ᤛᤣ᤺ᤰᤕᤢᤰᤔᤡᤒᤠᤜᤠ᤹ 16:23-33

²³ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤐᤢᤱᤗᤠᤀᤡᤱᤒᤠᤴ ᤏᤢ᤺ᤖᤡᤰᤁᤠᤱ ᤂᤧᤱᤜᤠ᤹ ᤁᤥᤔᤠ ᤐᤠᤱᤄᤧᤛᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤒᤡᤖᤢᤖᤥ॥

²⁴ᤀᤰᤋᤱᤒᤠ ᤀᤡᤱᤈᤠ᤺ᤱ ᤂᤥ᤺ᤛᤢᤀᤠᤱ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤒᤠ ᤛᤡᤃᤠᤱᤛ᤻ᤔᤠ ᤕᤠᤰᤑᤠᤀᤥ ᤂᤢᤴᤇᤡ᤹ ᤗᤠᤱᤜᤠ᤹ ᤑᤧᤴᤌᤰᤁᤪᤱᤅᤥ ᤕᤠᤰᤐᤠᤱᤄᤢᤛᤡᤀᤠᤱ ᤛᤠᤰᤋᤢᤛᤡᤖᤥ॥

²⁵ᤛᤧᤳᤗᤢᤶ ᤑᤰᤋᤧᤖ ᤐᤳᤇᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤋᤢᤘᤠ ᤆᤥᤃᤢᤛᤡᤖ ᤛᤠᤶᤗᤥᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤳᤇᤢᤖ ᤕᤠᤃᤧᤳᤇᤡᤖᤥ॥ ᤘᤣ᤹ ᤐᤢᤱᤗᤠᤎᤠᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤔᤧᤄᤧᤵᤛᤢᤛᤡᤖ ᤔᤧᤕᤢᤅᤧᤖᤥ॥

²⁶ᤜᤰᤆᤄᤳ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤀᤠᤱ ᤐᤢᤱᤗᤠᤜᤡᤶ ᤕᤰᤜᤠ᤹ᤀᤣ ᤕᤰᤂᤢᤖ ᤗᤠᤶᤎᤣ᤺ᤵᤜᤠ᤹ ᤜᤸᤗᤧᤰ ᤘᤖᤧᤰ ᤜᤖᤧᤀᤠᤱ ᤁᤧᤖᤧᤰ ᤐᤢᤱᤗᤠᤎᤠᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤄᤣ᤺ᤱᤜᤠ᤹ ᤐᤠ᤺ᤰᤂᤧᤖᤥ॥

²⁷ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤴ ᤁᤢᤔᤡᤰ ᤛᤥᤖᤧᤀᤠᤱ ᤐᤢᤱᤗᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤜᤠ᤹ ᤜᤖᤧᤀᤠᤱ ᤐᤳᤇᤧᤒᤠ ᤏᤡ᤺ᤛᤢ ᤜᤧᤰᤁᤩᤠᤱ ᤐᤢᤱᤗᤠᤎᤠᤒᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤜᤣ᤺ᤛᤢᤒᤠ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤛᤧᤳᤇᤡᤱᤔᤠ ᤁᤥ᤺ᤳᤋᤢᤖᤥ॥

²⁸ᤁᤖ ᤐᤠᤘᤗᤖᤧ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤠᤀᤣ. ᤌᤣᤀᤠᤱ ᤔᤧᤔᤧᤳᤇᤡᤅᤧᤴᤏᤧ᤹ᤀᤥ᥄ ᤀᤠᤏᤡᤃᤧᤃ ᤂᤠ ᤁᤵᤔᤥᤀᤣ ᤕᤠᤃᤡᤃᤧ᤹ᤖᤥ॥”

²⁹ᤂᤧᤴ ᤐᤢᤱᤗᤠᤀᤡᤱᤒᤠᤸᤗᤧ ᤛᤣᤔᤡ᤺ᤴ ᤜᤠ᤺ᤶᤔᤠ ᤐᤠᤱᤄᤢᤛᤡᤀᤠᤱ ᤛᤡᤃᤠᤱ ᤗᤥ᤺ᤰᤋᤧᤖ ᤋᤩᤧ॥ ᤂᤧᤴ ᤕᤰᤂᤧᤖ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥

³⁰ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤀᤠᤍᤠᤱᤒᤠᤛᤣ. ᤀᤡᤱᤃᤠ᤹ ᤌᤣ ᤆᤥᤃᤢᤱᤅᤡᤸᤗᤧ ᤛᤧᤴᤗᤵ ᤂᤥᤀᤠᤒᤣ᥅”

³¹ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤍᤠᤱᤒᤠ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤴᤗᤵ ᤁᤧᤄᤥ᤺ᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤏᤧ ᤑᤠ᤹ᤃᤪ ᤛᤧᤴᤗᤵ ᤔᤧᤄᤥ᤺ᤛᤢ᤹ᤖᤥ॥”

³²ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤆᤧᤰᤋᤧᤳᤇᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤖᤥ॥

³³ᤛᤧᤴᤍᤡᤰ ᤒᤠᤂᤧᤴ ᤕᤧᤶᤔᤥ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤢᤴᤇᤡ᤹ ᤕᤠᤱᤄᤣ᤺ᤰᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤐᤢᤱᤗᤠᤀᤡᤱᤒᤠᤴ ᤏᤢ ᤁᤢᤜᤡᤶᤛᤕᤱᤜᤠ᤹ ᤂᤡᤔᤥ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥