ẔWA 4:8-25

⁸Jesusen' zoe' toze' dan' ba zjak benne' wsedle chie' ka' ḻo yežen' nich chejx̱í'gake' bi da' gáwgake'.

⁹Naž no'le Samaria na' gože' Jesusen', na' wnné': —¿Ẕnnablo' Le' neda' da' ye'jo', na' nako' benne' judío? Neda' naka' no'le Samaria. Ki wnné' dan' benne' judío ka' bi de chawe' benách Samaria ka'.

¹⁰Bechebe Jesusen', na' gože' ḻe': —Chela' nónbi'o da' žonn Dios, na' no Bennen' ži'e le': “Benn da' ye'ja'” na' le' nnablo' Ḻe', na' Ḻe' gonne' chio' nis da' gonnen yeḻa' nban.

¹¹Naž no'len' gože' Ḻe', na' wnné': —Benne', bi no'o da' kwéjḻeno' nis, na' že'lte žia nis ni. ¿Gaẕ za' nisen' dan' žonnen yeḻa' nban?

¹²¿Nakžo' Le' ẕen ka Jakob, x̱a wdé chežo, bennen' benne' cheto' yežw nis ni, ga ni wẕi'e nis da' we'je', na' da' we'jgak ẕi'ne' ka', na' da' we'jgak bia beže chie' ka'?

¹³Bechebe Jesusen', na' wnné': —No benne' ye'je' nis ni, da' yoble nnan ye'jen',

¹⁴san nóte'teze benne' ye'je' nisen' da' wneẕjwa' neda', biž nnan ye'jen', dan' wneẕjwa' chie' nisen' da' gaken ḻo yichj ḻáẕda'we' ka to gan žal nis, da' gonnen yeḻa' nban da' zejlí kanne chie'.

¹⁵Naž no'len' gože' Ḻe', na' wnné': —Benne', benn chia' nisen', nich biž bil-la', na' biž yedjx̱i'a nis nga.

¹⁶Jesusen' wnné': —Wyéj, bejḻíž benne' byo chio', na' le da ga zoa' ni.

¹⁷Beží'i no'len', na' gože' Ḻe': —Bi zoa benne' byo chia'. Naž Jesusen' wnné': —Da' likze ẕnno': “Bi zoa benne' byo chia'”

¹⁸dan' ba wzóaḻeno' gayo' benne' byo ka', na' benne' byon' zóaḻeno'-ne' na'a, bi nake' benne' byo chio'. Da' ni ẕnno', da' likze ẕnno'.

¹⁹Naž no'len' gože' Ḻe', na' wnné': —Benne', žekla' neda' nako' benne' ẕchaḻje' ḻo wláz Dios.

²⁰X̱a x̱to'to' ka' bka'n ẕéngake' Dios ḻaw ya'a nga, san ẕnnale ḻe'e yež Jerusalén naken ga žaḻa' wká'n ẕengak benách ka' Dios.

²¹Jesusen' wnné': —No'le, bejḻé' da' ẕnnia'. Za' ža katen' wká'n ẕenle X̱ažo Dios ḻa'kze bi yedjsoale ḻaw ya'ado' ni, na' ḻezka' bi chejsoale ḻo yež Jerusalén.

²²Ḻe'e ẕka'n ẕenle Bennen' bi nónbia'le-ne', san neto' nónbia'to' Bennen' ẕka'n ẕento', dan' ben Dios chie' gata' yeḻa' žeslá ni'a chegak benne' judío ka'.

²³Na'a, za' ža, na' ba zoažo ža na', kate' benne' ka' da' li wká'n ẕéngake' Dios, wká'n ẕéngake' Ḻe', zoaḻen Dios Be' La'y, na' da' nak dot da' li, ḻégake', dan' žénele X̱ažo Dios wká'n ẕengak benne' ka' Ḻe' ki.

²⁴Dios nake' Be', na' benne' ka' ẕka'n ẕéngake' Ḻe', žon byenen wká'n ẕéngake' Ḻe', zoaḻen Dios Be' La'y, na' da' nak dot da' li, ḻégake'.

²⁵Naž no'len' gože' Ḻe', na' wnné': —Nnezla' žaḻa' ḻa' Benne' Mesías, (da' ẕnnan: “Benne' Criston'”). Kate' ḻe'e Ḻe', wḻoe'ele' žo'o yógo'te.