ẔWA 20:11-27

¹¹Bga'n Lia kwitle yežw ban', na' ẕbeže'. Kate' ne ẕbeže', byechwe', na' bwie' ḻo yežw ban'.

¹²Bḻe'ele' chope wbás che ya'abá che Dios nníta'gake' ga na', na' zej nakwe' laže' chich. Žé'gake' ga na', toe' yichjle yežw ban', na' yetóe' x̱ní'ale yežw ban' gan wló'ogake' Jesusen'.

¹³Wbás che ya'abá ka' belyi'e ḻe', na' wnnágake': —Nó'ledo', ¿biẕ chen' ẕbežo'? Lian' gože' ḻégake': —Dan' beká'agake' X̱ana', na' bi nnezla' gan wló'ogake' Ḻe'.

¹⁴Kate' beyóž wnné' ki, bwie' x̱kóže'le', na' bḻe'ele' Jesusen', zoe' ga na', san bi gókbe'ele' cha' Jesusen'.

¹⁵Naž Jesusen' gože' ḻe': —Nó'ledo', ¿biẕ chen' ẕbežo'? ¿Noẕ benne' žeyiljo'? Dan' žekle Lian' nake' Ḻe' benne' žape chi'e yežlyón', na' gože' Ḻe': —Benne', cha' le' bebejo'-ne', bḻoe'el neda' gan wló'o-ne', na' neda' yeyoá'a-ne'.

¹⁶Naž Jesusen' gože' ḻe': —Lia. Naž byechj Lian', na' ḻen diža' hebreo gože' Ḻe': —Raboní. Diža' hebreo ni ẕnnan: “Benne' Wsedle chia'.”

¹⁷Jesusen' gože' ḻe': —Bi kano' neda', dan' bi na' yeyepa' gan zoa X̱a'. Na'a, wyéj gan zej nnita' benne' ljéža'do' ka', na' gož-gake': “Ki wnná Jesusen': yeyepa' gan zoa X̱a', na' ḻezka' nake' X̱ale. Nake' Dios chia', na' Dios chele.”

¹⁸Naž wyéj Lia Madlen', na' bejzenle' benne' wsedle ka' che Jesusen' ba beḻe'ele' X̱anžon', na' kan nak dan' wnné'.

¹⁹Kate' ba goḻe ža na', da' naken ža nežw, zej ndobe benne' wsedle ka' che Jesusen', na' nyejw yo'o gan nníta'gake' dan' ẕžébegake' benne' judío wnná bia' ka'. Naž bḻoe'e ḻaw Jesusen' gachje ḻáwe'le gan nníta'gake', na' gože' ḻégake': —Ga'n ži yichj ḻáẕdo'le.

²⁰Kate' beyóž gože' ḻégake' da' ni, bḻoe'ele' ḻégake' ne'e, na' ḻe'el sine'e. Naž bebégekle benne' wsedle chie' ka' dan' žeḻé'egekle' X̱anžon'.

²¹Naž Jesusen' gože' ḻégake' da' yoble, na' wnné': —Ga'n ži yichj ḻáẕdo'le. Kan ben X̱a', bseḻe'e neda', ḻezka' žseḻa'a ḻe'e chjenle x̱china'.

²²Kate' beyóž wnné' da' ni, blobe' ḻáwgake', na' gože' ḻégake': —Le si' ḻo na'le Dios Be' La'y.

²³No benne' yenít ḻawle, bennen' ben doḻa', ba yo'o yeḻa' ženít ḻaw chie', na' no benne' bi yenít ḻawle ḻe', ga'n doḻa' da' nbaga' benne' wen doḻan'.

²⁴Mas bi wzóaḻene' ḻégake' katen' Jesusen' bedjwíe' ḻégake'. Nak Masen' to benne' chežinnoe' ka', na' ḻezka' lie' Benne' Kwach.

²⁵Wdé na' yezika' benne' wsedle ka' belyi'e Masen', na' wnnágake': —Ba bḻe'elto' X̱anžon'. Masen' gože' ḻégake': —Cha' bi ḻe'ela' ne'e gan bdin bdidjwn', na' wdía' x̱ben na'a gan bdin bdidjwn', na' wdía' na'a ḻe'el sine'e gan bdin yag ntochen', bi chejḻi'a.

²⁶Kate' ba gok yex̱ono' ža, benne' wsedle chie' ka' zej ndobe' da' yoble ḻo yo'on', na' zoaḻen Masen' ḻégake'. Ḻa'kze nyejw yo'o gan nníta'gake', bḻoe'e ḻaw Jesusen' gachje ḻáwe'le gan nníta'gake', na' gože' ḻégake': —Ga'n ži yichj ḻáẕdo'le.

²⁷Naž Jesusen' gože' Masen', na' wnné': —Bde x̱ben no'o nga, na' bwia na'a nga. Bde no'o ḻe'el sina'a nga, na' biž gak chope ḻažo'o, san bejḻé' chia'.