1 Kings 20:15-37

¹⁵Aram me pining fare pilung e tin pagel e salthaw ni yad bay u tan pa’ e pi governor u bang e nug ngu bang, ma yad 232 u gubin. Ma aram me pining fa raba’ i salthaw nu Israel, ni yad 7,000 u gubin.

¹⁶Me tabab fare mael ko misiw’, ko ngiyal’ nike chingnag Benhadad nge fa guyey nge l’agruw i tayugang’ u lan e pi tent rorad.

¹⁷Me yan fapi salthaw ni kab pagel nga m’on ni som’on. Me yib e pi tadamit ni l’ograd Benhadad ngarbad rogned ngak ni bay ba ulung i salthaw ni karbad u lan yu Samaria i yib.

¹⁸Ma ga’ar, “Mmarod mu koledrad ngam fekedrad i yib ni kayad bfos, ndemturug ko karbad ni mael fa karbad ni gapas.”

¹⁹Me girengiy fapi salthaw ni pagel fare mael, me lay fa raba’ i salthaw nu Israel,

²⁰ra bagyad me li’ nge yim’ e re mo’on rchamgow. Me mil e pi Syrian, ni be tulufrad e pi salthaw nu Israel, machane me thay Benhadad nge yan u os, nike un boch girdi’en e yan u os ngak.

²¹Me yan Ahab ni Pilung nga daken e flang, nge kol e pi os nge pi chariot, me thang e fan rok e pi Syrian ni rib gel e gafgow ni tay ngorad.

²²Ma aram me yan fare profet ngak Ahab ni Pilung me ga’ar, “Musul ngam gelnag gelngin e yu raba’ i salthaw rom mag fal’eg i t’ar liben e tin ngam rin’, ni bochan e fare pilung nu Syria e ku ra yib ni mael bayay u nap’an e spring.”

²³Me ga’ar e pi totang ko salthaw rok Benhadad ni Pilung ngak, “Fapi got rok yu Israel e bogi got ko pi burey, aramfan nike gel e piyu Israel ngodad. Machane ri gadad ra gel ngorad ni fa’an gadad ra cham ngorad u lan e yungi tafelfel’.

²⁴Chiney e ngam chuweg fa guyey nge l’agruw i tayugang’ ko liw rorad magon’ nga luwrad fapi tolang ko salthaw.

²⁵Ma aram mag pining barba’ i salthaw nib ga’ ni bod fa ba’nem ni kar paged gur, ni ku ta’reb urngin e os nge chariot rorad. Bay da chamgad ngak piyu Israel u lan e yungi tafelfel’, ma yaney e gadad ra gel ngorad.” Me pining Benhadad ni Pilung e kafel’ ngay me fol ko fonow rorad.

²⁶Me bin migid e spring me pining nga ta’bang e pi salthaw rok me un ngorad ngranod ko fare binaw nu Afek ni ngar chamgad ngak piyu Israel.

²⁷Piyu Israel e rabad nga ta’bang ngar faleged rogon e talin e cham rorad mranod ra fal’egged rograd ni yad l’agruw raba’ u but’ ni yad ba sabliy e pi Syrian. Piyu Israel e yad bod ya’an ruwoch ulung i kaming u puluwon e pi Syrian, ni kar garargad kar faned daken barba’ e binaw.

²⁸Me yan ba profet ngak Ahab ni Pilung me ga’ar, “Ba’aray e n’en ni be yog SOMOL: ‘Bochan ni be yog e pi Syrian ni gag e got ko yochi burey ma gathi gag ba got nu daken e yungi tafalfel’, ma aram e bay gu gel nagem ko fare raba’ i salthaw rorad nib ga’, me gur nge girdi’ rom e bay mu nanged ni Gag SOMOL.’”

²⁹Ma medlip e rran ni par e pi Syrian nge piyu Israel u tagil’rad ni yad ba changar ngorad. Me rofen ni medlip ngay miyad tababnag e cham, me thang yu Israel e fan rok ra’ay bbiyu’ e salthaw nu Syrian.

³⁰Ma pi arorad ni magach ni kabfos e ra milgad ngalan fare binaw nu Afek, me puth e pi yoror ko fare binaw nga daken rliw’ nge medlip bbiyu’ i yad. Ma ku errogon Benhadad niki mil ngalan fare binaw nge yan i mith ngalan ba senggil ni bay u tabgul u ba naun.

³¹Me yan e pi tolang ko salthaw rok ngak me lungurad ngak, “Kug rung’aged ni fapi pilung nu Israel e yad ba murunguy. Mu pi’ mat’wunmad ni nggu warod ngak fare pilung nu Israel ni kug bachiyed e mad ni tutuw nga lukngumad ma bay e opol u k’anganmad, ma sana ra ayweg e pogofan rom.”

³²Ma aram miyad bachiy e mad ni tutuw nga lukngurad miyad yin’ e opol nga k’anganrad, mranod ngak Ahab me lungurad, “Tapigpig rom i Benhadad e be wenignag e yafos rok ngom.” Me fulweg Ahab ni ga’ar, “Ma kabfos? Ba manigil! Ya bod be’ ni walageg!”

³³Fapi totolang ko salthaw rok Benhadad e yad be sapnag ba pow nib manigil, ma nap’an ni ga’ar Ahab “walageg,” miyad og ngay, nge lungurad, “Bod ni kamog, I Benhadad e walagem!” Me yog Ahab ni ga’ar, “Mu feked i yib ngog.” Nap’an ni taw Benhadad, me pining Ahab nge yib ngak ngalan e chariot.

³⁴Me ga’ar Benhadad ngak, “Bay gu fulweg ngom fa yuchi binaw ni fek e chitamag rok e chitamam, ma rayag ni ngam ngongliy bang u Damaskus nge mang tagil’ e siyobay rom, nri bod rogon ni i rin’ e chitamag u Samaria.” Me fulweg Ahab ni ga’ar, “Fa’an arrogon, ma aram nggu pagem ngam man.” Me ngongliy ba tha’ u thilrow me pag Benhadad nge yan.

³⁵I yog ba profet ni girdi’en ba ulung i profet ngak bagyad fapi profet ni yow nga ulung ni nge pirdi’iy, ya aram rogon nike yog SOMOL ngak. Machane de rin’ facha’,

³⁶ma aram me ga’ar ngak, “Bochan ni damfol ko n’en nike yog SOMOL, ma aram e bayi li’em ba layon nga mum’ ni yug nap’an ni gra pageg ngam man.” Ma yug nap’an ni yan facha’ me yib ba layon nge yib i li’ nge yim’.

³⁷Ma aram miki yan e re profet ney ngak reb e pumo’on me ga’ar ngak, “Mu pirdi’iyeg!” Me rin’ e biney e pumo’on ni aram rogon; i toy nib gelmiren nge maad’ad.