ᤛᤣ᤺ᤰᤕᤢᤰᤔᤡᤒᤠᤜᤠ᤹ 12:7-11

⁷ᤂᤡᤔᤥ ᤂᤧᤴ ᤐᤢᤱᤗᤠᤜᤡᤶᤔᤥᤒᤠ ᤕᤠᤰᤑᤠᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤸᤗᤧ ᤌᤥ᤹ᤖᤢᤖ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤴᤏᤠᤱ ᤂᤧᤵᤔᤥ ᤌᤠ᤺ᤴᤇᤡᤱ॥ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤐᤋᤪᤢᤛᤖᤧ ᤁᤢᤓᤰᤋᤠᤱᤅᤥ ᤑᤧᤰᤑᤧᤰ ᤜᤡᤵᤋᤢᤖ ᤑᤥ᤺ᤰᤂᤢᤀᤠᤱ ᤀᤰᤂᤣ ᤔᤧᤳᤋᤢ. “ᤜᤠᤖᤠ ᤐᤥᤃᤧ᤹॥” ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤢᤜᤢᤰᤁᤥ ᤁᤧᤒᤵᤐᤠ ᤑᤧᤴᤈᤣ᤹ ᤜᤢᤰᤐᤠ᤺ᤱᤃᤡᤜᤠ᤹ ᤐᤠ᤺ᤰᤂᤧᤀᤠᤱ ᤔᤰᤌᤩᤧᤖᤥ॥

⁸ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤑ᤹ᤀᤡ ᤕᤢᤵᤛᤧᤀᤠᤱ ᤗᤠᤱᤛᤢ᤺ᤵᤐᤡᤴ ᤆᤠᤰᤂᤧ᤹॥” ᤐᤋᤪᤢᤛᤖᤧ ᤜᤧᤰᤁᤣ ᤆᤥᤃᤢ. ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤢ. “ᤛᤢᤱᤄᤣ᤺ᤰᤘᤠ᤺ᤴ ᤜᤧᤵᤛᤡᤱᤅᤧ᤹ᤀᤠᤱ ᤋᤡᤶᤍᤠᤱᤅᤧ᤹ᤀᤥ॥”

⁹ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧᤀᤠᤱ ᤐᤢᤱᤗᤠᤜᤡᤶᤗᤠᤶ ᤗᤠ᤺ᤰᤁᤠᤳ ᤋᤡᤶᤍᤢᤖᤥ॥ ᤁᤴ ᤔᤠᤱᤗᤠᤀᤡᤱᤒᤠᤸᤗᤧ ᤋᤠᤍᤡᤃᤧᤴ ᤛᤧᤵᤔᤠᤱᤅᤥ ᤆᤥᤃᤢᤒᤠᤒᤡ ᤀᤡ ᤕᤠᤰᤌᤢᤱᤎᤥᤀᤥ ᤆᤥᤃᤢᤒᤠᤒᤡ ᤑᤠ᤹ᤀᤠᤱ ᤂᤢᤏᤧ᤹ ᤌᤣᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤴᤗᤥ॥ ᤂᤢᤏᤧ᤹ᤃ ᤛᤢᤑᤥᤏᤧ ᤏᤡ᤺ᤛᤢᤱᤒᤠᤒᤡ ᤗ᤹ᤖᤧᤖᤥ॥

¹⁰ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣ᤺ᤰᤛ᤻ᤔᤠ ᤏᤢ ᤏᤡᤛᤡᤃᤣ᤺ᤰᤛ᤻ᤔᤠ ᤗᤠᤶ ᤁᤧᤃᤥ᤺ᤒᤠ ᤌᤰᤛᤢᤒᤠ ᤕᤧᤵᤏᤠ᤺ᤴ ᤁᤠ᤺ᤰᤋᤧᤳᤇᤢᤀᤠᤱ ᤕᤧᤰᤕᤰᤁᤥ ᤗᤠ᤺ᤵᤔᤠ ᤑᤧᤴᤈᤣ᤹ ᤗᤠᤶᤎᤣ᤺ᤵᤐᤥ ᤁᤧᤖᤧᤳᤇᤡ॥ ᤂᤧᤴ ᤗᤠᤶᤎᤣ᤺ᤵᤐᤡᤴᤏᤠᤱ ᤂᤢᤴᤇᤡ᤹ ᤗᤠᤃᤡ ᤀᤠᤒᤠᤅᤣ ᤜᤴᤇᤡᤱ. ᤜᤧᤰᤁᤩᤠᤱ ᤏᤧᤵᤔᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤳᤇᤡᤖᤥ॥ ᤂᤧᤱᤜᤠ᤹ ᤕᤧᤰᤕᤰᤁᤥᤒᤠ ᤔᤠᤖᤠᤶᤔᤥ ᤗ᤺ᤴᤍᤧᤳᤇᤡᤀᤠᤱ ᤗᤠᤱᤄᤣ᤺ᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧᤀᤣ ᤔᤠᤱᤗᤠᤀᤡᤱᤒᤠᤸᤗᤧ ᤂᤡᤔᤥ ᤐᤋᤪᤢᤛᤧᤴ ᤗᤧᤖᤢᤎ॥

¹¹ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤴ ᤛᤧᤰᤂᤠᤀᤣ ᤐᤥ᤺ᤰᤂᤧᤒᤠᤖᤥ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤀᤰᤂᤣ ᤔᤧᤳᤇᤡᤱ. “ᤁᤴ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥ ᤍᤠᤱᤒᤠᤸᤗᤧ ᤂᤢᤏᤧ᤹ ᤁᤢᤔᤠᤱᤗᤠᤀᤡᤱᤒᤠᤴ ᤐᤠᤱᤄᤢᤀᤠᤱ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤏᤢ ᤜᤧᤖᤥᤍᤗᤠᤶ ᤀᤡᤱᤃᤠ᤹ ᤛᤧ᤺ᤵᤋᤠᤱᤗᤥ॥”