ẔWA 8:1-20

¹Jesusen' wyeje' gan nak ḻaw Ya'a Yag Olibo.

²Kate' za' ža'ní', bḻa' Jesusen' ḻi'a yodo', na' bžingak yógo'te benách ka' gan zoe'. Jesusen' wži'e ga na', na' bsedle' ḻégake'.

³Naž benne' yodo' wsedle ka' ḻen benne' yodo' fariseo ka' bché'gake' to no'le gan zoa Jesusen', no'len' bḻé'egekle' žone' doḻa' da' ẕka'n ditjen yeḻa' ẕchag na'. Bzégake' ḻe' gachje ḻáwe'le benách ka' ẕze nággake' che Jesusen',

⁴na' belyi'e Ḻe': —Benne' wsedle, no'le ni wẕento'-ne' žone' doḻa' da' ẕka'n ditjen yeḻa' ẕchag na'.

⁵Ḻo da' bchi'le Moisés, gože' žo'o wže'ežo yej to no'le žone' da' ki, nich gate'. ¿Na'a Le', biẕ ẕnno'?

⁶Ki wnnágake' nich bi da' nna Jesusen' nich gak yesbága'gake' Ḻe' ẕia. Naž byechw Jesusen', na' bwie' ḻo yo, na' bzoje' ḻo yon' ḻen x̱ben ne'e.

⁷Kate' wnnábḻe'egekle' Ḻe', naž bezé Jesusen', na' gože' ḻégake': —Nólele ḻe'e bi naple doḻa' wak so ḻawle wže'ele-ne' yej.

⁸Da' yoble beyechw Jesusen', na' bwie' ḻo yo, na' wzó ḻawe' ẕzoje' da' yoble ḻo yon'.

⁹Kate' béngekle' da' ni, na' ḻáẕdo'gake' bcheben ḻégake', na' bežojgak to tógake'. Zgá'alegak benne' gole ka' bezá'gake', na' wdé na' benne' kwide' ka'. Toze Jesusen' bga'ne' ḻen no'len', ga na' zoe' gachje ḻáwe'le benne' ka' ẕze nággake' chie' Ḻe'.

¹⁰Naž Jesusen' bezíe' da' yoble, na' bi bḻe'ele' nitó benne' žesbage'e no'len' ẕia, san toze no'len', na' gože' ḻe': —No'le, ¿gaẕ zej nnita' benne' ka' besbága'gake' le' ẕia? ¿Bi zoa no benne' ẕchoge' chio' gato'?

¹¹No'len' wnné': —Nitóe'. Naž Jesusen' gože' ḻe': —Ḻezka' neda', bi ẕchoga' chio' gato'. Beyéj ližo', na' biž gono' doḻa'.

¹²Da' yoble Jesusen' bcháḻjḻene' ḻégake', na' wnné': —Neda' naka' baní' chegak benách ka' nníta'gake' yežlyó nga. Nóte'teze benne' sá'ḻene' neda' tẕen, bi te' gan nak choḻ, san soaḻen baní' ḻe', nich ḻe'ele' kan gata' yeḻa' nban da' zejlí kanne chie'.

¹³Naž benne' yodo' fariseo ka' belyi'e Ḻe', na' wnnágake': —Le' ẕzoa lio' chio' kwinzo'. Bi zaka' da' ẕzoa lion'. Dáche'ze naken.

¹⁴Bechebe Jesusen', na' gože' ḻégake': —Ḻa'kze ẕzoa lian' chia' kwinza', dot da' li nak da' ẕzoa lian' dan' nnezla' gan bžoja', na' gan cha'a, san ḻe'e bi nnézlele gan za'a, na' gan yeyá'a.

¹⁵Ḻe'e ẕchi'a ḻáže'le kan zej nak da' ka' žákgaken yežlyó nga, san neda', žakze chia' bi ẕchi'a ḻaža'a nitó benne'.

¹⁶Ḻa'kze wchi'a ḻaža'a, ka nak da' li wchi'a ḻaža'a, dan' kege nedza' wchi'a ḻaža'a, san X̱a', Bennen' bseḻe'e neda', gónḻene' neda' tẕen.

¹⁷Ḻezka' da' bsedle Moisés nyejw ḻe'e yich la'y, na' ẕnnan: “Da' ẕzoa ligak chope benne', naken dot da' li.”

¹⁸Neda' ẕzoa lia' chia' kwinza', na' X̱a', Bennen' bseḻe'e neda', ḻezka' ẕzoa lie' chia' neda'.

¹⁹Naž benne' yodo' fariseo ka' wnnábgekle' Ḻe', na' wnnágake': —¿Gaẕ zoa X̱o'? Bechebe Jesusen', na' gože' ḻégake': —Bi nónbia'le neda', na' bi nónbia'le X̱a'. Chela' nónbia'le neda', ḻezka' X̱a' gónbia'le-ne'.

²⁰Bchaḻj Jesusen' da' ni kate' ne zoe' žsedle' benách ka' ḻo ẕchil yodo', gan zej nnita' kak ka' gan ẕgó'ogake' mežw che yodo', san nitó benne' bi bex̱we' Ḻe', dan' bi na' žin ža chie' choe'e ḻo ná'gake'.