ẔWA 8:20-57

²⁰Bchaḻj Jesusen' da' ni kate' ne zoe' žsedle' benách ka' ḻo ẕchil yodo', gan zej nnita' kak ka' gan ẕgó'ogake' mežw che yodo', san nitó benne' bi bex̱we' Ḻe', dan' bi na' žin ža chie' choe'e ḻo ná'gake'.

²¹Da' yoble Jesusen' gože' ḻégake', na' wnné': —Yezá'a yežlyó nga, na' yeyiljle no benne' yeslé' ḻe'e, san ga'n doḻa' da' nbága'le, na' gatle. Gan cha'a neda', bi gak yidle ḻe'e.

²²Naž bchaḻjgak benne' judío wnná bia' ka', na' wnnágake': —¿Got kwine'? Wnné': “Gan cha'a neda', bi gak yidle ḻe'e.”

²³Jesusen' gože' ḻégake': —Nakle ḻe'e che yežlyó da' žen' že'le nga, san neda' za'a ya'abá che Dios da' žen' ža'le. Nakle ḻe'e benách che yežlyó nga, san neda' bi naka' benne' che yežlyó nga.

²⁴Che ḻen goža' ḻe'e: “Ga'n doḻa' da' nbága'le, na' gatle.” Cha' bi chejḻe'le nakkza' Benne' Weslá, ga'n doḻa' da' nbága'le, na' gatle.

²⁵Naž wnnábgekle' Ḻe', na' wnnágake': —¿Noẕkze benne' nako'? Jesusen' gože' ḻégake': —Naka' kan ba goža' ḻe'e ža ni'te.

²⁶Da' zan da' žaḻa' yapa' ḻe'e, na' wchi'a ḻaža'a da' nak chele. Diža' dot da' li ẕchaḻj X̱a', Bennen' bseḻe'e neda', na' da' ženla' ẕchaḻje' Ḻe', ẕcháḻjḻenan' benách ka' nníta'gake' yežlyó nga.

²⁷Bi bejní'igekle' ẕcháḻjḻene' ḻégake' kan nak che Dios, X̱e'.

²⁸Che ḻen Jesusen' gože' ḻégake': —Kate' žin ža wchisle neda', Benne' Golje' Benách, nich gotle neda', naž gákbe'elele nakkza' Benne' Weslá, na' bi be žona' žakze chia', san da' bḻoe'el X̱a' neda' ẕchaḻjan'.

²⁹X̱a', Bennen' bseḻe'e neda', zóaḻene' neda'. X̱a' bi bka'ne' neda' toza', dan' žónteza' da' žaz ḻaže'e Ḻe'.

³⁰Kate' bchaḻj Jesusen' da' ni, benne' zan bejḻé'gake' chie'.

³¹Naž Jesusen' gože' benne' judío ka', benne' žejḻé'gake' chie', na' wnné': —Cha' góntezele kan ẕnna x̱tiža'a, da' li gakle benne' wsedle chia' ka'.

³²Gónbia'le da' nak dot da' li, na' dan' naken dot da' li yeslán ḻe'e.

³³Beží'igake', na' belyi'e Ḻe': —Ẕa'só Bran nakto', na' bi zoa no benne' bene' neto' benne' ndo'w ka'. ¿Biẕ chen' ẕnno': “Yeslán ḻe'e”?

³⁴Jesusen' gože' ḻégake': —Da' li žapa' ḻe'e: Yógo'te benne' wen doḻa' ka', yó'ogake' ḻo na' doḻa'.

³⁵To benne' ndo'w bi gá'nteze' liž x̱an yo'o, san bennen' nake' ẕi'n x̱an yo'on' gá'nteze' liž bennen' nake' x̱an yo'on'.

³⁶Ki naken, cha' Bennen' nake' Ẕi'n Dios yeslé' ḻe'e, da' li yelale.

³⁷Nnezla' nakle ẕa'só Bran, san žénelele gotle neda', dan' bi nzi' ḻo na'le x̱tiža'a.

³⁸Neda' ẕchaḻja' che da' bḻe'ela' gan zoa X̱a', san ḻe'e žonle da' benl-le gan zoa x̱akzle.

³⁹Beží'igake', na' belyi'e Ḻe': —Bran nake' x̱a gole wdé cheto'. Naž Jesusen' gože' ḻégake': —Chela' da' li nakle ẕa'só Bran, gonle kan ben Bran na'.

⁴⁰Na'a, žénelele gotle neda', ḻa'kze ẕcháḻjḻena' ḻe'e da' nak dot da' li, dan' benla' bchaḻj Dios. Bi ben Bran na' ki.

⁴¹Ḻe'e žonle kan žon x̱akzle. Naž belyi'e Ḻe': —Neto' bi nakto' ẕi'n zi' ka'. Toze Dios nake' X̱ato'.

⁴²Naž Jesusen' gože' ḻégake': —Chela' da' li nak Dios X̱ale, si' ḻo na'le neda', dan' bžoja' gan zoa Dios, na' bḻa'a yežlyó nga. Kege žakze chia' bḻa'a, san Dios na'kze bseḻe'e neda'.

⁴³¿Bi nnézlele biẕ chen' bi gak chejní'ilele da' ẕnnia'? Naken dan' bi žénelele wzé nagle x̱tiža'a.

⁴⁴X̱akzle naken da' x̱iwe'. Nakle che da' x̱iwen', na' žénelele gonle da' žaz ḻaže' x̱alen'. Ža ni'te da' x̱iwen' naken benne' wetw benách ka', na' bi nzi' ḻo nan' da' nak dot da' li, dan' bi ẕchaḻjen da' li. Kate' žon ḻaže' da' x̱iwe', ka nakkzen ẕchaḻjen, dan' naken benne' wen ḻaže', na' naken ka x̱ágakkze benne' wen ḻaže' ka'.

⁴⁵Dan' ẕchaḻja' neda' da' li, bi žejḻe'le chia'.

⁴⁶¿Nóẕlele ḻe'e gak yesbága'le neda' doḻa'? Cha' ẕchaḻja' da' li, ¿biẕ chen' bi žejḻe'le chia'?

⁴⁷No benne' nake' che Dios, ẕze nage' x̱tiža' Dios, san ḻe'e, dan' bi nakle che Dios, bi ẕze nagle x̱tiže'e.

⁴⁸Naž beži'igak benne' judío ka', na' belyi'e Jesusen': —Káteze wnnato' kate' wnnato' nako' benne' Samaria, na' žonḻen da' x̱iwe' Le' tẕen.

⁴⁹Bechebe Jesusen', na' gože' ḻégake': —Bi žonḻen da' x̱iwe' neda' tẕen. Neda' žapa' X̱a' ba la'ne, na' ḻe'e ẕzoale neda' cheḻa'ale.

⁵⁰Bi ẕka'n ẕen kwina'. Zoa No Benne' ẕka'n ẕene' neda', na' Ḻe' ẕchi'a ḻaže'e žo'o.

⁵¹Da' li žapa' ḻe'e: nóte'teze benne' si' ḻo ne'e x̱tiža'a, bi gat bennen'.

⁵²Naž benne' judío ka' belyi'e Ḻe', na' wnnágake': —Na'a nnezlto' žonḻen da' x̱iwe' Le' tẕen. Bran gote', na' ḻezka' gotgak benne' ka' bcháḻjgake' ḻo wláz Dios, san Le' ẕnno': “Nóte'teze benne' si' ḻo ne'e x̱tiža'a, bi gat bennen'.”

⁵³¿Nakžo' Le' ẕen ka x̱ažo Bran? Gote' ḻe', na' gotgak benne' ka' bcháḻjgake' ḻo wláz Dios. ¿Noẕkzen' žon kwino'?

⁵⁴Bechebe Jesusen', na' gože' ḻégake': —Cha' neda' wká'n ẕen kwina', yeḻa' ẕen na' bi be zakan'. X̱a' ẕka'n ẕene' neda', na' ḻe'e ẕnnale nake' Dios chele.

⁵⁵Bi nónbia'le X̱ažo Dios, san neda' nónbi'a-ne'. Chela' nnia': bi nónbi'a-ne', na' gaka' benne' wen ḻaže' kan nakle ḻe'e. Nakle benne' wen ḻaže' ka'. Na'a, da' li nónbi'a-ne', na' nzi' ḻo na'a x̱tiže'e.

⁵⁶X̱ale Bran bebele' dan' žaḻa' ḻe'ele' ža soa' neda' yežlyó nga, na' ḻa'kze gote' ža ni'te, bḻe'eḻen', na' bebéḻe'ele'.

⁵⁷Naž benne' judío ka' belyi'e Jesusen', na' wnnágake': —Bi na' gono' chi-yon yiz. ¿Bḻe'elo' Bran na'?