ẔWA 4:26-43

²⁶Jesusen' wnné': —Ḻekze' ẕcháḻjḻene' le'.

²⁷Ḻa' na'ze bežingak benne' wsedle ka' che Jesusen' ga na', na' bebán ḻáže'gekle' dan' ẕcháḻjḻene' to no'le, san nitóe' bi bežogle' nnable' Ḻe', bi nne': “¿Biẕ ẕnnablo' ḻe'?” o “¿Biẕ da' ẕcháḻjḻeno' ḻe'?”.

²⁸Naž no'len' bka'ne' že'e chie' ga na', na' beyeje' ḻo yež, na' gože' benne' ka' nníta'gake' ga na',

²⁹na' wnné': —Le da, ḻé'elele to benne' gože' neda' yógo'te da' ba bena'. ¿Nakkze' Ḻe' Benne' Criston'?

³⁰Naž bžojgak benne' ka' ḻo yežen', na' bžíngake' gan zoa Jesusen'.

³¹Kate' ne zej no'len', benne' wsedle ka' che Jesusen' ben byéngake', na' belyi'e Ḻe': —Benne' Wsedle, bdaw.

³²Jesusen' gože' ḻégake': —De to da' žawa', da' bi nónbia'le.

³³Naž benne' wsedle chie' ka' belnnable' ljéžgake' toe' yetóe', na' wnnágake': —¿Noẕ benne' ba bedjwé'e da' bdawe'?

³⁴Naž Jesusen' gože' ḻégake': —Da' nbánḻena' naken gona' da' žénele X̱a', Bennen' bseḻe'e neda', na' yeyóž gona' x̱chine'.

³⁵Ki ẕnnale ḻe'e: “Yetáp byo' žin ža ḻapžo.” Neda' žapa' ḻe'e: le wía na'le, na' wíale benách ka' zej nake' ka gan goz Dios, da' ba nbižen nich chejḻapžon.

³⁶Bennen' ẕḻape' ẕzi'e laẕjwe', na' dan' ẕḻapen', naken nich gata' yeḻa' nban da' zejlí kanne chegak benách ka', nich gak yebégekle tẕen benne' žazen', na' benne' ẕḻapen'.

³⁷Nak dot da' li da' ẕnnan: “To benne' žaze', na' yetóe' ẕḻape'.”

³⁸Neda' bseḻa'a ḻe'e chejḻaple gan bi gozle. Benne' yoble gozen', na' ḻe'e ẕzi'le da' žonn žin na' da' bene'.

³⁹Benne' zan, benne' Samaria ka', benne' nníta'gake' ḻo yež Sikar na', bejḻé'gake' che Jesusen' ni'a che x̱tiža' no'len', dan' bchaḻje' kan nak chie', na' wnné': “Gože' neda' yógo'te da' ba bena'.”

⁴⁰Kate' bžingak benne' Samaria ka' gan zoa Jesusen', góta'yoegekle' Ḻe' gá'nḻene' ḻégake'. Yechóp ža bga'n Jesusen' ga na'.

⁴¹Ka' goken, benne' zanže bejḻé'gake' che Jesusen' ni'a che da' bchaḻjkze' Ḻe'.

⁴²Naž benne' ka' belyi'e no'len', na' wnnágake': —Na'a žejḻe'to' chie', kégeze ni'a che da' bchaḻjo' le', san ḻezka' dan' benlto' neto' chie' Ḻe', na' nnezlto' da' li Bennen' nake' Benne' Criston', Bennen' žeslé' benách ka' nníta'gake' yežlyó nga.

⁴³Yechóp ža ka', bezá' Jesusen' gan nbab Samaria, na' wyeje' gan nbab Galilea.