1 Kin 18:27-42

²⁷Ita enautaleidio Elaia mo wasimone wanase, “Mukaitane rauparitana! Me ulaipa godida! Me dauwa insaisawa uaraleide ba nambe alen ba awa da alen. Ba naita me ituleidia wanamesano enepiwisepi!”

²⁸Mo mukantoie rauparintoie ita mo dewau rua isima mampe etepu toie ita e mampe etepu eneio osina debama esa rua noseidie.

²⁹Mo ideita ka osowe osowe waio rawilen ita pue susuwa walamaida wisen, tane mai aia da, mai mida da sipoalepona, diaida.

³⁰Tauma Elaia apana diamone wanase, “E mainawo winlena.” Ita mo uduudu me mampe wimone enanepaneiena. Ita me Iawe God watawa apana da kadisana osowe dewasan.

³¹Me seu uduudu 12 otamon ita seu sa ipa Israel damba deadea eueuwau. Ebo ema Israel Iawe God mo nosiu Iakob wanen.

³²Me seu sa mampe pulontompa watawa osowe dewasan Iawe God wadaposiwa baiwa. Ita me wata tampeinta don tone panen. Don sa bedewe esa memepuo 14 lita wadepia rua.

³³Ita me ia tonapu wata osowe teamone ita kau nopuialene otene ia osowe teamon. Ita me wanase, “E dugi debamau 4 bedewe esa memamono nopentopuo pulo ita ia osowe memamona.”

³⁴Mo epe dewantoieno ita me wanase, “E osowe deawaa dewasana.” Ita mo dewasane diasaieno wanase, “E tauma osowe natadeawa memena.” Sa baiwa mo esa natadeawa memeiena me wana rua.

³⁵Ita esa wata osowe iene alene don nopesan.

³⁶Tane rawileidio pue pulontopua walamawa wiseno Elaia wata mampe alene enene rauparilene wanase, “Iawe God, Abraam, Aisak ita Iakob Godiu, ande e sabamoitaa e ipa God Israel bedewe ita ne ipa e nolaa dewalala, ita dewa ema uduudu e waana rua ne dewamona.

³⁷O Iawe God ne rauparina e sipoasaa, ne rauparina e sipoasawo apana ema atenepu e ipa Iawe God, tane e ipa mo nuau leusaiana manawontopu.”

³⁸Me epe rauparileno Iawe God uboo ia iilala wanaubeno iene kau, ia, seu ita dogo wata tampe tane do esa don bedewe ituiamono makolene dialen.

³⁹Tane apana dewa ema ewane, mo nambu dogo osowe udanadoe ke wane waienase, “Iawe God, me ipa God! Iawe God, me ipa God!”

⁴⁰Ita Elaia aiawa badowa mampe diamone wanase, “E Baal perowetawa wadaitumona mai da eno alepi!” Sa baiwa mo uduudu wadaitumoiena ita Elaia banlamone Kison dobawa apua oso antone bomonatuwaiena.

⁴¹Ita Elaia Eiab mampe wanase, “E aie nana ita esa naa, ne unu debama iedio moinawa etedina.”

⁴²Eiab alene nana ita esa nan ita Elaia wadi Kamel iwa osowe odene alene nitomalene namba imimpa osowe udendoe rauparilen.