ᤛᤣ᤺ᤰᤕᤢᤰᤔᤡᤒᤠᤜᤠ᤹ 2:12-34

¹²ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ ᤜᤧᤰᤁᤩᤠᤱ ᤜ᤺ᤴᤍᤠ ᤔᤧᤗᤧᤰᤋᤧᤀᤠᤱ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥ᤺ᤛᤡᤱ. “ᤁᤴ ᤑᤠ᤹ᤀᤡᤱᤃ ᤌᤧᤔᤠ᤺ᤴᤒᤣ᥅”

¹³ᤁᤖ ᤁᤢᤓᤠᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡᤖ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤘᤠ᤹ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤖᤥ॥

¹⁴ᤁᤖ ᤐᤋᤪᤢᤛᤧᤴ ᤘᤣ᤹ ᤌᤡᤰ-ᤌᤡᤰ (᥇᥇) ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤁᤠᤰᤗᤧ ᤔᤧᤄᤧᤵᤛᤢᤖ ᤔᤧᤳᤋᤢᤛᤡ. “ᤕᤜᤢᤍᤡᤕᤠᤗᤠᤶ ᤁᤧᤍᤠ᤺ᤒᤠ ᤕᤜᤢᤍᤡ ᤋᤣ᤺ᤱᤈᤢᤶᤜᤠ᤹ ᤏᤢ ᤕᤖᤢᤛᤗᤧᤶᤔᤥ ᤁᤧᤕᤢᤱᤒᤠᤛᤣ. ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄

¹⁵ᤁᤴ ᤔᤏᤠᤜᤠ᤹ ᤏᤢ ᤀᤡᤱᤃᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠ ᤁᤢᤀᤡᤛᤡ᤺ᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤡᤃᤧᤒᤠ ᤔᤧ᤺ᤴᤗᤥ॥ ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡᤀᤥᤛᤠᤃ (᥏) ᤀᤠᤳᤋᤡᤴᤜᤠ᤹ᤖᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ᤺ ᤔᤧᤴᤎᤢᤅᤢᤴᤗᤥ॥

¹⁶ᤁᤖ ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤀᤣᤗᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ–

¹⁷‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤀᤡᤱᤃᤠ᤹ ᤀᤠᤛᤣᤛᤣᤔᤠᤱᤅᤡᤴ ᤁᤠᤰ ᤔᤧᤴᤇᤠᤶᤃᤧᤴ ᤛᤢᤘᤠᤱ ᤛᤶᤍᤠᤱ ᤐᤠᤱᤄᤢᤱᤅᤠᤱ ᤂᤡᤏᤡ᤹ ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ᤛᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠ᤺ᤳᤋᤢ᤹. ᤂᤡᤏᤡ᤹ ᤏᤠᤗᤡᤱᤃᤧᤴ ᤌᤠᤱᤒᤧᤴᤛᤠᤜᤠ᤹ᤖᤧ ᤛᤢᤑᤥ ᤔᤧᤏᤡ᤺ᤛᤢ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤍᤠᤰᤔᤡᤜᤠ᤹ᤖᤧ ᤋᤠᤍᤡᤃᤧᤴ ᤛᤧᤵᤔᤠᤱ ᤔᤧᤔᤠᤰᤋᤢ᤹ᤖᤥ॥

¹⁸ᤂᤧᤴ ᤕᤧᤴᤜᤠ᤹ᤀᤥ ᤀᤡᤱᤃᤠ᤹ ᤀᤠᤛᤣᤘᤠ ᤁᤧᤈᤥ᤺ᤰᤐᤠ ᤁᤧᤈᤥ᤺ᤰᤔᤠᤜᤠ᤹ᤀᤥ ᤀᤠᤛᤣᤛᤣᤔᤠᤱᤅᤡᤴ ᤐᤠᤱᤄᤢᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠ᤺ᤳᤋᤢ᤹ᤖᤥ॥

¹⁹ᤜᤧᤰᤁᤩᤠᤱ ᤀᤡᤱᤃᤠ᤹ ᤌᤥ ᤋᤠᤱᤛᤠᤰᤐᤥ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤆᤥᤃᤢᤱ ᤜᤧᤰᤁᤩᤠᤱ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤔᤡᤰᤛᤣ᤺ᤴ ᤆᤥᤃᤢᤱ– ᤔᤠᤰᤂᤡ᤹. ᤔᤡ ᤜᤧᤰᤁᤩᤠᤱ ᤜᤠ᤺ᤱᤃᤢᤜᤠ᤺ᤱᤃᤢ ᤁᤧᤗ᤹ᤒᤠ ᤔᤡ᤺ᤰᤂᤢ᤹ᤀᤡᤴ ᤀᤥᤛᤣ᤺ᤴᤎᤠᤰᤏᤡᤱᤗᤥ॥

²⁰ᤜᤧᤰᤁᤩᤠᤱ ᤌᤥ ᤋᤠᤱᤛᤠᤰᤐᤥ ᤏᤠᤶᤔᤡᤸᤗᤧ ᤏᤠᤶᤛᤠᤱ ᤐᤡᤔᤠ ᤗᤧᤖᤢᤀᤠᤱ ᤂᤠᤍᤠᤶᤗᤥ ᤜᤧᤰᤁᤩᤠᤱ ᤗᤠᤒᤠᤴ ᤔᤠᤰᤂᤡ᤹ ᤜᤧᤰᤁᤣ ᤜᤧ᤺ᤳᤗ᤹ᤖᤡᤰ ᤗᤧᤱᤛᤡᤱᤗᤥ॥ ᤁᤴ ᤁᤠᤰ ᤐᤠ᤺ᤴᤜᤠ᤹ ᤍᤠᤱᤒᤠᤴ ᤏᤢ᤺ᤱ ᤕᤢ᤺ᤒᤠ ᤐᤕᤶ ᤕᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤧᤴᤏᤡᤴ ᤋᤠ᤺ᤔᤠᤏᤢ᤺ᤸᤗᤧ ᤋᤃᤡ ᤐᤥ᤺ᤱᤗᤥ॥

²¹ᤜᤧᤰᤁᤩᤠᤱ ᤜᤠ᤺ᤳᤗᤧ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤗᤥ᤺ᤰᤂᤢ᤹ ᤂᤧᤴ ᤋᤠᤱᤛᤧ᤺ᤵᤗᤥ॥’

²²ᤀᤡᤛᤪᤠᤀᤡᤗᤡᤛᤣ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ–ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤔᤡᤰᤛᤣ᤺ᤴᤜᤠ᤹ᤏᤢ ᤂᤡᤏᤡ᤹ ᤗᤢᤶᤔᤥ ᤐᤠᤱᤄᤢᤖᤥ॥ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠᤱᤃ. ᤂᤡᤏᤡ᤹ᤀᤠᤱ ᤁᤧᤏᤡ᤺ᤛᤢᤶᤔᤣᤖᤥ॥

²³ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤏᤡᤱᤛᤣ᤺ᤰ ᤏᤢ ᤋᤃᤡ ᤏᤡᤱᤘᤠ᤹ᤀᤥ ᤜᤧᤰᤁᤣ ᤕᤧᤛᤢ᤺ᤴ ᤂᤡᤏᤡ᤹ ᤜᤢᤰᤁᤥ ᤐᤡᤖᤧᤀᤠᤱ ᤑᤧᤴ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤔᤠᤱ ᤁᤧᤛᤧᤖᤢᤶᤗᤥ॥

²⁴ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡ᤺ᤔᤧᤸᤗᤧ ᤋᤢᤰᤂᤣᤘᤠᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤢᤀᤠᤱ ᤁᤢᤜᤡᤱᤘᤧᤳ ᤆᤥᤃᤢᤖᤥ. ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤸᤗᤧ ᤂᤢᤏᤧ᤹ ᤌᤣ᤺ᤰᤔᤠ ᤔᤧᤛᤢᤰᤋᤢᤴᤗᤥ॥

²⁵ᤍᤠᤀᤢᤍ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤛᤍᤠᤍᤡᤱ ᤀᤡᤱᤃᤠ᤹ ᤀᤠᤴᤍᤠᤱᤒᤧᤱᤃ ᤀᤠᤍᤃᤠᤱ ᤏᤡ᤺ᤛᤢᤱᤗᤥ॥ ᤂᤢᤏᤧ᤹ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤔᤧᤃᤡᤀᤠᤴᤗᤥ॥

²⁶ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤛ᤺ᤳᤋᤠᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤱᤗᤥ॥ ᤏᤠᤛᤡᤱᤃᤧᤴ ᤀᤠᤎᤰᤗᤠᤀᤥ ᤀᤡᤱᤃᤠ᤹ ᤛᤡ᤺ᤀᤠᤛᤠᤱ ᤕᤠᤶᤔᤥ ᤜᤡᤱᤅᤠ ᤁᤧᤗ᤹ᤒᤠ ᤏᤡᤱᤛᤠᤱᤅᤥ ᤜᤠᤱᤜᤠᤱ ᤘᤠ᤹ᤀᤠᤖᤥ॥

²⁷ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤧᤔᤠᤕᤱᤛᤱᤅᤥ ᤐᤰᤁᤧᤴᤎᤏᤧᤴᤗᤥ॥ ᤜᤧᤰᤁᤩᤠᤱ ᤛᤣᤛᤣ ᤁᤧᤛᤣᤘᤠᤖᤥᤒᤠᤸᤗᤧ ᤁᤢᤎᤰᤁᤡᤴ ᤀᤡᤵᤐᤢᤱᤅᤥ ᤁᤡ᤺ᤔᤠ ᤕ᤺ᤵᤔᤠ ᤁᤧᤶᤒᤠᤱᤄᤢᤴᤗᤥ॥

²⁸ᤕᤠᤶᤔᤥ ᤜᤡᤱᤅᤠ ᤑᤠ᤹ᤀᤠᤱ ᤂᤧᤏᤧ᤹ ᤀᤥᤛᤣ᤺ᤴᤃᤧᤎᤠᤰᤋᤠᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤍᤃᤠᤱ ᤘᤠ᤹ᤀᤠᤸᤗᤧ ᤛ᤺ᤵᤔᤠᤸᤗᤧ ᤁᤧᤎᤡᤶᤔᤠ᤹ᤖᤥ॥’

²⁹ᤑᤢ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤡᤱᤃᤠ᤹ ᤏᤡᤛ᤻ᤛᤣᤀᤠᤱ ᤀᤰᤂᤣ ᤐᤠ᤺ᤵᤔᤠ ᤛᤢᤰᤋᤢᤱᤗᤥ–ᤀᤠᤏᤡ᤹ ᤋᤠᤰᤌᤧᤒᤠ ᤍᤠᤀᤢᤍᤧᤱᤃ ᤛᤩᤧ ᤜᤧᤰᤁᤩᤠᤱ ᤔᤧᤗᤢᤵᤋᤢᤀᤠᤱ ᤁᤢᤀᤡᤵᤐᤢᤱᤅᤡᤴ ᤀᤠᤸᤗᤥ ᤌᤠᤖᤡᤰᤁᤠᤱ ᤏᤧᤖᤥ॥

³⁰ᤜᤧᤰᤁᤣᤛᤠᤱ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤆᤥᤃᤧᤒᤠᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤀᤥ ᤒᤠ ᤂᤢᤏᤧ᤹ ᤜᤧᤰᤋᤱᤒᤠ ᤜᤠᤱ ᤐᤥ᤺ᤱ ᤁᤧᤗ᤹ᤒᤠ ᤔᤠᤱᤜᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠᤴ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢ॥

³¹ᤜᤧᤰᤁᤩᤠᤱ ᤍᤠᤀᤢᤍᤖᤧ ᤋᤃᤡᤏᤢᤛᤠ ᤋᤠ᤺ᤴᤍᤡ ᤌᤣ ᤐᤥ᤺ᤱ ᤁᤧᤗ᤹ᤒᤠᤴ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤂᤢᤏᤧ᤹ᤃ ᤂᤧᤔᤠᤕᤱᤛᤱᤅᤥ ᤐᤰᤔᤧᤎᤠᤏᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤡᤴᤏᤠᤱ ᤔᤧᤃᤡᤏᤧᤴᤗᤥ॥’

³²ᤒᤠ ᤁᤴ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤐᤠ᤺ᤴᤏᤥ ᤀᤠᤏᤡᤃᤧ ᤁᤧᤖᤧᤰ ᤁᤧᤏᤡ᤺ᤒᤠ ᤋᤥ᤺ᤴᤍᤡ ᤘᤕᤡᤃᤧᤖᤥ॥

³³ᤜᤧᤰᤁᤩᤠᤱ ᤂᤢᤏᤧ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤰᤂᤢ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤐᤠ᤺ᤗᤠᤶ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤜᤧᤰᤁᤡᤴ ᤂᤥ᤺ᤛᤢᤀᤠᤱ ᤀᤠᤏᤡᤃᤧᤀᤥ ᤌᤠ᤺ᤛᤢᤒᤠᤴ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡ᤺ᤛᤢᤶ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

³⁴ᤍᤠᤀᤢᤍ ᤜᤠᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱ ᤌᤠ᤺ᤱ ᤔᤧᤒᤣᤏᤧᤴᤇᤠᤱ ᤂᤢᤏᤧ᤹ᤃ ᤀᤠᤒᤠᤅᤣ ᤀᤰᤂᤣ ᤐᤠ᤺ᤳᤋᤢ. ᤕᤜᤘᤣ ᤍᤠᤱᤒᤠᤸᤗᤧ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. ‘ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤱᤛᤡᤱᤅᤡᤸᤗ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤅᤧ᤹ᤀᤥ॥’