1 KINANƆ 22:9-37 - Luda yã takada kↄ̃n Bokobaru yão

1 KINANƆ 22:9-37

Click on verse(s) to share them!

⁹Ben Isarailinↄ kína a ìbanↄ doke sìsi à bènɛ: Ǹ gá ǹ Imlã nɛ́ Mikaya sísi à mↄ́ kpakpaa.

¹⁰Isarailinↄ kí kↄ̃n Yudanↄ kí Yosafatao baade a kíble'uta dana, aↄ̃ↄ vɛ̃ɛna ń kíblekitaa pↄ́wɛɛgbɛ̃kii kɛ̀ kú Samaria bĩilɛa, ben annabi pìnↄↄ e annabikɛyã oo ń aɛ ń píngi.

¹¹Kenana nɛ́ Zedekia mↄ̀si pì lán koba bà à bè: Dii bè koba kɛ̀nↄn nɛ́ Sirianↄ zↄ̃zↄ̃o ǹ ń dɛdɛ ń píngi.

¹²Ben annabi pìnↄↄ e yã dↄ̃nkↄ̃ oo ń píngi wèe bee: Ǹ gá lɛ́ɛ Ramↄ Giliadaa, nɛ́ fuaro. Dii é ń nánnɛ n ↄzĩ.

¹³Gbɛ̃ kɛ̀ gàa Mikaya sísi bènɛ: N annabi daanↄ lɛ́ kɛ̀ don yee! Yã nnaan aↄ̃ↄe oo kínanɛ. Ǹ yã dↄ̃nkↄ̃ pì o se ǹ yã nnaa onɛ.

¹⁴Ben Mikaya bè: Má sì kↄ̃n Dii kuunao, yã kɛ̀ Dii òmɛɛn mɛ́ o kínanɛ.

¹⁵Kɛ̀ à kà, ben kína à là à bè: Mikaya, wà gá zĩ̀ ká kↄ̃n Ramↄ Giliadadeenↄon yↄ́, ke wàton gáro? Ben à wèàla à bè: Ǹ gá lɛ́ɛḿma! Nɛ́ fuaro. Dii é ń nánnɛ n ↄzĩ.

¹⁶Ben kína bènɛ: Gɛ̃̀n ũgban mɛ́ n da ǹ sí kↄ̃n Dii tↄ́o kɛ̀ yãpuraan nɛ́ omɛɛ?

¹⁷Ben Mikaya bè: Ma Isarailinↄ è fãakↄ̃ana sĩ̀sĩnↄ gɛɛzi lán sãa kɛ̀ aↄ̃ↄ dã̀ri vĩroonↄ bà. Ben Dii bèmɛ, gbɛ̃ pìnↄↄ dↄn'aɛdee vĩro. Aↄ̃ baade tá a bɛ aafia.

¹⁸Ben Isarailinↄ kína bè Yosafatanɛ: Nɛ́ɛ ma gweroo? Mɛ́ɛ onnɛ kɛ̀ è yã nnaa e à omɛ zikiro, séde à zaaa?

¹⁹Ben Mikaya ɛ̀ara à bè: Ǹ Dii yã ma! Ma Dii è vɛ̃ɛna a kpatan, ludambɛ zĩ̀kpɛɛnↄↄ zɛzɛ à saɛ ń píngi ↄplazi kↄ̃n ↄzɛzio.

²⁰Ben Dii bè: Dé bé eé ↄ̃ndↄ̃ↄ daɛmɛ Ahabuzi à gá lɛ́ɛ Ramↄ Giliadaa lɛ à ga gwee? Ben gbɛ̃ke bè la, gbɛ̃ pãnde bè la dↄ.

²¹Ben nini ke bↄ̀ à mↄ̀ à zɛ̀ Dii aɛ à bè: Mámbe mɛ́ gá ↄ̃ndↄ̃ↄ daɛzi. Ben Dii à là à bè: Nɛ́ kɛ diamɛ?

²²Ben à wèàla à bè: Mɛ́ gá mà kɛ nini ɛgɛdee ũ mà yã sóso mà ká à annabinↄnɛ ń lɛ́n. Ben Dii bè: Nɛ́ ↄ̃ndↄ̃ↄ daɛzi, nɛ́ fuaro. Ǹ gá kɛ lɛ.

²³Lɛn Dii tò nini ɛgɛdee pì yã sòso à kà n annabi kɛ̀nↄnɛ ń lɛ́n lɛ ń píngi. Mↄ́nzin Dii kpànzi.

²⁴Ben Kenana nɛ́ Zedekia gàa à Mikaya sãn kɛ̀ à bè: Bↄrɛn Dii Nini gòmala à gàa à yã ònnɛɛ?

²⁵Ben Mikaya wèàla à bè: Nɛ́ dↄ̃ zĩ kɛ̀ n bàa lɛ̀ n gaa utɛ kpɛ́tu.

²⁶Ben Isarailinↄ kína bè: À Mikaya kũ à táo wɛ́tɛ kí Amↄ kↄ̃n ma nɛ́ Yoasio kiia,

²⁷é ońnɛ ma bè wà à da kpɛ́siaan, wàgↄ̃ burɛdi kpáa kↄ̃n ío fétefete ai mà gá suo aafia.

²⁸Ben Mikaya bè: Tó n gaa n su aafia, ɛ̃ndɛ̃ Dii e yã o ma gãzĩro. Ben Mikaya ɛ̀ara à bè: Asa a baade píngi ma yã pì mà.

²⁹Isarailinↄ kí kↄ̃n Yudanↄ kí Yosafatao gàa Ramↄ Giliada.

³⁰Ben Isarailinↄ kína bè Yosafatanɛ: Mɛ́ ma zĩnda liɛ mà si zĩ̀n. Mmↄn sↄ̃, ǹgↄ̃ kú kɛ̀ kↄ̃n n kíble'utao dana. Ben Isarailinↄ kína a zĩnda lìɛ à sì zĩ̀n.

³¹Sirianↄ kína gĩakɛ sↄ̃ à ò a sↄ̃goro dↄn'aɛde gↄ̃ↄn baaakuri awɛɛplaaanↄnɛ à bè: Àton aɛ pɛ́ gbɛ̃kea zĩ̀nlo, baa démɛ, séde Isarailinↄ kína ado.

³²Kɛ̀ sↄ̃goro dↄn'aɛdee pìnↄ Yosafata è, aↄ̃ↄe daa Isarailinↄ kínamɛ. Kɛ̀ aↄ̃ sↄ̃ dàa, ben Yosafata wii lɛ̀.

³³Kɛ̀ aↄ̃ↄ è Isarailinↄ kínanlo, ben aↄ̃ à tò gwe.

³⁴Kɛ̀ gbɛ̃ke kà gbàrɛ, ben à gàa à Isarailinↄ kína pà à gɛ̃̀ à mↄ̀'uta pɛ́kↄ̃rɛkii dagura. Ben à bè a sↄ̃gorodeenɛ: Ǹ sↄ̃ lɛ́ liɛ wà bↄ zĩ̀n, wà ma kɛ̃nnamɛ gwe.

³⁵Zĩ̀ pì gbãa kpà zĩ beeea, ben wà kína pì kũkũna a sↄ̃goro guu, wà aɛ dↄ̀ Sirianↄa. Guu kɛ̀ wà à kɛ̃̀nnan pì e aru bↄ èe kwɛɛɛ sↄ̃goro guu. Zĩ pìa uusiɛn à gà.

³⁶Kɛ̀ ↄfãntɛ̃ e gɛ̃ɛ, zĩ̀kpɛɛnↄ wiii kàkũn wà bè, baade tá a bùsun ai a bɛ wɛ́tɛ.

³⁷Lɛn kína pì gà lɛ, ben wà à gɛ̀ sɛ̀ wà sùo Samaria wà vĩ̀i.