ᤛᤣ᤺ᤰᤕᤢᤰᤔᤡᤒᤠᤜᤠ᤹ 10:18-35

¹⁸ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ. ᤛᤡᤔᤥᤏ ᤔᤧᤵᤔᤏᤠᤒᤠ ᤐᤋᤪᤢᤛᤧᤴ ᤁᤵᤔᤥ ᤘᤠ᤹ᤒᤡ ᤜᤥ᤺ᤵᤐᤡ ᤑᤠ᤹ᤀᤠᤱ ᤛᤣ᤺ᤴᤍᤥᤀᤡ ᤔᤧᤕᤧᤒᤧᤖᤥ॥

¹⁹ᤜᤧᤰᤁᤩᤠᤱ ᤐᤋᤪᤢᤛᤖᤧ ᤀᤠᤸᤗᤛᤠᤱ ᤁᤴ ᤛᤢᤑᤥᤀᤡᤴ ᤌᤣᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤐᤳᤇᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤔᤧᤳᤋᤢ. “ᤛᤡᤔᤥᤏᤣ. ᤛᤢᤶᤛᤡ ᤔᤏᤠᤜᤠ᤹ ᤁᤧᤃᤥ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥

²⁰ᤂᤧᤸᤗᤧ ᤆᤥᤃᤢᤸᤗᤧ ᤐᤥᤃᤧ᤹ᤀᤠᤱ ᤕᤥ ᤌᤩᤧ᤹. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤛᤡ ᤑᤠ᤹ᤀᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤂᤧᤱᤜᤠ᤹ᤏᤢ ᤐᤣᤃᤧ᤹ᤀᤥ॥ ᤂᤧᤱᤜᤠ᤹ᤃ ᤀᤡᤱᤃᤠ᤹ᤀᤣ ᤐᤠᤱᤄᤢᤱᤛᤡᤱᤒᤠᤖᤥ॥”

²¹ᤜᤧᤰᤁᤣ᤺ᤸᤗᤧ ᤐᤋᤪᤢᤛᤧᤴ ᤕᤥ ᤌᤩᤧᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠ᤺ᤱᤃ ᤀᤡᤱᤃᤠ᤹ᤀᤣᤖᤥ॥ ᤌᤣᤀᤠᤱ ᤁᤵᤔᤥ ᤁᤧᤍᤩᤧ᤹ᤀᤡᤒᤠᤒᤣ᥅”

²²ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤁᤷᤏᤠᤗᤡᤕᤛ ᤔᤧᤵᤔᤏᤠᤒᤠ ᤌᤰᤋᤢᤶᤒᤧᤸᤗᤧ ᤕᤠᤵᤔᤡ ᤐᤠᤱᤄᤧᤒᤠᤖᤥ॥ ᤂᤢᤏᤧ᤹ᤃ ᤛᤠᤶᤕᤥᤏᤡᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ ᤔᤏᤠ ᤏᤢ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ᤃ ᤛᤠ᤹ᤖᤡᤰᤁᤣ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤛᤣᤛᤣ ᤔᤠᤱᤗᤠᤀᤡᤱᤒᤠᤎᤡᤰᤗᤧ ᤂᤧᤏᤧ᤹ ᤁᤢᤜᤡᤶᤔᤥ ᤀᤢ᤺ᤵᤔᤠᤀᤠᤱ ᤂᤧᤏᤧ᤹ᤗᤠᤶ ᤐᤠ᤺ᤵᤔᤠ ᤁᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤢᤖᤥ॥”

²³ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤱᤜᤠ᤹ ᤜᤡᤶᤛᤡᤃᤠᤱ ᤀᤢ᤺ᤳᤋᤢᤛᤡᤀᤠᤱ ᤋᤖᤣ ᤋᤠ᤺ᤰᤋᤢᤛᤡᤖᤥ॥ ᤁᤢᤏᤠᤶᤍᤠ᤺ᤵᤔᤠ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤏᤢᤀᤣ ᤐᤣ॥ ᤜᤧᤰᤁᤩᤠᤱ ᤈᤥᤵᤐᤠᤒᤠ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣᤖᤥ॥

²⁴ᤁᤢᤀᤠᤳᤇᤡᤴᤍᤠ᤺ᤴ ᤂᤧᤱᤜᤠ᤹ ᤛᤡᤈᤖᤡᤕᤠᤀᤥ ᤔᤧᤃᤧᤖᤧᤀᤠᤱ ᤁᤷᤏᤠᤗᤡᤕᤛᤖᤧ ᤁᤢᤃᤠᤀᤡᤜᤠ᤹ ᤏᤢ ᤏᤡ᤺ᤳᤋᤠᤱᤒᤠ ᤁᤢᤴᤍᤣ᤺ᤱ ᤁᤢᤴᤈᤢᤶᤜᤠ᤹ ᤛᤥᤖᤡᤰ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤔᤧᤜᤠᤱᤄᤢᤛᤡᤖ ᤔᤧᤕᤢᤅᤧᤖᤥ॥

²⁵ᤐᤋᤪᤢᤛᤧᤴ ᤜᤡᤶᤛᤡᤃᤠᤱ ᤗᤠ᤺ᤵᤔᤠ ᤀᤡ᤺ᤳᤋᤧᤸᤗᤧ ᤁᤷᤏᤠᤗᤡᤕᤛᤖᤧ ᤂᤢᤏᤧ᤹ ᤋᤢᤔᤢᤀᤠᤱ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤑᤴᤇᤡᤱᤅᤠᤱ ᤛᤣᤘᤠ ᤆᤥᤃᤢᤖᤥ॥

²⁶ᤁᤖ ᤐᤋᤪᤢᤛᤖᤧ ᤂᤧᤴ ᤑᤥ᤺ᤰᤂᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤥ. ᤀᤡᤱᤃᤠ᤹ᤃ ᤔᤏᤠᤀᤠᤖᤰᤗᤥ॥”

²⁷ᤐᤋᤪᤢᤛᤧᤴ ᤁᤷᤏᤠᤗᤡᤕᤛᤧᤴᤏᤢ ᤋᤠ᤹ᤈᤧᤰᤂᤧᤖ ᤜᤡᤶᤛᤡᤃᤠᤱ ᤗᤠ᤺ᤛᤧ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧᤒᤠ ᤏᤡ᤺ᤛᤢᤛᤡᤖᤥ॥

²⁸ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ. ᤂᤢᤏᤡ᤹ ᤜᤡᤶᤔᤥ ᤐᤣ᤺ᤰᤔᤠ ᤀᤠᤏᤡᤃᤧ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤔᤧᤒᤡᤖᤡᤃᤧᤴ ᤁᤧᤗ᤹ᤒᤠ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤵᤔᤠᤛᤡ ᤔᤧᤏᤢ᤹ᤏᤧᤴᤗᤥ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤋᤠᤱᤗᤥ॥

²⁹ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤒᤠᤱᤄᤢᤛᤡᤒᤠ ᤔᤏᤠᤜᤠ᤹ᤏᤢ ᤌᤣᤀᤠᤱ ᤔᤧᤶᤒᤠ᤺ᤳᤋᤣ ᤀᤡᤱᤃᤠ᤹ ᤁᤵᤔᤥ ᤋᤩᤠᤱᤗᤥ॥ ᤀᤠᤸᤗ ᤌᤣᤀᤠᤱ ᤁᤧᤀᤢ᤺ᤳᤋᤠᤱᤒᤠ ᤐᤠ᤺ᤳᤋᤧ᤹ᤀᤥ॥”

³⁰ᤁᤖᤏᤠᤗᤡᤛᤕᤖᤧ ᤂᤢᤏᤧ᤹ ᤔᤧᤳᤋᤢ. “ᤗᤡᤛᤡᤕᤧᤴ ᤋᤃᤡ ᤀᤡᤱᤃᤠ᤹ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤸᤗᤧ ᤋᤢᤘᤠ ᤆᤥ᤺ᤰᤁᤡ ᤀᤠᤜᤡᤶᤔᤥ ᤕᤠᤃᤠᤱ॥ ᤂᤡᤔᤥ ᤔᤡᤰᤁᤡᤴᤏᤣ ᤁᤧᤈᤧᤶᤒᤠ ᤋᤣ᤺ᤳ ᤁᤧᤈᤠᤱᤒᤠ ᤔᤏᤠᤎᤡᤰ ᤀᤡᤱᤃᤠ᤹ ᤀᤠᤍᤃᤡ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ

³¹ᤔᤧᤳᤋᤠᤱ. ‘ᤁᤷᤏᤠᤗᤡᤕᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠ᤺ᤴ ᤂᤧᤵᤛᤢᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤁᤢᤓᤠ᤹ ᤕᤠᤱᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥

³²ᤜᤧᤰᤁᤣ᤺ᤸᤗᤧ ᤈᤥᤵᤐᤠᤀᤥ ᤛᤡᤔᤥᤏ ᤐᤋᤪᤢᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤗᤠ᤺ᤛᤧ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤥ॥ ᤂᤢᤏᤧ᤹ᤃ ᤛᤧᤜᤥᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤕᤠ᤺ᤰᤋᤧᤀᤠᤱ ᤘᤠ᤹॥ ᤂᤧᤴ ᤜᤡᤶᤔᤡᤴ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤏᤧᤖᤥ॥’

³³ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤔᤥ ᤁᤧᤗᤠ᤺ᤛᤧ ᤐᤠᤱᤄᤢᤱᤛᤡᤱ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤠᤱ ᤁᤵᤔᤥ ᤁᤧᤍᤩᤧᤀᤠᤱ ᤏᤢ᤺ᤒᤠᤀᤣ ᤐᤥ᤺ᤰᤂᤧᤖᤥ॥ ᤀᤠᤸᤗᤥᤃ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤘᤕᤡᤃᤧᤀᤠᤱ ᤍᤠᤱᤒᤠᤸᤗᤧ ᤂᤧᤏᤧ᤹ ᤌᤣ ᤐᤠ᤺ᤵᤔᤠ ᤀᤡᤱᤈᤠ᤺ᤱ ᤁᤧᤒᤡᤖᤧᤀᤠᤱ ᤘᤠ᤹. ᤂᤧᤴ ᤐᤠ᤺ᤴ ᤂᤧᤶᤛᤧ ᤁᤵᤔᤥ ᤕᤠᤖᤡᤵ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥”

³⁴ᤁᤴ ᤂᤧᤵᤛᤢᤀᤠᤱ ᤐᤋᤪᤢᤛᤖᤧ ᤐᤠ᤺ᤵᤔᤠ ᤜᤣ᤺ᤰᤋᤢ. “ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤔᤧᤛᤧᤴᤍᤢᤴᤇᤡᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤸᤗ ᤀᤡᤱᤃᤠ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥

³⁵ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤀᤡᤱᤎᤠ᤺ᤱ ᤁᤧᤒᤡᤒᤠ ᤏᤢ ᤁᤢᤏᤡᤱᤘᤠ᤹ ᤜᤧᤰᤁᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤠ᤺ᤰᤋᤢᤛᤡᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥