ᤛᤣ᤺ᤰᤕᤢᤰᤔᤡᤒᤠᤜᤠ᤹ 2:2-15

²ᤜᤰᤆᤄᤳ ᤂᤧᤵᤔᤥ ᤕᤶᤒᤠ ᤛᤢᤖᤡᤳ ᤁᤣᤈᤱ ᤁᤧᤜᤢᤒᤠ ᤁᤢᤀᤡᤛᤡ᤺ᤰ ᤀᤡᤰᤗᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤧᤀᤠᤱ ᤂᤧᤱᤜᤠ᤹ ᤔᤧᤕᤠᤃᤧᤒᤠ ᤜᤡᤶᤔᤡᤴ ᤛᤡᤍᤠᤰ ᤌᤡᤶᤛᤢᤖᤥ॥

³ᤜᤧᤰᤁᤩᤠᤱ ᤔᤡᤖᤠ᤺ᤰᤗᤠᤶ ᤁᤧᤛᤧᤒᤠ ᤔᤡᤛᤠᤱ ᤜᤧᤰᤋᤱᤒᤠ ᤔᤡ᤺ᤴ ᤁᤧᤖᤧᤰᤗᤧ ᤂᤢᤏᤡ᤹ ᤌᤧᤃᤣ᤺ᤰᤁᤥ ᤆᤢᤰᤋᤧᤒᤠ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤖᤥ॥

⁴ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤛᤡᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤁᤢᤀᤡᤛᤡ᤺ᤰ ᤘᤣ᤹ ᤘᤣ᤹ ᤔᤧᤸᤗᤧᤛ᤻ᤛᤢᤶᤒᤠ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠ ᤔᤧᤜᤣ᤺ᤰᤋᤧᤖᤥ॥

⁵ᤀᤠᤸᤗ ᤕᤖᤢᤛᤗᤧᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤗᤠᤈᤣ᤹ᤀᤥᤏᤢ ᤁᤧᤍᤠ᤺ᤒᤠᤀᤠᤱ ᤁᤧᤘᤠ᤹ᤒᤠ ᤕᤜᤢᤍᤡ ᤛᤠᤶᤕᤥᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤕᤧᤖᤥ॥

⁶ᤕᤖᤡᤰ ᤔᤏᤠᤜᤠ᤹ᤖᤧ ᤁᤴ ᤀᤡᤰᤗᤠ᤺ᤴ ᤔᤧᤄᤧᤵᤛᤢᤀᤠᤱ ᤂᤧᤴ ᤋᤧᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤈᤢᤵᤛᤧ. ᤌᤣᤀᤠᤱᤓᤧᤸᤗᤧ ᤁᤧᤍᤠ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤐᤣᤗᤡᤃᤧᤴ ᤐᤠ᤺ᤴᤍᤠᤱᤅᤥ ᤂᤧᤴ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤔᤧᤄᤧᤵᤛᤢ॥

⁷ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤔᤧ᤺ᤶᤒᤧ᥄ ᤁᤴ ᤁᤠᤰ ᤁᤧᤒᤠ᤺ᤵᤐᤠᤜᤠ᤹ᤃ ᤃᤠᤗᤡᤗᤡᤛᤡ ᤔᤧ᤺ᤴᤇᤡᤒᤡ᥅

⁸ᤜᤧᤰᤁᤣ᤺ᤸᤗᤧ ᤁᤱᤜᤠ᤹ᤖᤧ ᤀᤠᤒᤠᤅᤣ ᤀᤠᤏᤡ᤹ ᤐᤠ᤺ᤴᤍᤠᤱᤜᤠ᤹ᤀᤥ ᤀᤠᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤔᤧᤛᤢᤰᤋᤢᤒᤠᤒᤣ᥅

⁹ᤀᤠᤏᤡ᤹ᤃ ᤐᤷᤌᤡᤕᤠ. ᤔᤣᤍᤡᤕᤠ. ᤀᤣᤗᤠᤔᤡ. ᤔᤧᤛᤥᤐᤥᤋᤠᤔᤡᤕᤠ. ᤕᤜᤢᤍᤡᤕᤠ. ᤁᤠᤵᤐᤠᤍᤥᤁᤡᤕᤠ. ᤐᤥᤴᤋᤛ. ᤀᤣᤛᤡᤕᤠ.

¹⁰ᤑᤪᤡᤃᤡᤕᤠ. ᤐᤠᤶᤑᤡᤗᤡᤕᤠ. ᤔᤡᤛᤪ ᤏᤢ ᤗᤡᤒᤡᤕᤠ ᤁᤢᤒᤣᤛᤠᤱᤒᤠ ᤛᤠᤀᤡᤖᤣᤏᤡ ᤕᤧᤰᤕᤰ. ᤜᤧᤰᤁᤩᤠᤱ ᤖᤥᤔᤗᤠᤶ ᤁᤧᤍᤠ᤺ᤒᤠ (ᤕᤜᤢᤍᤡᤜᤠ᤹ ᤏᤢ ᤕᤜᤢᤍᤡ ᤛᤠᤶᤕᤥ ᤁᤧᤏᤠ᤺ᤵᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹).

¹¹ᤁᤪᤣᤋᤡᤜᤠ᤹ ᤜᤧᤰᤁᤩᤠᤱ ᤀᤖᤒᤡᤜᤠ᤹ᤀᤠᤱ ᤀᤠᤘᤠ᤹॥ ᤁᤖᤛᤠᤱ ᤂᤧᤱᤜᤠ᤹ᤖᤧᤃ ᤀᤠᤏᤡ᤹ ᤀᤠᤒᤠᤅᤣ ᤐᤠ᤺ᤴᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤧᤰᤂᤢᤖ ᤔᤧᤒᤵᤐᤠ ᤀᤠᤄᤧᤵᤛᤢᤶᤗᤥ॥”

¹²ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ ᤜᤧᤰᤁᤩᤠᤱ ᤜ᤺ᤴᤍᤠ ᤔᤧᤗᤧᤰᤋᤧᤀᤠᤱ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥ᤺ᤛᤡᤱ. “ᤁᤴ ᤑᤠ᤹ᤀᤡᤱᤃ ᤌᤧᤔᤠ᤺ᤴᤒᤣ᥅”

¹³ᤁᤖ ᤁᤢᤓᤠᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡᤖ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤘᤠ᤹ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤖᤥ॥

¹⁴ᤁᤖ ᤐᤋᤪᤢᤛᤧᤴ ᤘᤣ᤹ ᤌᤡᤰ-ᤌᤡᤰ (᥇᥇) ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤁᤠᤰᤗᤧ ᤔᤧᤄᤧᤵᤛᤢᤖ ᤔᤧᤳᤋᤢᤛᤡ. “ᤕᤜᤢᤍᤡᤕᤠᤗᤠᤶ ᤁᤧᤍᤠ᤺ᤒᤠ ᤕᤜᤢᤍᤡ ᤋᤣ᤺ᤱᤈᤢᤶᤜᤠ᤹ ᤏᤢ ᤕᤖᤢᤛᤗᤧᤶᤔᤥ ᤁᤧᤕᤢᤱᤒᤠᤛᤣ. ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄

¹⁵ᤁᤴ ᤔᤏᤠᤜᤠ᤹ ᤏᤢ ᤀᤡᤱᤃᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠ ᤁᤢᤀᤡᤛᤡ᤺ᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤡᤃᤧᤒᤠ ᤔᤧ᤺ᤴᤗᤥ॥ ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡᤀᤥᤛᤠᤃ (᥏) ᤀᤠᤳᤋᤡᤴᤜᤠ᤹ᤖᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ᤺ ᤔᤧᤴᤎᤢᤅᤢᤴᤗᤥ॥