1 HANUA PAVAPAVADIA 4:11-28

¹¹Ben-abinadab, Nafata-doro idoinai lalonai, (ia ese Solomon natuna hane-ulatona Tafata e adavaia);

¹²Baana Ahilud, Taanak ai bona Megido ai bona Bete-seana idoinai lalonai, (una na Saretan badibadinai, Iesrele henunai, bona Bete-seana amo ela bona Abele-mehola, ela bona lokomeama unukahana);

¹³Ben-gebere, Ramoto-gilead ai, (ia na Iairi Manase ena hanua hidaosi Gilead ai, bona Aragob tanona Basan ai, e abidia, hanua badadia tauratoi-ahui mai maḡudia bona mai auri labora-laboradia);

¹⁴Ahinadab Ido, Mahanaim ai;

¹⁵Ahimasa, Napatali ai, (ia ese Solomon natuna hane-ulatona Basemata e adavaia);

¹⁶Baana Husai, Asere ai bona Bealoto ai;

¹⁷Iehosafat Parua, Isakara ai;

¹⁸Simei Elaha, Beniamina ai;

¹⁹Gebere Uri, Gilead tanona ai, (Amoro taudia edia pavapava Sihon bona Basan pavapavana Og edia tano bunai). Bona heitatao tauna ta danu na Iuda tanona ai.

²⁰Iuda taudia bona Israel taudia na hutuma herea, kone mirina na heto; e anianiva, e inuinuva, e moaleva.

²¹Solomon ese basileia iboudiai e halohiadia, Eufrate sinavaina amo ela bona Filistia taudia edia tano bona Aigupto tanona hetoana; idia ese heaiva monina e mailaia, bona Solomon isiaina e lao heniva, ena mauri dinadia iboudiai lalodiai.

²²Solomon ena ruma anianina dina ta lalonai na flaoa kurokurona koro toi-ahui, bona flaoa mia-kurona koro tauratoi-ahui,

²³bona boromakau mamaruanedia mai digaradia gwauta, bona boromakau rei gabudia amo ruahui, bona mamoe sinahu-ta, bona dia badadia bona uda nanidia bona dia maraḡidia bona kokoroku mai digaradia.

²⁴Badina be Eufrate sinavaina lahara kahana tanona idoinai, Tifsa amo ela bona Gasa, ia ese e lohiaia, bona Eufrate sinavaina lahara kahana pavapavadia iboudiai ia ese e biagudia; bena e heḡeḡemadai tanodia iboudiai vada e maino.

²⁵Iuda taudia bona Israel taudia na e noho namonamova, Dan amo ela bona Bere-sieba, ta ta ena vine auna ena vine auna henudiai bona ena suke auna ena suke auna henudiai, Solomon ena mauri dinadia iboudiai lalodiai.

²⁶Solomon na mai ena kariota hosidia danu, ta ta mai rumadia, iboudiai na gerebu hani; bona ena hosi-gui taudia na gerebu-ta daha-rua.

²⁷Hari heitatao taudia ese King Solomon ana, bona King Solomon ena pata ai adia e abiva taudia adia, e heni, ta ta hua ta ta amo; ḡau ta ai asie hadabudiava.

²⁸Bali bona rei kakoro danu, kariota hosidia bona gui hosidia adia bona edia, na e gwaurai gabudia e laohai, ta ta e haḡanidia heḡereḡerena.