ẔWA 21:4-24

⁴Kate' za' ža'ní', bejsé Jesusen' žoa'a nisdon', na' benne' wsedle chie' ka' bi gókbe'egekle' cha' Jesusen'.

⁵Naž Jesusen' gože' ḻégake': —Ẕí'na'do' ka', ¿bi de bel chele? Beží'igake', na' belyi'e Ḻe': —Nitoba'.

⁶Naž Jesusen' gože' ḻégake': —Le wsé yix̱jw bel chele cheḻá'a ḻi ža barkwn', na' senle-ba'. Naž bségaken', na' biž gok yeká'agaken', dan' nža'te yix̱jw na' bel ka'.

⁷Naž benne' wsedle, bennen' nži'il Jesusen', gože' Bedon', na' wnné': —¡X̱anžon'! Kate' benle Smon Bedon', “X̱anžon'” beyakwe' laže' gokwe', da' beké'en zga'ale, na' wyaze' ḻo nis.

⁸Yezika' benne' wsedle ka' bsá'gake' barkwn', na' bedjẕóbgake' yix̱jwn' dan' nža'ten bel ka'. Bi nak zi'to' gan de yo biž, da' nakze ka to gaywá' lka' ní'ažo.

⁹Katen' bžíngake' ḻo yo bižen', na' bḻé'egekle' že' to yi' balje ga na', na' ẕoa to bel ḻawen', na' ḻezka' de yet ga na'.

¹⁰Jesusen' gože' ḻégake': —Le yedjwá' bel ka' ba wẕéngakle-ba' ga zoa' ni.

¹¹Bebén Bedon' ḻo barkwn', na' wẕobe' yix̱jwn' zaka' ḻo yo bižle, na' nža'ten bel ži'a ka', to gaywá' chonne-yonba'. Ḻa'kze zej nak bel zanḻe'e, bi bžeza' yix̱jwn'.

¹²Naž Jesusen' gože' ḻégake': —Le da gawle. Nitó benne' wsedle chie' bi bežogle' nnable' Ḻe', bi nne': “¿Noẕ Le'?” Nnézkzegekle' nake' X̱anžon'.

¹³Naž wbiga' Jesusen', na' bex̱we' yet ka', na' ḻezka' bel na', na' bi'en chégake'.

¹⁴Da' ni naken da' chonne chi'i bḻoe'e ḻaw Jesusen' ḻawgak benne' wsedle chie' ka' wdé bebane' ḻo yeḻa' got.

¹⁵Kate' beyóž bdáwgake', Jesusen' gože' Smon Bedw: —Smon, ẕi'n Jonás, ¿nží'iželo' neda' kan zej nži'il benne' ki neda'? Bechebe Bedon', na' gože' Ḻe': —O', X̱an. Le' nnézkzelo' nži'ila' Le'. Jesusen' gože' ḻe': —Bwaw ẕíla'do' chia' ka'.

¹⁶Jesusen' gože' ḻe' da' chope chi'i, na' wnné': —Smon, ẕi'n Jonás, ¿nži'ilo' neda' dot ḻažo'o? Bechebe Bedon', na' gože' Ḻe': —O', X̱an. Le' nnézkzelo' nži'ila' Le'. Jesusen' gože' ḻe': —Bwaw ẕila' chia' ka'.

¹⁷Jesusen' gože' ḻe' da' chonne chi'i: —Smon, ẕi'n Jonás, ¿nži'ilo' neda'? Gok nyache' ḻaže' Bedon' dan' chonn chi'i wnnable' ḻe', na' wnné': “¿Nži'ilo' neda'?” na' bechebe Bedon', na' gože' Ḻe': —X̱an, yógo'te nnézkzelo' Le'. Nnezlo' nži'ila' Le'. Jesusen' gože' ḻe': —Bwaw ẕila' chia' ka'.

¹⁸Da' li žapa' le', katen' goko' x̱kwide', žakze chio' bwakw kwino', na' kan ẕnnazen chio' wdó'. Kate' golo', wḻío' no'o, na' benne' yoble wakwe' le' laže', na' chi'e le' gan bi yénelo' chejo'.

¹⁹Da' ni wnná Jesusen' nak bian' kan gat Bedon', dan' chejté'e ḻe'e yag kroze, nich ga'n ẕen Dios. Kate' beyóž wnná Jesusen' ki, yetó da' wnné': —Benḻen neda' tẕen.

²⁰Byechj Bedon', na' bḻe'ele' benne' wsedlen' Jesusen' nži'ile' ḻe', zedjnawe' ḻégake'. Nake' benne' wsedlen' wži'e kwit Jesusen' katen' bdáwgake', na' gože' Jesusen': “X̱an, ¿noẕ bennen' wdíe' Le'?”

²¹Kate' Bedon' bḻe'ele' ḻe', gože' Jesusen': —X̱an, ¿biẕ gon benne' ni?

²²Jesusen' gože' ḻe': —Cha' žénela' ga'n bennen' kate' yeḻa'ža', bi žaḻa' gek zedlo'. Benḻen neda' tẕen le'.

²³Wzé diža' ni gan zej nnita' lježžo ka', benne' ka' žejḻé'gake' che Jesusen'. Žékgekle' bi gat benne' wsedlen'. Jesusen' bi gože' ḻe' bi gate', san ki wnné': “Cha' žénela' ga'n bennen' kate' yeḻa'ža', bi žaḻa' gek zedlo'.”

²⁴Benne' wsedlen' naka' neda', Ẕwa. Ẕzoa lia' da' ki, na' bzoja' ḻe'e yiche da' ki, na' nnézlele da' ẕnnia' naken dot da' li.