1. Kraľengero 3:4-12

⁴Jekhvar o kraľis geľa te obetinel andro Gibeon, bo ode sas nekfeder ačhado učo than pro lašariben. Pre oda oltaris o Šalamun obetinďa 1 000 labarde obeti.

⁵Ode pes leske rači andro suno sikaďa o RAJ, o Del, a phenďa: “So kames, hoj tut te dav?”

⁶O Šalamun odphenďa: “Tu presikaďal baro lačhipen tire služobňikoske le Davidoske, mire dadeske, bo ov sas verno, čačipnaskero the pačivalo ke tu. Oda baro lačhipen leske presikaďal the akor, sar les diňal čhas, savo adadžives bešel pre leskero tronos.

⁷No akana, RAJEJA, Devla miro, tu ačhaďal tire služobňikos kraľiske pal miro dad David, ale me som terno murš a na džanav, sar mištes te ľidžal le manušen.

⁸Akana me som ade maškar tire avrikidle manuša, save hine ajci but, hoj pes len na del te zgenel aňi te zrachinel.

⁹Mangav tut, de man goďi, sar te ľidžal tire manušen, hoj te sprindžarav, so hin lačho a so nalačho. Bo ko šaj ľidžal kada baro narodos?”

¹⁰Le RAJESKE sas pre dzeka, so peske o Šalamun mangľa.

¹¹Phenďa leske: “Mištes kerďal, hoj tuke na mangľal baro dživipen, aňi o barvaľipen, aňi o meriben peskere ňeprijaťeľengero, ale mangľal tuke o goďaveripen, hoj mištes te sudzines.

¹²Vašoda kerava avke, sar mandar mangľal. Dava tut baro goďaveripen, hoj savoro te rozprindžares; ajso goďaveripen, so mek šoha (ňikda) ňikas anglal tu na sas aňi na ela.