1 HANUA PAVAPAVADIA 17:2-14

²Bena Iehova ena hereva na ienai e kau, eto,

³Ini amo a raka oho, mairiveina kahana baola, sinavai maraḡina ladana Keriti isena ai ba komu; una na Ioridane mairiveina kahana ai.

⁴Sinavai ranuna do ba inua; bona galo vada na haḡanidia, idia ese bae ubumu unuseni ai.

⁵Taunabunai, ia na ela, Iehova ena hereva heḡereḡerena e kara, sinavai maraḡina Keriti isena ai e nohova, Ioridane mairiveina kahana ai.

⁶Daba ai, galo ese ana aniani bona vamu e mailaiva, bona adorahi ai danu ana aniani bona vamu e mailaiva; sinavai ranuna danu e inuva.

⁷A nega taina vada ela, bena sinavai maraḡina e kororo, badina be medu na se dihova una tano ai.

⁸Bena Iehova ena hereva na ienai e kau, eto,

⁹A tore isi, Sarefata, Sidono kahana hanuana ta, baola, unuseni ai ba noho. A itaia, lau ese vabu ta unuseni ai vada na hagania, baine ubumu.

¹⁰Taunabunai, ia na e tore isi, Sarefata ela; hanua ikoukouna badinai e kau, bena vabu ta e itaia, rakuraku audia e gogova. Bena e boi henia, eto, Ranu kuri ta a mailaia, aina inua.

¹¹Baine mailaia eto, bena ma e boi henia, eto, Aniani taina imamu ai a mailaia.

¹²A hahine na eto, Iehova, emu Dirava, e maurimu heḡereḡerena, asi egu aniani maedana; flaoa sina taina mo tohe ai, bona dehoro taina kavabu ai. Harihari rakuraku audia siri rua na gogomu, bainala, aniani baina nadua, lau bona natugu merona amai; baia ania, bena vada baia mase.

¹³Bena Elia ese e hamaoroa, eto, Asio gari; aola, emu hereva heḡereḡerena ba karaia. To guna dikea ta ba gabua, lauagu ba mailaia; una murinai oi bona natumu amui ba gabu.

¹⁴Badina be Iehova, Israel Diravana, na ini e gwau tomamu: flaoa tohena na anina basine ore, bona dehoro kavabuna na basine kaurakaura, ela bona Iehova ese medu na tanobada ai baine hadihoa dinana baine kau.