ᤛᤣ᤺ᤰᤕᤢᤰᤔᤡᤒᤠᤜᤠ᤹ 20:24-32

²⁴ᤁᤖ ᤀᤠᤜᤡᤱᤔᤴᤏᤥ ᤍᤠᤱᤒᤠ ᤕᤧᤛᤢᤖᤧ ᤐᤡᤖᤠᤱᤒᤠ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤛᤢ᤺ᤵᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱᤄᤱ ᤀᤡᤱᤓᤥ᤺ᤔᤠᤀᤠᤱᤎᤥ ᤘᤣ᤹ ᤌᤣᤀᤠᤱ ᤔᤧᤀᤡ᤺ᤳᤋᤢᤱᤅᤡᤴᤗᤥ॥

²⁵ᤀᤠᤸᤗ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤡᤱᤓᤴ ᤆᤥ᤺ᤰᤏᤡᤱᤒᤠ ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡ᤺ᤛᤡᤴ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ॥

²⁶ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤳᤋᤡᤸᤗᤧᤴᤏᤠᤱ ᤔᤧᤰᤔᤠᤸᤗᤧᤴ ᤀᤡᤱᤃᤠ᤹ ᤀᤠᤵᤋᤡᤰ ᤔᤧᤄᤥᤀᤠᤴᤗᤥ ᤑᤠ᤹ᤀᤠᤱ ᤀᤠᤀᤡᤴ ᤀᤡᤱᤃᤠ᤹ ᤔᤧᤳᤏᤡᤱᤗᤥ॥

²⁷ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤏᤡᤱᤛᤣ᤺ᤰ ᤀᤡᤱᤓᤴ ᤆᤥ᤺ᤰᤔᤠ ᤀᤣᤃᤠᤱ ᤔᤧᤶᤒᤵᤐᤧᤴᤗᤥ॥

²⁸ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤡᤏᤡ᤹ ᤗᤰᤐᤧᤴᤏᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤏᤢ᤺ᤖᤡᤰᤁᤠᤱ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤈᤥᤃᤡᤀᤠᤱ ᤘᤠ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤡᤅᤢᤒᤠ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤳᤋᤧᤶᤔᤧ᤹॥

²⁹ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤰᤌᤠᤏᤡᤱᤅᤠᤱᤃ ᤁᤡᤵᤔᤠ ᤁᤧᤄᤢ᤺ᤒᤠ ᤐᤖᤠᤒᤠᤜᤠ᤹ ᤔᤧᤍᤠᤀᤠᤱ ᤔᤧᤸᤗᤢᤰ ᤗᤢᤵᤜᤠ᤹ ᤔᤧᤴᤏᤴᤇᤢᤴᤛᤡᤴᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤢᤶᤔᤥᤀᤣ ᤀᤡᤱᤗᤧᤰᤐᤠ ᤛᤡᤰᤛᤠᤶᤒᤠᤜᤠ᤹ ᤔᤧᤗ᤺ᤴᤏᤠᤱ ᤂᤡᤏᤡ᤹ ᤁᤧᤔᤧᤴᤍᤠᤱᤄᤡᤴ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥

³⁰ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥᤏᤢᤀᤣ ᤀᤡᤱᤗᤧᤰᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤏᤛᤠᤏᤡᤒᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤗᤠᤶ ᤔᤧᤓᤥ᤺ᤳᤋᤢ ᤔᤧᤍᤣ᤹ᤖᤢᤛᤡᤖᤥ॥

³¹ᤜᤧᤰᤁᤣ᤺ᤸᤗᤧ ᤜᤧᤰᤋᤱᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤗᤧᤴᤍᤡᤰ ᤛᤧᤴᤍᤡᤰ ᤀᤡᤱᤃᤠ᤹ ᤔᤡᤰᤘᤠᤖᤧ ᤁᤢᤎᤡᤶ ᤐᤥ᤺ᤰᤂᤠᤱᤗ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤏᤡᤱᤗ ᤘᤕᤠᤱᤗᤥ॥

³²ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱ ᤏᤢ ᤗᤢᤱᤃᤢᤶᤃᤧᤴ ᤁᤢᤒᤠ᤺ᤴᤈᤠᤰᤗᤧᤴ ᤁᤶᤒᤪᤠᤱᤅᤥ ᤀᤡᤱᤃᤠ᤹ ᤜᤢᤰᤛᤢᤵᤏᤡᤱᤗᤥ॥ ᤆᤰᤔᤧᤸᤗ᤹ᤀᤣ ᤂᤢᤏᤧ᤹ ᤏᤛᤠ᤺ᤴ ᤆᤥᤃᤧᤶᤔᤧ᤹. ᤂᤢᤏᤧ᤹ ᤁᤢᤗᤢᤱᤃᤢᤶᤔᤥ ᤋᤠᤱᤃᤧᤛᤧ᤺ᤵᤋᤡ᤹ ᤗ᤹ᤖᤡᤰ ᤔᤧᤳᤏᤡᤱᤗᤥ॥ ᤂᤧᤸᤗᤧ ᤂᤡᤏᤡ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ ᤏᤢ ᤛᤣᤛᤣ ᤁᤧᤒᤥ᤺ᤱᤒᤠ ᤁᤢᤔᤏᤠᤜᤠ᤹ᤏᤢ ᤕᤢᤰ ᤂᤥ᤺ᤔᤠᤴ ᤐᤡᤔᤠ ᤁᤧᤛᤢᤰᤋᤡ᤹ᤖᤥ॥