1 Ḡaliḡalibona 18:19-43

¹⁹Tam niganana Islael lavedi matabudi kwa giuwedi te sa tava lisigumo, oya kamel dabanemo. Bi kota Bal taugiuwatana 450 bi maimaituwa waivinina Asela taugiuwatana 400 bi tedi mabai ḡalibona waivinina Desabel yawai kanidina vaitedi kwa natomedi.”

²⁰Taunana aubaina ḡalibona Aḡab Islael lavedi bi Bal taugiuwatana matabudi i yogedi te a tava kamel oyana dabanemo ai ḡemotidi.

²¹Ḡome Elaidiya lava matabudi matedimo i moito bi i giuwedina gado, “Temi ma visa nuwalaḡalaḡa ko kaisako bamoda Bada bi Maimaituwa ba ko kaiwata, kota Bal bi Maimaituwa ba ko kaiwata.” Ḡome lava mote bai a giuwe.

²²Kamaina bi Elaidiya i giuwedina gado, “Bada taugiuwatana nopodimo ba tagu tauguḡa yà miyamiya. Bi Bal taugiuwatana ba 450.

²³Aubaida kau labu ko natomedi. Bi Bal taugiuwatana kau ḡemota sa vai bi sa nigonigo te kai dabedimo sai dubu saḡedi bi mote kai simai tuni. Bi tagu kau ḡesau yà vai bi kauwina ḡemotina yà voiye.

²⁴Kamaina bi emi maimaituwa lisinemo ko laupali bi tagu kota Bada lisinemo yà laupali. Bi ta kita te bamo maimaituwana bi kai yai vavanina ba tana taunana Maimaituwa giugiukauwina. Bi ḡome lava matabudi ai anina.”

²⁵Bi Elaidiya, Bal taugiuwatana i giuwedina gado, “Temi kau ḡemota ko vine bi ko kanonoḡi te emi sewasewa. Temi kona wapa gulata, taunana aubaina sewasewa ko gei voiye bi kai komai tuni. Bi emi maimaituwa lisinemo ko laupali.”

²⁶Kamaina bi kau a vai bi a kanonoḡi bi olta dabanemo a sako. Bi a laulau palina maimaituwa Bal isanemo olaolalemo eete suwalamodo bi kota a binabinauna gado, “Oo Bal, ema pali kwa vaiye!” Bi olta a voivoiyena a bigabiga wai kwaivivili. Bi Bal mote kalinedi i vaiye bi mote bai i tubuḡa.

²⁷Bi suwala modo palatinemo Elaidiya i wai namaḡedina gado, “Kalinemi dididiginemo ko laupali! Giukauwa te tana maimaituwa! Augunai male ya wai nuwanoḡonoḡota gulata ee i nawa ginamuli ee bamo ya nawanawa ee ya kenakena te ko lainuwesi.”

²⁸Kamaina bi a binau gulata bi edi vaivai luvanemo taudiḡa kepatemo bi naipimo tunidi a sesesedina eete kwasina ai tosidi.

²⁹Tedi yaḡolo a binabinauna eete aubiga lausewasewa ena suwala kauwa i vai bi mote bai i tubuḡa ee mote kalinedi i vaiye bi i giuwatewatedi.

³⁰Kamaina bi Elaidiya lava matabudi i giuwedina gado, “Ko nato lisigumo.” Bi lava matabudi a nato a moito kwaivivili bi tana Maimaituwa ena olta a koikoi suwasuwana i laivaliu munaḡe.

³¹Bi ḡakima 12 i tanodi te Islael damdi 12 nopodimo ba ḡakima ḡemoḡemotaḡa, mba damdi sa wai mataile. Bi isa Islael ba edi magula Deikap isana ḡesauna Bada i vite.

³²Niga ḡakimidimo Bada ani lauduneyena olta i voiye. Bi tana olta diyana tikwali ena ani velau i ḡala waikwaivivili te luvana gauba dubidi 4, sa ḡinidi te ya wanavu.

³³Bi tana olta dabanemo kai i waidubu saḡedi bi kau i nigonigo bi kai dabedimo i wai dubu saḡedi bi i giuna gado, “Dubi ḡemoḡemotaḡa ba 14 lita luvedi koi wanavudi te sewasewa ma kaina dabanemo ko ḡini tawatawa.”

³⁴Mai a voiye mulinemo ba i giuwedina gado, “Kota ko voiye munaḡe.” Kamaina bi a voiye munaḡe, “Kota koi faioni.” Bi ai faioni.

³⁵Te olta ena ani moito tikwalina a ḡalaḡalana gauba i wanavu.

³⁶Bi aubigamo lausewasewa saugina i tava bi Elaidiya i moito nawa olta diyanemo bi i laupalina gado, “Oo Bada, Eiblaḡam, Aisik bi Islael edi Maimaituwa, niganana kwa kamaḡatim te tam Islael edi Maimaituwa bi tagu em taupaula bi niga kauwidi e voiyedina ba em giuvavasaḡa luvanemo.

³⁷Oo Bada egu pali kwa vai, te niga lavedi sa sibe te tam Bada Maimaituwa bi tam kaka nuwedi kwa vitaledi te sa nato lisimmo.”

³⁸Kamaina bi Maimaituwa ena kai i yovo bi sewasewa, kai, ḡakima bi doḡa i kalaḡosedi bi kota gauba tikwalimo i sosovi waiḡasali.

³⁹Bi sauginemo lava matabudi a kitakita ba a laudulu yovo doḡamo bi kalinedi dididiginemo a binauna gado, “Bada tana taunana Maimaituwa! Bada tana taunana Maimaituwa!”

⁴⁰Bi Elaidiya i giuvavasaḡedina gado, “Bal taugiuwatana ko kaidididi, mote ḡemota koma kita kamaḡe bi ima naila ima nawa. Kamaina bi lava Bal taugiuwatana a kaidididi bi Elaidiya i waidoli nawedi Kison gwagwanemo bi ai peki kovidi.”

⁴¹Kamaina bi Elaidiya, Aḡab i giuwena gado, “Kwa nawa, kwa kani bi kwa tego banina tagu nabu dididiga daguguna e vaiye ya natonato.”

⁴²Bi Aḡab i nawa i kani bi i tego bi Elaidiya i saḡa oya kamel dabanemo bi i laudulu solana tuwapekana gavogavodimo bi i laupali.

⁴³Ḡome ena taupaula i giuwena gado, “Kwa nawa bi nisa yawaninaḡa kwai kita nawa.” Kamaina bi ena taupaula i nawa bi nisa yawaninaḡa i waikita nawa bi i nato munaḡa te i giuna gado, “Tagu mote bai yà kita.” Elaidiya mala 7 ena taupaula i giuwe, te ya nawa yai kita.