1. King 20:32-42

³²Iei mine ra üföüf üf seni tuk o apweli säl ngeni üer, mürin ra feila ren ewe kingen Israel o üreni, “Noum chon angang Penhatat a tüngor ngonuk pwe kopwe amanaua.” Nge Ahap a üra, “Ifa usun, Penhatat a chüen manau? I usun chök eman pwii me rei.”

³³Mürin, ekewe mwän ra angei ekei kapas seni Ahap, pun ra ekieki pwe eu asisil mi mürina. Iei mine ra müttir le apasa, “Ewer, Penhatat pwiüm.” Mürin, Ahap a üra, “Oupwe feila o emwenato Penhatat.” Iwe, Penhatat a towu ren Ahap, nge Ahap a apasa pwe epwe tötä ren won waan woken.

³⁴Nge Penhatat a üreni Ahap, “Ekewe telinimw semei we a angei seni semom we üpwe aliwini ngonuk. Ka pwal tongeni aüetä imwen amömö fän itom me lon Tamaskus, usun semei we a föri me lon Samaria.” Iwe, Ahap a üra, “Pokiten ekei kapas üpwe angasokola.” Iei mine Ahap a föri eu pwonen atipeeu ngeni Penhatat o afeilai.

³⁵Iwe, eman mwän seni ewe mwichen soufos a üreni eman chienan fän än ewe Samol mi Lapalap allük, “Kopwe wichiei.” Nge ätewe esap mochen wichi.

³⁶Iei mine ewe soufos a üreni chienan we, “Pokiten kosap aleasochisi alon ewe Samol mi Lapalap, lon ewe otun ka feil seniei, eman laion epwe niikela.” Iwe, lon ewe otun ätewe a feil seni, eman laion a churi o niela.

³⁷Ewe soufos a pwal küna eman mwän o üreni, “Kopwe wichiei.” Iwe, ewe mwän a wichi ewe soufos o akinasa.

³⁸Mürin, ewe soufos a filitala won mesan pwe a sokola lapalapan, a feila o witiwiti ewe king won ewe al.

³⁹Nge lupwen ewe king Ahap a pwerela, ewe soufos a köla ren o üra, “Ngang noum chon angang üa nom lukalapen ewe maun, lupwen eman sounfiu a uwato rei eman mwän a liapeni o üra, ‘Kopwe tümwünü ei mwän. Ika a sü senuk, manauom epwe siwilin manauan, ika kopwe mönätiu ülüngat ngeröü föün moni silifer.’

⁴⁰Iwe, lupwen üa achocho le angang ikei me ikenan, ewe mwän a sü seniei.” Nge ewe king a üreni, “Ka püsin apwünguk, kopwe fokun püngütiu liwinin om tipis.”

⁴¹Mürin, ewe soufos a müttir le apichi filifilin won mesan. Nge ewe king a asilla pwe i eman lein ekewe soufos.

⁴²Iwe, ewe soufos a üreni ewe king Ahap, “Iei alon ewe Samol mi Lapalap, ‘Pokiten ka angasala ewe mwän, ngang üa allük pwe epwe ninnila, iei mine manauom epwe siwilin manauan, nge noum aramas repwe siwilin manauen nöün aramas.’”