ᤛᤣ᤺ᤰᤕᤢᤰᤔᤡᤒᤠᤜᤠ᤹ 18:8-17

⁸ᤁᤪᤡᤛ᤻ᤐᤛ ᤔᤧᤵᤔᤏᤠᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤧᤴ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤁᤥᤖᤴᤌᤡᤒᤠ ᤕᤖᤡᤰ ᤘᤣ᤹ ᤔᤏᤠᤜᤠ᤹ᤖᤧ ᤛᤢᤏᤠᤀᤡᤱ ᤔᤧᤄᤧᤵᤛᤢᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥

⁹ᤌᤡᤰ ᤛᤧᤴᤍᤡᤰ ᤋᤠᤍᤡᤃᤧᤴ ᤛᤧᤵᤔᤠᤱᤔᤥ ᤍᤠᤱᤒᤠᤸᤗᤧ ᤐᤠᤘᤗᤧᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤁᤖ ᤛᤫᤠ᤺ᤳ ᤔᤧᤘᤕᤧᤴᤏᤧ᤹. ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤛᤧ᤺ᤛ᤻ᤛᤧ᤹ᤖ ᤘᤕᤧ᤹ᤀᤥ᥄

¹⁰ᤀᤡᤱᤃᤠ᤹ᤃ ᤂᤧᤏᤧ᤹ᤏᤢᤀᤣ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤌᤣᤀᤠᤱ ᤁᤧᤶᤔᤧᤳᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤧᤰᤕᤰᤁᤥ ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤀᤡᤱᤃᤧᤓᤥ᤺ᤛᤢᤏᤧ ᤑᤠ᤹ᤃᤪ ᤏᤛᤠ᤺ᤴᤏᤥ ᤋᤠ᤺ᤔᤠ ᤕᤖᤡᤰ ᤀᤠᤔᤏᤠᤜᤠ᤹ ᤔᤧᤘᤠ᤹ᤖᤥ॥”

¹¹ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤐᤠᤘᤗᤖᤧ ᤋᤱᤒᤣ ᤌᤡᤰᤁᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤜᤢ᤹ᤖᤢᤛᤡᤖ ᤘᤕᤧᤖᤥ॥

¹²ᤜᤧᤰᤁᤩᤠᤱ ᤃᤠᤗᤡᤕᤥ ᤔᤧᤵᤔᤏᤠᤒᤠ ᤔᤏᤠ᤺ᤴ ᤀᤰᤂᤤᤕᤠ ᤗᤠᤈᤣ᤹ᤒᤠ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤘᤕᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤐᤠᤘᤗᤧᤴ ᤔᤧᤍᤧᤶᤛᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤍᤃᤡ ᤂᤠᤛᤧᤴ ᤗᤥ᤺ᤴᤇᤧ ᤔᤧᤍᤠᤖᤢ॥

¹³ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧ ᤛᤠᤶᤕᤥᤌᤡᤶᤏᤢ ᤔᤧᤴᤍᤱᤔᤏᤠ ᤛᤣᤘᤠ ᤆᤥ᤺ᤰᤔᤠ ᤔᤏᤠᤜᤠ᤹ ᤜᤢᤛᤢᤛᤡᤀᤠᤱ ᤘᤠ᤹ᤖᤥ॥”

¹⁴ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤐᤠ᤺ᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤃᤠᤗᤡᤕᤥᤖᤧ ᤂᤧᤴ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤕᤜᤢᤍᤡᤛᤣ. ᤁᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤏᤢ ᤁᤴ ᤔᤏᤠ᤺ᤸᤗᤧ ᤖᤥᤔᤡ ᤌᤡᤶ ᤑᤣ᤺ᤴᤍᤢᤒᤠ ᤐᤠ᤺ᤴ ᤘᤠ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ ᤐᤠ᤺ᤴ ᤂᤧᤶᤔᤠᤀᤠᤱ ᤂᤠᤛᤧᤴ ᤗᤥ᤺ᤶᤔᤠ ᤏᤢ᤺ᤒᤠᤀᤣ ᤐᤥ᤺ᤱ॥

¹⁵ᤁᤖ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤛᤠᤶᤕᤥᤌᤡᤶᤔᤥᤒᤠ ᤔᤡᤱᤜᤠ᤹. ᤛᤢᤳᤗᤠᤜᤠ᤹ ᤏᤢ ᤌᤡᤶᤔᤡᤸᤗᤧᤴᤗᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤱᤃ ᤂᤡᤏᤡ᤹ ᤀᤠᤒᤠᤅᤣ ᤋᤱᤄᤧᤶᤔᤧ᤹ᤀᤥ॥ ᤀᤡᤱᤃᤠ᤹ᤃ ᤁᤴ ᤐᤠ᤺ᤴᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤏᤠᤴᤗᤥ॥”

¹⁶ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤂᤠᤛᤧᤴᤜᤡᤶᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤍᤣ᤺ᤛᤢᤛᤡᤖᤥ॥

¹⁷ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤠ ᤛᤥᤛ᤻ᤌᤣᤏᤛᤧᤴ ᤔᤧᤍᤧᤶᤛᤢᤀᤠᤱ ᤂᤠᤛᤧᤴᤜᤡᤶ ᤋᤃᤡᤀᤣ ᤔᤧᤗ᤺ᤵᤛᤢᤖᤥ॥ ᤁᤖ ᤃᤠᤗᤡᤕᤥᤖᤧ ᤂᤧᤱᤜᤠ᤹ ᤂᤧᤶᤂᤧᤶᤔᤠᤱ ᤔᤧᤗᤠᤵᤋᤢᤛᤡᤴ॥