1 Reye 21:27-29

²⁷Acaboba maʌ̃ ũrĩsid̶e idjia cacuad̶e jʌ̃ b̶ʌra sopuaba cõãtasia. Maʌ̃be sopua carea jʌ̃badara jʌ̃ped̶a cãĩbadjia. Maʌ̃ awara ne cod̶aca ewarida obadjia idjab̶a sopua b̶abadjia.

²⁸Maʌ̃ carea Ãcõrẽba Tisbéd̶ebema Elíaa nãwã jarasia:

²⁹–¿Bʌa unu b̶ʌca sãwã Acabora sopua b̶ʌda idjia cadjirua od̶a carea? Maʌ̃ bẽrã idji zocai b̶ʌmisa mʌ̃a idji ẽberãrãra jõbiẽ́a, ãtebʌrʌ idji warra Israeld̶ebema boroda b̶ed̶acarea idji ẽberãrãra jõbiya.–