ẔWA 7:2-30

²Ža na' za' žin lni chegak benne' judío ka' kate' žejsá' ḻáže'gake' ka x̱a wdé chégake' wnníta'gake' gan besbíngake' ẕan yo'o lága'do'.

³Che ḻen benne' biche' Jesusen' ka' belyi'e Ḻe', na' wnnágake': —Bžoj ga ni, na' wyéj gan nbab Judea nich ḻé'egekle benne' wsedle chio' ka', benne' nníta'gake' ga na', yeḻa' wak ka' da' žono'.

⁴Cha' žénele no benne' gónbia'gak benách ka' ḻe', bi žone' ngáche'ze da' žone'. Dan' žono' yeḻa' wak ẕen ki, bḻoe'el kwino' ḻawgak yógo'te benách ka' nich ḻé'egekle' da' žono'.

⁵Ki wnnagak benne' biche'e ka' dan' bi na' chejḻé'gake' chie' Ḻe'.

⁶Naž Jesusen' gože' ḻégake': —Bi na' žin ža chia' nich wḻoe'ela' dan' naka' ḻawgak benách ka', san ža ni naken nich bi da' gonle ḻe'e.

⁷Benách ka' nníta'gake' yežlyó nga bi ẕzóagake' ḻe'e cheḻa'ale, san ẕzóagake' neda' cheḻa'ale dan' ẕḻoe'ela' ḻaw kan zej nake', na' da' ẕnnia' nak bian' bi nak chawe' da' žóngake'.

⁸Le chej ḻe'e lni na'. Bi cha'a neda' lni na' na'a dan' bi na' žin ža chia'.

⁹Kate' beyóž gože' ḻégake' da' ki, bga'ne' gan nbab Galilea.

¹⁰Wdé jak benne' biche' Jesusen' ka' lni na', ḻezka' wyeje' Ḻe', kege kwáselo, san ngáche'ze wyeje'.

¹¹Gan žak lni na', wdiljgak benne' judío wnná bia' ka' Jesusen', na' wnnágake': —¿Gaẕ zoa bennen'?

¹²Benne' zan bcháḻjgake' da' zanḻe'e kan nak che Jesusen'. Baḻe' wnnágake': —Nake' chawe'. Yebaḻe' wnnágake': —Bi nake' chawe' dan' žon ḻáže'le' benách ka'.

¹³Nitó benne' bi bchaḻje' kwáselo kan nak che Jesusen', dan' benne' zan ka' ẕžébegake' benne' judío wnná bia' ka'.

¹⁴Kate' ba bžin gachje lni na', bḻa' Jesusen' ḻi'a yodo', na' bsedle' benách ka' nníta'gake' ga na'.

¹⁵Bebán ḻáže'gak benne' judío ka', na' wnnágake': —¿Nakx̱ chen', žakḻe'e bennen', na' bi nsedle' che yodo'?

¹⁶Bechebe Jesusen', na' gože' ḻégake': —Da' žsedla' neda', kege chezan', san naken che X̱ažo Dios, Bennen' bseḻe'e neda'.

¹⁷Cha' žénele no benne' gone' kan žénele Dios, na' gákbe'le' cha' nak che Dios da' žsedla' benách ka' o cha' žakze chia' ẕchaḻja'.

¹⁸Nóte'teze benne' ẕchaḻje' žakze chie', žone' ki nich gápegak benách ka' ḻe' ba la'ne, san bennen' žénele' gápegak benách ka' ba la'ne bennen' bseḻe'e ḻe', benne' ni ẕchaḻje' da' naken dot da' li, na' bi žon ḻaže'e.

¹⁹’Moisés bdie' ḻo na'le da' bchi'le Dios, san nitole ḻe'e bi žonle kan ẕnna x̱tiže'e. ¿Biẕ chen' žénelele gotle neda'?

²⁰Beži'igak benne' zan ka', na' belyi'e Ḻe': —Da' x̱iwe' žónḻenen le' tẕen. ¿Noẕkze benne' žénele' gote' le'?

²¹Bechebe Jesusen', na' gože' ḻégake': —To yeḻa' wak bena', na' žebán ḻáže'le yógo'tele.

²²Da' li Moisés benne' chele dan' nžogen ḻo beḻa' chele dan' nak bian' nzi'le x̱tiža' Dios. Kege Moisés na'kze bennen' chele, san wẕi'en ḻo na'gak x̱a x̱ta'we' ka'. Na'a, ḻa'kze nak ža la'y, ẕchogle ḻo beḻa' chegak x̱kwide' byo chele ka' dan' nak bian' zej nbabbe' che Dios.

²³Cha' želzi'be' ḻo beḻa' chégakbe' dan' nak bian' kate' nak ža la'y, nich bi wka'nle ca'ze da' ẕnna da' bchi'le Moisés, ¿ẕža'le neda' dan' beyona' to benne', nich beyake' cháwe'do' kate' nak ža la'y?

²⁴Bi žaḻa' kon wchi'a ḻáže'le, san le wchi'a ḻaže' kan nak da' li.

²⁵Naž bchaḻjgak baḻe benne' ka' nníta'gake' ḻo yež Jerusalén, na' wnnágake': —¿Kege benne' ni bennen' žeyiljgak benne' judío wnná bia' ka' nich gótgake' Ḻe'?

²⁶Le wia nga. Kwáselo ẕchaḻje', na' bi be žé'gake' Ḻe'. ¿Žákbe'egekle benne' ka', benne' ẕnna biá'gake' žo'o, da' li benne' ni nake' Benne' Criston', Bennen' žaḻa' nna bi'e žo'o?

²⁷Benne' ni, nnezlžo ga benne' Ḻe'. Kate' yid Benne' Criston', bi nnezle nitó benne' ga benne' Ḻe'.

²⁸Wzóa Jesusen' ẕsedle' benách ka' ḻo ẕchil yodo', na' katen' benle' da' ni, wnníe' zižje, na' wnné': —¿Nónbia'le neda', na' nnézlele ga benne' neda'? Bḻa'a yežlyó nga, kege žakze chia', san Dios na'kze bseḻe'e neda', na' Ḻe', bi nónbia'le-ne'.

²⁹Neda' nónbi'a-ne', dan' za'a ḻo wlaze' Ḻe', na' Ḻekze' bseḻe'e neda'.

³⁰Naž ben byéngake' séngake' Ḻe', san nitó benne' bi bex̱we' Ḻe', dan' bi na' žin ža chie' nich choe'e ḻo ná'gake'.