ẔWA 8:46-55

⁴⁶¿Nóẕlele ḻe'e gak yesbága'le neda' doḻa'? Cha' ẕchaḻja' da' li, ¿biẕ chen' bi žejḻe'le chia'?

⁴⁷No benne' nake' che Dios, ẕze nage' x̱tiža' Dios, san ḻe'e, dan' bi nakle che Dios, bi ẕze nagle x̱tiže'e.

⁴⁸Naž beži'igak benne' judío ka', na' belyi'e Jesusen': —Káteze wnnato' kate' wnnato' nako' benne' Samaria, na' žonḻen da' x̱iwe' Le' tẕen.

⁴⁹Bechebe Jesusen', na' gože' ḻégake': —Bi žonḻen da' x̱iwe' neda' tẕen. Neda' žapa' X̱a' ba la'ne, na' ḻe'e ẕzoale neda' cheḻa'ale.

⁵⁰Bi ẕka'n ẕen kwina'. Zoa No Benne' ẕka'n ẕene' neda', na' Ḻe' ẕchi'a ḻaže'e žo'o.

⁵¹Da' li žapa' ḻe'e: nóte'teze benne' si' ḻo ne'e x̱tiža'a, bi gat bennen'.

⁵²Naž benne' judío ka' belyi'e Ḻe', na' wnnágake': —Na'a nnezlto' žonḻen da' x̱iwe' Le' tẕen. Bran gote', na' ḻezka' gotgak benne' ka' bcháḻjgake' ḻo wláz Dios, san Le' ẕnno': “Nóte'teze benne' si' ḻo ne'e x̱tiža'a, bi gat bennen'.”

⁵³¿Nakžo' Le' ẕen ka x̱ažo Bran? Gote' ḻe', na' gotgak benne' ka' bcháḻjgake' ḻo wláz Dios. ¿Noẕkzen' žon kwino'?

⁵⁴Bechebe Jesusen', na' gože' ḻégake': —Cha' neda' wká'n ẕen kwina', yeḻa' ẕen na' bi be zakan'. X̱a' ẕka'n ẕene' neda', na' ḻe'e ẕnnale nake' Dios chele.

⁵⁵Bi nónbia'le X̱ažo Dios, san neda' nónbi'a-ne'. Chela' nnia': bi nónbi'a-ne', na' gaka' benne' wen ḻaže' kan nakle ḻe'e. Nakle benne' wen ḻaže' ka'. Na'a, da' li nónbi'a-ne', na' nzi' ḻo na'a x̱tiže'e.