ᤛᤣ᤺ᤰᤕᤢᤰᤔᤡᤒᤠᤜᤠ᤹ 5:32-34

³²ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ᤺ᤱᤃ ᤀᤠᤏᤡᤃᤧ ᤘᤕᤡᤃᤧᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤜᤠ᤹ ᤐᤡᤖᤢᤛᤡᤒᤠ ᤛᤣᤛᤣᤔᤠᤱᤅᤡᤴᤏᤠᤱ ᤋᤥ᤺ᤴᤍᤡ ᤘᤠ᤹ᤖᤥ॥”

³³ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤈᤢᤶᤓᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤛᤠᤰᤁᤧᤴ ᤐᤥᤃᤧᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥

³⁴ᤁᤖ ᤂᤧᤵᤔᤥ ᤛᤠᤶᤕᤥᤌᤡᤶᤛᤠᤶᤒᤠ ᤏᤢ ᤁᤠᤰ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤃᤔᤠᤗᤡᤕᤗ ᤔᤧᤵᤔᤏᤠᤒᤠ ᤑᤖᤡᤛᤡ᤺ᤴ ᤕᤧᤶᤛᤡᤱᤅᤠᤱ ᤂᤧᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤵᤑᤠᤎᤡᤰ ᤗᤠ᤺ᤰᤁᤠᤳ ᤐᤠᤱᤄᤢᤛᤡ॥