1 Hadì 22:14-50

¹⁴Piru midtavak si Micaya te, “Mibpenangdù a ziyà te uuyag he Nengazen he iyan dà egkeǥiyen ku is ibpekaǥi zin kedì.”

¹⁵Kebpekeuma ni Micaya ziyà te ki Hadì Ahab ne mid-insaan sikandin dutun te hadì te, “Micaya, edsurungen dey ve is Ramot Gilead etawa kenà?” Midtavak si Micaya te, “Surunga niw ne ebpekezaag kew, su ibeǥey heeyan kenikew te Nengazen.”

¹⁶Piru migkaǥi haazà is hadì diyà te ki Micaya te, “Kepipira ku ves sikew ibpepenangdù para keǥiya nu kayi te kediey is tutuu pinaaǥi te ngazan te Nengazen?”

¹⁷Umbe, migkaǥi si Micaya te, “Neehè ku pinaaǥi te mibpelewasan kedì he is menge Israilihanen ne nekedsusuwey ziyà te menge vuvungan he iring te menge kerehidu he wazà ed-elima kandan, ne migkaǥi is Nengazen te, ‘Heini he menge etew ne wazè dan en pengulu. Ipeulì sikandan he melinawen.’ ”

¹⁸Ne migkeǥiyan ni Hadì Ahab si Jehoshafat te, “Umbe man migkaǥi ku en kenikew he wazà meupiya he tagnè din bahin kedì, kekenà, pudu zà mezaat.”

¹⁹Migkaǥi pa si Micaya te, “Pemineǥa nu is lalag te Nengazen! Neehè ku is Nengazen he ebpimpinuu ziyà te pinuuwè din te kedhadì, ne zuen menge ilengiten he menge linimbag he ebpemenhitindeg diyà te egkekewanan wey egkeǥivang din.

²⁰Ne migkaǥi is Nengazen te, ‘Hentei is ed-akal ki Ahab su para medsurung sikandin diyà te Ramot Gilead su para mepatey sikandin?’ Ne nekedseselekawà is tavak dutun te ilengiten he menge linimbag.

²¹Ne netegteǥaad duen mulin-ulin he mid-uvey ziyà te Nengazen he egkaǥi te, ‘Iyan a ed-akal kandin.’

²²Ne mid-insà is Nengazen, ‘Te, hengkey he paaǥi?’ Midtavak sikandin te, ‘Egenat a ne ibpetarùtarù ku is menge ebpeneuven he sakup ni Ahab.’ Migkaǥi is Nengazen te, ‘Genat ka ne iyan heeyan beeli nu. Ebmezeeǥen ka te ked-akal kandin.’ ”

²³Impelaus ni Micaya is egkeǥiyen din, ke sikandin te, “Iyan heeyan neulaula. Midsuǥù te Nengazen is mulin-ulin para terterui zin is menge ebpeneuven he sakup nu. Su ketau te Nengazen he mezeeti ka.”

²⁴Ne mid-uvey si Zedekia ziyà te ki Micaya ne midtabpì din. Ne migkaǥi si Zedekia te, “Maan is ibpesavut nu he mid-awà kayi te kediey is Mulin-ulin te Nengazen ne nekidlalag kenikew?”

²⁵Midtavak si Micaya te, “Egketuenan nu heini zutun te andew he egkezaag kew en te tebek ne ed-eles ka ziyà te kineselezan he ruǥu te valey.”

²⁶Mibmandar si Hadì Ahab te, “Dekepa niw si Micaya ne ilikù niw ziyà te pengulu te inged dey wey ziyà te ki Joash he anak ku.

²⁷Ne keǥiyi niw sikandan he iyan suǥù ku is ebpirisuwen heini he etew, ne supas dà wey wahig is ibeǥey ziyà te kandin taman te kebpekelikù ku puun te tebek he wazà mekeizi.”

²⁸Migkaǥi si Micaya te, “Emun ebpekelikù ka he kenà egkekeizan, ne wazà heeyan keǥiya te Nengazen pinaaǥi kedì.” Ne zutun migkeǥiyan ni Micaya is langun he menge etew zutun te, “Tentenuzi niw heini is migkaǥi ku!”

²⁹Ne midsurung diyà te Ramot Gilead si Hadì Ahab he hadì te Israel wey si Hadì Jehoshafat he hadì te Juda.

³⁰Migkaǥi si Ahab diyà te ki Jehoshafat te, “Emun timpu en te tebek kenà a ebpekilala he iyan a hadì, piru sikew mulà bivisti ka te visti te hadì!” Umbe mibpeuvag-uvag si Ahab, ne mibpekidtebek sikandan.

³¹Dutun he timpu, mibmandù is hadì te Aram diyà te 32 he menge peremandar zin te ebpemen-untud te kerwahi te, “Kenè niw etekiya is minsan hentei, kekenà, iyan dà is hadì te Israel.”

³²Hein naahà dutun te menge peremandar si Jehoshafat, ne kunaan dan ke iyan en sikan is hadì te Israel, umbe midtebek dan en sikandin. Piru hein nengulahì si Jehoshafat,

³³netuenan duen te menge peremandar he kenè bes iyan sikan is hadì te Israel, umbe mid-engkezan dan te edal-as.

³⁴Piru hein edtulung en ebpemanà is sevaha he sundaru te Aramihanen dutun te menge sundaru te Israel, ne neserab mesuǥat si Hadì Ahab he hadì te Israel ziyà te midtemuwaayan te pengalang din diyà te kumeng. Migkeǥiyan ni Hadì Ahab haazà is ed-uwit te kerwahi zin te, “Ipekeziyù a kayi te tebek! Su nepelian a.”

³⁵Utew en meinit is tebek dutun he andew, ne is hadì te Israel ne midsandig dà dutun te kerwahi zin he edsinaru ziyà te menge Aramihanen. Edtudà is lengesa zin dutun te saag te kerwahi. Ne kebmahapun dutun minatey en sikandin.

³⁶Ne hein midsanlep en is andew, duen mibensag dutun te menge sundaru te Israel te, “Is kada sevaha med-ulì en diyà te kandin he ed-ulian!”

³⁷Nepatey is hadì te Israel ne mid-uwit is lawa zin diyà te Samaria, ne ziyà ileveng.

³⁸Midlùluan dan sikan is kerwahi ziyà te pemeziǥuey ziyà te Samaria, he zutun ebpememeziǥù is menge vahi he ebelegyà te zengeg dan, ne midilaan te asu is lengesa zin. Daan he nekaǥi te Nengazen he iyan heini egkeulaula.

³⁹Is duma pa he ǥuǥud mehitenged te kedhadì ni Ahab, wey is langun he mibeelan din, ragkes is kebpehitindeg din te mekempet he turuǥan, wey keberengberenga zin te menge inged, ne ingkesurat diyà te Libru he Midsuratan te menge Keguǥuza te menge Hadì te Israel.

⁴⁰Ne hein minatey en si Ahab, is anak din he si Ahazia iyan nekeilis kandin te kedhadì.

⁴¹Nehimu he hadì diyà te Juda si Jehoshafat he anak ni Asa hein ikeepat he tuig te kedhadì ni Ahab diyà te Israel.

⁴²Ne 35 he tuig is keǥurang ni Jehoshafat hein nehimu sikandin he hadì. Diyà sikandin te Jerusalem med-ubpà, ne midhadì sikandin seled te 25 he tuig. Is iney zin iyan si Azuba he anak ni Shilhi.

⁴³Midsunud din is ulaula te amey zin he si Asa. Metazeng diyà te etuvangan te Nengazen is mid-ulaula zin. Piru wazè din ipen-awà sikan is menge simbahan diyà te metikang he menge lugar, umbe mibpedayun is menge etew te kebpemuhat wey kedtutung te veyewà dutun.

⁴⁴Meupiya is kedepità ni Jehoshafat wey te hadì te Israel.

⁴⁵Is duma pa he ǥuǥud mehitenged te kedhadì ni Jehoshafat, wey is nevantug he menge vaal zin, wey is menge kebpekidtebek din, ne ingkesurat diyà te Libru he Midsuratan te menge Keguǥuza te menge Hadì te Juda.

⁴⁶Midsegseg din is menge maama wey menge vahi he ebelegyà te zengeg dan diyà te menge lugar he ed-ezapan, he wazà mesegseg hein timpu te amey zin he si Asa.

⁴⁷Dutun he timpu wazà hadì diyà te Edom; iyan dà edumala kayi is pengulu he mibpilì ni Jehoshafat.

⁴⁸Duen mibpeveelan ni Jehoshafat he menge varku he para te petiǥayun he ebiyahi ziyà te Ofir te kegkuwa te vulawan. Piru wazà heini mekeviyahi su nezeetan heini ziyà te Ezion Geber.

⁴⁹Dutun he timpu, migkaǥi si Ahazia he anak ni Ahab diyà te ki Jehoshafat te, “Ipezuma nu is menge etew ku te menge etew nu te kebiyahi ziyà te zaǥat.” Piru wazà mebpemineg si Jehoshafat.

⁵⁰Hein minatey en si Jehoshafat, inleveng sikandin diyà te midlevengan te menge kepuun din diyà te Inged ni David. Ne iyan nekeilis kandin te kedhadì is anak din he si Jehoram.