1Nookoot nga be araua betanga kiang yo kawode ilo ye rau pau ye asara yo tiyei paroranga ye pang di maro yo kai padodo nga. Ngan di tooltool kapala tiwete be idi le imot ngan lod galanga ye so yo nen nga, ngan betanga tina ngan moolmool. Bong lo galanga yo nen i, in ke be iyei di tooltool le di tapdi tiyitmak edi ye. Bong dada yo be lodo pang di diede ye mai san i, in la dada dook mata ke be talon di diede ye i.
2Nen le kumata tool atu lon wete be ya in lon galanga dook le imot ye so sa nga, ngan ya in lon galanga ye so yo lon wetewete ye, ngan tiap.
3Bong sei tool yo lono pang Maro mai san i, in ya la Maro lon galanga ye i.
4Le nga be araua torungu kiang ye asara yo tiyei paroranga ye pang di maro yo kai padodo nga. Ngan idi nga lod galanga nen be kai padodo yo ke tana i nga, ngan sa yo moolmool nga tiap. Inbe lod galanga lapau nen be Maro ya taleu in la Maro moolmool i.
5Moolmool, di tooltool tiwetewete ye so matana matana alunu yo ke lang le tana i nga, inbe tipootoo di be di ngan “maro” kidi inbe “tool mai” kidi.
6Bong idi nga tatara lodo medana nen, be Maro ataleu, inbe ya in Tamada tani yo itar so nga le imot i. Inbe idi nga tayepe a be nen ngan tayei urata yo ki nga. Inbe idi nga tatara lodo medana nen, be Tool Mai ataleu, inbe ya in Yesu Kirisi tani yo so nga le imot ipa ye a si pompombe i. Inbe yepongo kiidi ngan ipa ye lapau.
7Bong di tooltool le imot nga lodi galanga ye so yo nga tiap. Inbe di diede kapala ngan lodi yo iwetewete pang di ye dada dook mata yo be titoo nga, ngan imede mata tiap. Ngan nen le ye kene yo be tikan asara medana yo di tooltool kapala tiyei paroranga ye pang di maro kidi yo kai padodo nga, ngan tikanamai di ben di ngan tiyei dada dawa ben di tooltool yo titara lodi medana pang Maro tiap nga.
8Bong kaningi nga ke be ilonidi le tayei tooltool dook mata ye Maro matana ngan tiap. Le kumata be takan too takan tiap nga, ngan ole ilonidi too igarungidi, ngan tiap lapau.
9Bong ang tooltool yo lomim galanga ben kaningi ngan taukan gunkalanga nga, ngan kin kakap tutang dook leu ye kan sokoraingi asara medana yo tiyei paroranga ye pang di maro yo kai padodo nga. Ole nen ngan kagarung di diemim kapala yo lodi mede pang Kirisi tiao nga. Ngan nen, yesoo di ngan lodi yo iwetewete pang di ye dada dook mata yo be titoo nga, ngan imede mata tiap. Le kumata be lo kon so ye rumu ke di maro yo kai padodo nga, le di tina ngan atu ikamatong nga, ngan ole kuyolo panga be ya lapau lo ikan kaningi tina ngan.
11Nen le ye dada kiang yo katoo lo galanga kiang ye nen in nga, ngan be kagarungu emim kase tani yo Kirisi imata ye i.
12Inbe kumata ang ngan be kayei urata dook tiap yo nen ngan panga le kagarungu lono yo imede tiao in nga, ngan ang ngan kayei noonoo ye Kirisi matana.
13Ngan nanga, kumata le ek ikanamaii be nga ikapsap ye noonoo ye yo ikan asara medana yo tiyei paroranga ye pang di maro yo kai padodo nga, ngan o ke be akan asara tina mulu tiap. Yesoo, au i lok be ayeie ek tani yo lon mede mata tiao in a iyei noonoo be.
