ẔWA 5:4-36

⁴Ki žaken dan' žetj to wbás che ya'abá to chi'i weje, na' žaze' ḻo nisen', na' ẕte' nisen'. Benne' nežw, benne' chejchoé'e ḻo nisen' kate' ẕdan, yeyaktie' kan nak bíte'teze yižwé' da' de'e.

⁵Zoa to benne' ga na', ba zej chino' chonne žoa yiz de'e yižwé'.

⁶Katen' Jesusen' bḻe'ele' benne' yižwén' die' ga na', wnnezle' ba zej zan yiz de'e yižwén', na' wnnable' ḻe', na' wnné': —¿Žénelo' yeyako'?

⁷Bechebe benne' yižwén', na' gože' Jesusen': —Benne', bi zoa no benne' wtinne' neda' ḻo nisen' kate' ẕdan. Kate' ne zeyá'a neda', žo'o benne' yoble zga'ale' ka neda'.

⁸Jesusen' gože' ḻe': —Wyase. Beywá' dan' delon', na' beyéj.

⁹Ḻa' beyakte bennen', na' beywé'e da' góta'len', na' beyeje'. Ža na' gok da' ni naken ža la'y chegak benne' judío ka'.

¹⁰Naž benne' judío wnná bia' ka' belyi'e bennen' beyake', na' wnnágake': —Ža la'y naken na'a. Bi žaḻa' go'o da' žáte'lon'.

¹¹Bechebe bennen', na' gože' ḻégake': —Bennen' beyone' neda' gožkze' neda', na' wnné': “Beywá' dan' delon', na' beyéj.”

¹²Naž wnnábgekle' ḻe', na' wnnágake': —¿Noẕ bennen' gože' le': “Beywá' da' delon', na' beyéj”?

¹³Bennen' beyake' bi nnezle' noẕen', dan' ba bezá' Jesusen' ḻo latjen' dan' zej nnita' benne' zan ga na'.

¹⁴Wdé gok da' ni, Jesusen' bejx̱ake'e bennen' gan nak ḻo ẕchil yodo', na' gože' ḻe': —Bwia nga. Ba beyako'. Biž gono' doḻa', nich bi gak chio' to da' nakže zi' ka dan' goken chio'.

¹⁵Wyéj bennen', na' bejzenle' benne' judío wnná bia' ka', Jesusen' beyone' ḻe'.

¹⁶Che ḻen bwíagak benne' judío wnná bia' ka' da' žon Jesusen', na' gónegekle' gótgake' Ḻe', dan' žone' da' ki kate' nak ža la'y chégake'.

¹⁷Bechebe Jesusen', na' gože' ḻégake': —X̱a' žónteze' žin, na' ḻezka' neda' žona' žin.

¹⁸Che ḻen gónežegekle benne' judío wnná bia' ka' gótgake' Jesusen', kégeze dan' bi žape' ža la'y chégake' ba la'ne, san ḻezka' dan' wnné' nak Dios X̱akze', na' ki naken, žon kwine' Dios.

¹⁹Naž bechebe Jesusen', na' gože' ḻégake': —Da' li žapa' ḻe'e. Bi be gak gona' neda', Ẕi'n Dios, žakze chia', san toze dan' ẕḻe'ela' žon X̱ažo Dios. Yógo'te da' žon X̱ažo Dios, ḻezka' žona' neda', Ẕi'ne'.

²⁰X̱ažo Dios nži'ile' neda', Ẕi'ne', na' ẕḻoe'ele' neda' yógo'te da' žone', na' da' ẕénḻe'eže ka' ka da' ni wḻoe'ele' neda', da' ka' góngaken ga yebán ḻáže'le ḻe'e.

²¹Kan žon X̱ažo Dios, žesbane' benne' gat ka', na' žonne' yeḻa' nban chégake', ḻezka' žona' neda', Ẕi'ne', ẕneẕjwa' yeḻa' nban chégake' kan žénekzela'.

²²X̱ažo Dios bi ẕchi'a ḻaže'e nitó benne', san ba bdie' ḻo na'a neda', Ẕi'ne', yógo'te yeḻa' wnná bia' nich wchi'a ḻaža'a benách ka'.

²³Ki naken nich gápegak yógo'te benách ka' neda', Ẕi'ne', ba la'ne, kan žápegake' X̱ažo Dios ba la'ne. Nóte'teze benne' bi žape' neda', Ẕi'ne', ba la'ne, bi žape' ba la'ne X̱ažo Dios, Bennen' bseḻe'e neda', Ẕi'nen'.

²⁴’Da' li žapa' ḻe'e. Nóte'teze benne' ženle' da' ẕchaḻja', na' žejḻi'e che X̱ažo Dios, Bennen' bseḻe'e neda', benne' ni de yeḻa' nban da' zejlí kanne chie', na' bi nžog chie' gate', san nake' ka to benne' ba bebane' ḻo yeḻa' got dan' ba de yeḻa' nban da' zejlí kanne chie'.

²⁵Da' li žapa' ḻe'e, za' ža, na' ba ẕžin ža na', kate' benne' gat ka' yéngekle' chi'a neda', Ẕi'n Dios, na' benne' ka' yéngekle' x̱tiža'a, na' góngake' kan ẕnnan, gata' yeḻa' nban chégake'.

²⁶Kan yo'o ḻo na' X̱ažo Dios wneẕjwe' yeḻa' nban chegak benách ka', ḻezka' bdie' ḻo na'a neda', Ẕi'ne', wneẕjwa' yeḻa' nban chegak benách ka'.

²⁷Ḻezka' bdie' ḻo na'a yeḻa' wnná bia' nich wchi'a ḻaža'a benách ka' dan' naka' Benne' Golje' Benách.

²⁸Bi yebán ḻáže'le kan nak da' ni, dan' za' ža kate' yógo'te benne' gat ka' yéngekle' chi'a,

²⁹na' yežójgake' ḻo yežw ba ka'. Yebangak benne' ka', benne' béngake' da' nak chawe', na' gata' yeḻa' nban chégake', san benne' ka' béngake' da' ẕinnj, yebángake', na' chog Dios chégake' gátgake' to chi'ize.

³⁰Ḻezka' wnná Jesusen': —Bi be gak gona' nedza'. Kan nak da' ženla' da' ẕchaḻj X̱a', ki ẕchi'a ḻaža'a, na' kan ẕchi'a ḻaža'a naken chawe', dan' bi žona' kan žénezela' neda', san kan žénekzele X̱a', Bennen' bseḻe'e neda'.

³¹Cha' neda' ẕchaḻja' chia' kwinza', bi zaka' dan' ẕchaḻja'.

³²Zoa Benne' yoble, Benne' ẕzoa lie' kan naka' neda', Bennen' nake' X̱a', na' nnezla' zaka' da' ẕzoa lie' kan nak chia'.

³³Ḻe'e bséḻa'le benne' ka' bejnnábgekle' Ẕwa, bennen' bezóe' benách ka' nis, na' dan' bzoa lie' kan nak chia' naken dot da' li.

³⁴Neda' bi žiážjela' no benne' wzóa lie' kan nak chia', san ẕnnia' da' ki nich yelale ḻe'e.

³⁵Da' bchaḻj Ẕwan' goken ka to yi' yež, da' wyeyen, na' wza'nín', na' ḻe'e, to chí'ido'ze wyáz ḻáže'le si'le baní' chien'.

³⁶Na'a, zoa da' ẕzoa li kan nak chia' neda' da' záka'žen ka dan' bzoa li Ẕwan' kan nak chia'. Da' ka' bde X̱ažo Dios ḻo na'a gona', da' ka' žona', na' da' ka' ẕzoa lígaken kan nak chia', na' zej nak bian' X̱ažo Dios bseḻe'e neda'.