ᤛᤣ᤺ᤰᤕᤢᤰᤔᤡᤒᤠᤜᤠ᤹ 17:22-30

²²ᤜᤧᤰᤁᤣ᤺ᤸᤗᤧ ᤀᤖᤡᤕᤥᤐᤠᤃᤛᤒᤠ ᤆᤢᤶᤗᤢᤱᤅᤡᤸᤗᤧ ᤁᤢᤗᤢᤶᤔᤥ ᤐᤠᤘᤗᤧᤴ ᤕᤧᤶᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤧᤌᤧᤴᤛᤀᤥ ᤁᤧᤕᤢᤱᤒᤠ ᤀᤠᤍᤠᤱᤒᤠᤛᤣ. ᤂᤡᤏᤡ᤹ᤃ ᤛᤠ᤹ᤖᤡᤰ ᤛᤠᤶᤕᤥᤛᤠᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥

²³ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤧᤰᤕᤰᤁᤥ ᤗᤠᤱᤄᤣᤃᤠᤱᤗ ᤐᤳᤇᤠᤱᤅᤡᤸᤗᤧ ᤂᤡᤏᤡ᤹ ᤛᤣᤘᤠ ᤁᤧᤈᤥᤃᤡᤒᤠ ᤋᤧᤴᤜᤠ᤹ ᤀᤥᤔᤧᤳᤋᤢᤱᤅᤡᤸᤗᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤔᤠᤱᤅᤡᤸᤗᤧᤴ ᤗ᤹ᤖᤡᤰ ᤛᤠᤵᤋᤧᤒᤠ ᤛᤠᤱᤒᤣᤎᤡᤰ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ. ᤀᤠᤸᤗᤥ ᤂᤡᤏᤡ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤛᤣᤘᤠ ᤁᤧᤈᤥᤃᤢᤶᤒᤠ ᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤀᤡᤴ ᤀᤡᤱᤃᤠ᤹ ᤀᤡᤱᤓᤴ ᤆᤥᤃᤢᤱᤗᤥ॥

²⁴ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤖᤥ॥ ᤂᤢᤏᤧ᤹ᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤆᤥᤃᤢᤛᤡᤒᤠᤸᤗᤧ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤠᤱᤜᤡᤶᤔᤥ ᤔᤧᤕᤢᤱᤅᤡᤴᤗᤥ॥

²⁵ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤁᤢᤓᤠ᤹ ᤂᤢᤏᤧ᤹ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤏᤢ ᤛᤠ᤺ᤱᤃᤢᤃᤧᤴ ᤛᤰᤔᤠ ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ ᤁᤧᤒᤡᤒᤠ ᤂᤢᤏᤧ᤹ᤀᤣᤖᤥ॥

²⁶ᤂᤢᤏᤧ᤹ᤀᤣ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤆᤥᤃᤢᤛᤡᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤡᤍᤠᤰ ᤕᤢᤱᤔᤠ ᤐᤠᤱᤄᤢᤛᤡᤒᤠᤖᤥ॥ ᤂᤢᤏᤧ᤹ᤀᤣ ᤂᤧᤱᤜᤠ᤹ ᤀᤠᤳᤋᤥ ᤕᤢᤱᤔᤠ ᤐᤥ᤺ᤱ ᤀᤠᤵᤑᤠᤸᤗᤧ ᤕᤢᤱᤔᤠ ᤐᤥ᤺ᤱ ᤑᤠ᤹ᤀᤠᤱ ᤋᤃᤡᤛᤠ ᤏᤡᤱᤛᤣ᤺ᤰ ᤆᤥᤃᤢᤀᤠᤱ ᤘᤕᤧ॥

²⁷ᤂᤢᤏᤧ᤹ ᤔᤧᤃᤥ᤺ᤳᤋᤢᤸᤗᤧ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢ ᤐᤡᤖᤢᤛᤡᤒᤠᤖᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤀᤠᤏᤡ᤹ᤏᤢ ᤔᤠ᤺ᤱᤄᤠ ᤜᤥ᤺ᤵᤗᤥ॥

²⁸ᤔᤏᤠᤎᤡᤰᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤂᤢᤏᤧ᤹ ᤆᤥᤃᤢᤸᤗᤧᤀᤣ ᤀᤠᤏᤡ᤹ ᤀᤠᤜᤡᤱ. ᤗᤠᤱᤀᤠᤄᤣ᤺ᤰᤁᤠᤱ ᤜᤡᤱᤔᤴᤏᤥ ᤀᤠᤘᤠ᤹ᤖᤥ॥’ ᤂᤡᤏᤡ᤹ ᤁᤢᤓᤠ ᤛᤠᤶᤔᤡᤗᤠ ᤛᤠᤶᤒᤠᤜᤠ᤹ᤖᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤏᤡ᤹ᤀᤠᤱ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤛᤡᤖᤥ॥’

²⁹ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤇᤠᤶ ᤕᤠᤵᤔᤡᤖᤧ ᤜᤢᤰᤛᤠᤵᤃᤧᤴ ᤛᤢᤶᤒᤥᤎᤠᤖᤧ ᤆᤥ᤺ᤰᤔᤏᤠᤒᤠ ᤛᤠᤶᤔᤩᤠᤱ. ᤕᤢᤵᤐᤠ. ᤏᤢ ᤗᤢᤱ ᤏᤠᤘᤠᤀᤡᤳᤗᤠ ᤁᤢᤀᤡᤛᤡ᤺ᤰ ᤆᤥ᤺ᤰ ᤑᤠ᤹ᤀᤠᤱ ᤀᤠᤏᤡ᤹ ᤀᤡ᤺ᤵᤔᤠ ᤔᤧᤏᤢ᤹ᤏᤧᤴᤗᤥ॥

³⁰ᤐᤣᤒᤠ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤴᤏᤡ ᤔᤧᤴᤎᤠᤀᤣ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢᤒᤠᤀᤥ ᤂᤢᤶᤍᤡᤱ ᤔᤧᤒᤡᤖᤢᤴᤛᤡᤴ. ᤁᤖ ᤀᤠᤸᤗ ᤂᤧᤱᤜᤠ᤹ ᤀᤠᤳᤋᤠᤴ ᤐᤡᤛᤠᤱᤛᤠᤱ ᤔᤏᤠᤜᤠ᤹ ᤑᤧᤴ ᤕᤠ᤺ᤶᤒᤰ ᤁᤢᤎᤡᤶ ᤜᤡᤱᤔᤴᤗᤠᤶ ᤔᤧᤜᤡᤴᤗ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥