ᤛᤣ᤺ᤰᤕᤢᤰᤔᤡᤒᤠᤜᤠ᤹ 11:12-28

¹²ᤛᤣᤛᤣᤔᤠᤱᤅᤡᤸᤗᤧᤀᤠᤱ ᤔᤧᤳᤋᤠᤱ. ‘ᤌᤡᤶᤔᤧᤴᤍᤱ ᤛᤢᤘᤠᤱᤛᤡᤛᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤂᤧᤱᤜᤠ᤹ᤏᤢ ᤐᤣᤃᤧ᤹ᤀᤥ॥’ ᤂᤧᤵᤔᤥ ᤋᤢᤰᤛᤡ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤀᤡᤱᤃᤠ᤹ᤏᤢ ᤛᤡᤈᤖᤡᤕᤠᤀᤥ ᤔᤧᤒᤣ. ᤜᤧᤰᤁᤩᤠᤱ ᤛᤥᤖᤡᤰ ᤁᤷᤏᤠᤗᤡᤕᤛᤖᤧ ᤁᤢᤜᤡᤶᤔᤥ ᤐᤣ᤺ᤰᤔᤏᤠᤖᤥ॥

¹³ᤂᤢᤏᤧ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤔᤠᤱᤗᤠᤀᤡᤱᤒᤠᤴ ᤁᤢᤜᤡᤶᤔᤥ ᤋᤩᤧᤀᤠᤱ ᤂᤢᤏᤧ᤹ ᤔᤧᤳᤋᤢᤒᤠᤴ ᤕᤠᤵᤔᤡ ᤆᤧᤰᤋᤧ. ‘ᤁᤢᤓᤠ ᤔᤏᤠᤜᤠ᤹ ᤈᤥᤵᤐᤠᤀᤥ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤗᤠ᤺ᤛᤧ ᤐᤠᤱᤛᤧᤛᤧ᤹ᤀᤥ॥

¹⁴ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠᤰᤁᤡᤸᤗᤧ ᤂᤧᤏᤧ᤹ ᤏᤢ ᤁᤠᤰ ᤁᤧᤜᤡᤶᤛᤕᤱᤜᤠ᤹ᤖᤧ ᤛᤧᤴᤗᤵ ᤁᤧᤄᤥ᤺ᤛᤢᤶᤗᤥ॥’

¹⁵ᤀᤡᤱᤃᤠ᤹ ᤐᤠ᤺ᤵᤔᤠ ᤜᤣ᤺ᤰᤋᤢᤱᤗ ᤐᤳᤇᤠᤱᤅᤡᤸᤗᤧ ᤛᤣᤛᤣᤔᤠᤱᤅᤡᤴ ᤋᤃᤡ ᤀᤠᤏᤡ᤹ ᤛᤶᤍᤠᤱ ᤆᤢᤰᤋᤧᤒᤠ ᤜᤧᤰᤁᤣ ᤂᤧᤱᤜᤠ᤹ ᤛᤶᤍᤠᤱᤅᤠᤱ ᤆᤢᤰᤋᤧᤖᤥ॥

¹⁶ᤜᤧᤰᤁᤩᤠᤱ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱ–‘ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ. ᤁᤖ ᤂᤡᤏᤡ᤹ᤃ ᤛᤣᤛᤣᤔᤠᤱᤅᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡ᤹ᤖᤥ॥’

¹⁷ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤀᤠᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤷᤎᤠ᤺ᤶ ᤀᤠᤒᤡᤖᤧᤒᤠ ᤁᤢᤀᤡᤛᤡ᤺ᤰᤁᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶᤔᤠᤱ ᤔᤧᤄᤥ᤺ᤛᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤒᤠᤴ ᤀᤵᤔᤠ ᤁᤧᤛᤢᤰᤐᤠ ᤀᤡᤱᤃᤠ᤹ ᤜᤠ᤺ᤳᤀᤠᤒᤣ᥅”

¹⁸ᤜᤧᤰᤁᤩᤠᤱ ᤂᤧᤴ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤸᤗᤧ ᤂᤢᤏᤧ᤹ᤏᤢ ᤐᤠ᤺ᤴ ᤌᤰᤔᤠ ᤔᤧᤗᤧᤖᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤔᤧᤜᤣ᤺ᤰᤋᤢᤖᤥ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤗᤠᤕᤥᤗᤠᤶ ᤜᤡᤶᤔᤠᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤛᤢᤕᤧᤶ ᤐᤡᤖᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥”

¹⁹ᤀᤠᤸᤗ ᤛ᤻ᤋᤡᤑᤏᤛᤧᤴ ᤔᤧᤛᤧᤖᤢᤀᤠᤱ ᤀᤣᤃᤠᤱ ᤕᤖᤢᤛᤗᤧᤶᤔᤥ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤏᤛᤠᤏᤡᤒᤠᤜᤠ᤹ ᤁᤠᤰ ᤐᤡᤛᤠᤱ ᤔᤧᤛᤧ᤺ᤖᤧᤖ ᤔᤧᤒᤣᤖᤥ॥ ᤁᤢᤓᤠᤃ ᤑᤥᤏᤡᤛᤡᤕᤠ ᤋᤧᤱᤃᤵ. ᤛᤤᤐᤪᤛ ᤘᤠᤃᤵᤂᤠᤶ. ᤏᤢ ᤀᤣᤴᤋᤡᤀᤥᤁ ᤕᤧᤰᤕᤰᤁᤠᤱ ᤔᤧᤃᤧᤖᤧᤖᤥ॥ ᤂᤧᤱᤜᤠ᤹ᤖᤧᤃ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤖᤰ ᤛᤢᤏᤠᤀᤡᤱ ᤀᤡᤱᤔᤧᤓᤥ᤺ᤛᤢᤛᤡᤖᤥ॥

²⁰ᤁᤖ ᤛᤤᤐᤪᤛ ᤏᤢ ᤛᤠᤀᤡᤖᤣᤏᤡᤒᤠ ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤣᤴᤋᤡᤀᤥᤰᤁᤥ ᤔᤧᤒᤣᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤍᤠᤱᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤔᤧᤈᤥᤃᤢᤛᤡᤖᤥ॥

²¹ᤍᤠᤱᤒᤠᤸᤗᤧ ᤁᤢᤔᤢᤰᤛᤠᤶᤔᤡᤴ ᤂᤧᤱᤜᤠ᤹ᤏᤢ ᤘᤕᤧ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤍᤠᤱᤒᤠ ᤗᤧᤵᤔᤠᤱ ᤔᤧᤜᤡᤛᤡᤱᤗᤥ॥

²²ᤁᤴ ᤀᤡᤱᤄᤱᤅᤡᤴ ᤕᤖᤢᤛᤗᤧᤶᤔᤥᤒᤠ ᤛᤣᤛᤣᤜᤢᤵᤗᤰᤁᤥᤀᤠᤱ ᤁᤧᤖᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤒᤖᤏᤠᤒᤠᤛᤧᤴ ᤀᤣᤴᤋᤡᤀᤥᤰᤁᤥ ᤔᤧᤒᤠᤱᤄᤢᤖᤥ॥

²³ᤂᤢᤏᤧ᤹ ᤂᤧᤵᤔᤥ ᤁᤧᤖᤧᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤌᤠ᤺ᤛᤢᤒᤠ ᤏᤡ᤺ᤛᤢ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤛᤠ᤹ᤖᤡᤰᤁᤣ ᤛ᤺ᤳᤋᤧᤀᤠᤱ ᤂᤧᤱᤜᤠ᤹ ᤛᤡᤰᤗᤢᤱᤔᤥᤏᤢ ᤛᤧᤰᤂᤠᤀᤣ ᤍᤠᤱᤒᤠᤀᤥ ᤘᤕᤧᤶᤔᤧ᤹ᤀᤥ ᤑᤠ᤹ᤀᤠᤱ ᤜᤠᤱᤜᤠᤱ ᤔᤧᤳᤋᤢᤛᤡᤖᤥ॥

²⁴ᤒᤖᤏᤠᤒᤠᤛᤧᤴ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤒᤠ ᤏᤢ ᤏᤛᤠ᤺ᤴᤏᤡᤸᤗᤧ ᤁᤢᤎᤡᤶ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤥᤗᤠᤶ ᤍᤠᤱᤒᤠᤀᤥ ᤔᤧᤍᤩᤧᤖᤥ॥

²⁵ᤜᤧᤰᤁᤩᤠᤱ ᤒᤖᤏᤠᤒᤠᤛᤧᤴ ᤛᤠᤘᤗᤖᤧ ᤁᤢᤃᤥ᤺ᤳᤇᤧ ᤋᤠᤷᤛᤛ ᤐᤣᤖᤥ॥

²⁶ᤂᤧᤵᤔᤥ ᤂᤢᤏᤧ᤹ ᤋᤢᤔᤢᤀᤠᤱ ᤀᤣᤴᤋᤡᤀᤥᤰᤁᤥ ᤋᤠᤖᤢ॥ ᤜᤧᤰᤁᤩᤠᤱ ᤋᤱᤒᤣ ᤂᤠᤖᤠᤰ ᤂᤧᤱᤜᤠ᤹ᤖᤧ ᤛᤣᤛᤣᤜᤢᤵᤗᤰᤁᤥ ᤔᤏᤠᤜᤠ᤹ ᤋᤢᤔᤧᤳᤇᤢᤖ ᤕᤖᤡᤰ ᤔᤏᤠᤜᤠ᤹ ᤜᤢ᤹ᤖᤧᤳᤇᤢᤖᤥ॥ (ᤜᤢ᤹ᤛᤠᤶᤒᤠᤜᤠ᤹ ᤀᤣᤴᤋᤡᤀᤥᤰᤁᤥᤀᤣ ᤁᤠᤰᤏᤢ ᤋᤃᤡ ᤂᤪᤡᤛ᤻ᤋᤠᤏᤡᤛᤡ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥)

²⁷ᤁᤴ ᤕᤧᤶᤔᤥ ᤁᤢᤓᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤕᤖᤢᤛᤗᤧᤶᤗᤠᤶ ᤀᤣᤴᤋᤡᤀᤥᤰᤁᤥ ᤔᤧᤍᤩᤧ॥

²⁸ᤂᤧᤱᤜᤠ᤹ᤀᤥ ᤌᤡᤰ ᤀᤃᤠᤒᤛ ᤔᤧᤵᤔᤏᤠᤒᤧᤴ ᤐᤥᤃᤧᤀᤠᤱ ᤀᤠᤸᤗ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤐᤕᤶ ᤛᤠᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣᤛᤣᤔᤠᤱᤗᤠᤶ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧᤖᤥ॥ (ᤁᤱᤃ ᤰᤗᤠᤀᤢᤍᤡᤕᤛ ᤜᤠᤱᤅᤡᤸᤗᤧ ᤜᤠᤱ ᤆᤥᤃᤢᤒᤠ ᤕᤧᤶᤔᤥ ᤐᤥ᤺ᤰᤂᤧᤖᤥ॥)