pali, tama te Salisago tǫ pedaiba pali, tiali goli, augwaligo me sube. Tama tibaso, augwali te Salimgo tǫ pedaiba pali, tiali goli, te donki dabe tede me bidalubeo. Nosali augwali te Benjamin hanigo tǫba pai, tiali goli, augwali sigo te donki dabe tede me subeo. Mu menio.
5Tama augwali te Sufgo tǫba pai. Tialima, augwali sabolama, tama Solgo aga sę bidibolo te po wai, “Ae, tegobao, dena buluba ma geasa pinao. Te meni baso da, te ayago dadi side homu dene eyu, tama te donki dabede homu kone me egobeo,” wali.
6Tiali goli, sę bidigo Solbolo te po wai, “Dwasianu gana bolo tonaluinao. Te Godigo po pusubo bidi me deli te hanu Sufde bidibao. Tama tigidali po agai pusubo, te mu naga pedelaibao. Tama teyu, te we bidi dabego agaba genuai nogi mabo dao. Dago agabolo sugi pinao. Te da menadu gege peyu, wali pomainu ebo sunumi te agai dabolo ola mabo usu yaibao,” wali.
7Tama Solgo te sę bidibolo te po wai, “Tiali goli, te da agaba pobaso da, te dago agabolo wiegi yai homu ilabo nai me deli magi pabo usu yaibao. Tiali goli, dago nai silama, te beg olo elalubao. Dago agaba magi nai mabo usu egowe?”
8Tialima, sę bidigo te po wai, “Eno te dwasianu silva pedai dagenu me deli munalubao. Eno te aga menama, tama agai te donki bidalubo pesage mena badu elalubo te dabolo omainu ebo dao.”
9Tama Solgo agabolo te po wali, “Te nago po wiegi yai mu wabo. Awe, da pinao.” Tialima, augwali si te Godigo po pusubo te bidi bidibo hanuba pali. Te augwali si te hanu elalubo madi te dwasianu bulu duba ugaba holobadi, augwali sigo te gesi ogwa we wegi mani meba te asobo augwali si gesabidiba yaga sali. Te we dabe te hanu buluba dia soali, te wę tuainu yali. Tama te bidi sigo augwaliba hanalu wali, “Te geme dulai po haninibo bidi te taun hanude bidibowe, ma meniwe?” Polobadu te Israel dabego te profet bidi nogi poali, te geme dulai po haninibo bidi wai. Tama te bidi mebago te Godiba magi nai po me deli hanalugi painu da, augwaligo te tiwai po wai, “Dago te geme dulai po haninibo bidi sugi pinao,” wali. Tama tibaso, Solgo te tiwai po weyu, te wegi dabe hanalu walio.
12Tialima, te we dabego augwali sigo po wei ponoyu, te po wai, “Geme dulai po haninibo bidi te ede bidibao. Megi tama aga te taunba pali, magi baso meni, te bidi dabego te dwasianu bulu dude ofa yainu ebaso pali. Aga te dage si pabodu polasa pali, tama dage si asesa polo piąo.
13Tama dage si te taun tomoba pabo sogo, te dage sigo aga sueibao, magi baso meni, aga te taunde me bididuaibao, tama aga te bulu duba nai tugi peyu pabeo. Agai te we bidi meba te ofa yali kibu mi tuagasomainu i wali. Tiali goli, te augwaligo agabolo asomainu tonalu, te aga sabalubo si te nai tueibao. Te aga asobo si da, teda agai te Godiba hanalu, te ofa wiegi yai ilimainu elama, tama nosali augwa te nai tueibao. Dage si asesa polo pobaso da, te dage sigo aga subaso usu yaibao,” wali.
14Te we dabego po ola silibo si, tialima Sol aga sę bidi dali te taunba pai. Tama augwali si te obo elalubo sunumi tomoba pelama, tama te profet Samuel te asobo suali. Aga te taundu buluba dia solama, tama te lotu wabo pesageba holainu yai.
15Te polobadu side kigamu te Genuai Bidigo Samuelbolo te tiwai po wai,
16“Do te tama tobage tebo sogo, te eno te Benjamin hani bidi me deli te nageba tagala palaibao,” wali. “Tama nago aga toboluba te wel geliyu, te aga te eno we bidi Israel dabego king bidi pedalumainu ilao. Eno suali, te Filistia dabego genuai sęgę me, dene me, te tigidali Israel dabeba mobaso, tama te Israel dabego enaba gela weyu, te eno augwali tau sao po wabo odali. Tama tibaso, te bidigo augwali tau siyu, tama te Filistia dabego bomode bidalubo te ma dobola somainu yaibao,” wali.
17Tialima, te side nosali Samuelgo Sol suali, tama Genuai Bidigo agabolo te po wali, “Te dao, do eno nagebolo po wali bidi te tama dao. Agai te eno we bidi tigidali tonaluaibao,” wali.
18Tialima, Solgo te Samuel te taunba pabo sunumide gesabidi deliba unulubaso, te agabolo hanalu wali, “Te geme dulai po haninibo bidigo be menade dawe? Te nago enabolo wabo usu egowe?”
19Tama Samuelgo te po wei ponai, “Te bidi ena dao. Dage si ena pabodu te lotu wabo pesageba polasa piduao, tama dage si megi sogode ena dali nai tuiagameo. Tama do kigamu te nago koneabo sę po tigidali nagebolo olama, tama eno nage tagala palaibao.
20Eno koneani, te dagego donki dabe te hagawali polobadu sela sogo bidali, tiali goli, nago augwalide homu hauwa me dogia pelamuo. Te bidi mebago augwali gegela suali. Tiali goli, odao, te Israel we bidi dabego niwai bidi godolo mu ebo dawe? Augwaligo nage dali, te nago ayago hani sibi dali godolo ebao, te tama dao,” Samuelgo te po wali.
21Tialima, Solgo Samuelbolo te tama po wai, “Ena te Benjamingo hani bidi, tama eno hani te dwasianu hani naga te Israel dago hani tomode elalubao. Tama eno ayago hani sibi te Benjamingo hani tomode nogi me elalubeo. Tama teyu, magi baso nago te tiwai po enabolo obawe?”
22Solgo po ola silibo si, teda Samuelgo aga te aga sę bidi dali selama, te genuai tebol sai elalubo be habu tomoba pali. Samuelgo te bidi sese deli olama, nogo si bidi i wali, te bidi dabe augwali te nai tuabo madi dualama elaluali. Tialima, Samuelgo Sol me, aga sę bidi dali, augwali sibolo te po weyu, te polalubo sai te tebol elalubo pesage badu duagi pao wali.
23Tialima, Samuelgo te nai ulubo bidibolo te tiwai po wali, “Te eno nagebolo mayu te muao po wai kibu sipsip mi, te megi da, nago sesao,” wali.
24Tialima, te nai ulubo bidigo te kibu sipsip sągą me deli te mi dwagi yai mu elalubadi, tama te tebol daiba te Sol pąba muani. Tama Samuelgo Solbolo te tama po wai, “Te kibu mi sao, te dago nage nai muai elaluali, tama nage te tuao. Eno nage tonaluali te megiba usu nani, tama tibaso, eno te i wali bidi dabe dali nago te nai tuiąo,” wali. Tama tialima, Solgo Samuel dali te sogo nai tuali.
25Tama nosali augwali te ofa yali bulu tagalama, tama te taunba dulai. Tama Samuelgo te Sol te aga be peduba odasa holama, tama Sol dali po miani. Tama hulide Sol te Samuel dali te bulude piali.
26Te kigamu mu Samuel hogodama, tama Sol i olama, te po wai, “Nage hodaluao. Eno te nage naga buluba tagala palaibao.” Tialima, Sol hodaluama, tama aga Samuel dali te be taga solama, tama sunumiba pali, te Sol aga sę ebo bidi augwali si dali pali.
27Augwali te taun sesegeba sabolama, tama Samuelgo Solbolo te tiwai po wai, “Naga sę bidibolo polasa pa po wao. Tiali goli, nage da ena dali dwasianu gana dolalu, tama te eno nagebolo te Godigo po mawaibao,” wali.
