ᤛᤣ᤺ᤰᤕᤢᤰᤔᤡᤒᤠᤜᤠ᤹ 10:1-17

¹ᤛᤡᤈᤖᤡᤕᤠ ᤕᤧᤰᤕᤰᤁᤥ ᤁᤷᤏᤠᤗᤡᤕᤛ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤀᤡᤋᤠᤗᤡᤕᤠ ᤔᤧᤵᤔᤏᤠᤒᤠ ᤖᤥᤔᤡ ᤋᤢᤖᤠᤖᤧᤴ ᤌᤰᤋᤢᤶᤒᤠ ᤘᤕᤧᤖᤥ॥

²ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤔᤡᤱᤛᤥᤍᤠᤱᤒᤠ ᤏᤢ ᤛᤠᤶᤕᤥᤛᤠᤒᤠ ᤔᤧᤘᤕᤧᤖᤥ॥ ᤂᤢᤏᤧ᤹ᤃ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤖᤡᤰ ᤁᤢᤓᤠ᤹ ᤕᤠᤱ ᤁᤧᤒᤡᤒᤠ ᤏᤢ ᤌᤡᤰᤕᤠ᤺ᤴᤎᤰ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤘᤠ ᤁᤧᤈᤥ᤺ᤰᤐᤠ ᤘᤕᤧᤖᤥ॥

³ᤌᤡᤰᤕᤧᤴ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤀᤠᤱ ᤘᤕᤧᤸᤗᤧ ᤂᤢᤏᤧ᤹ ᤛᤢᤑᤥᤎᤡᤰ ᤏᤡ᤺ᤛᤢ॥ ᤂᤧᤴ ᤛᤢᤑᤥᤀᤥ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤴ ᤂᤢᤏᤧ᤹ ᤗᤧᤵᤔᤠᤱ ᤑᤧᤖᤧᤖ “ᤁᤷᤏᤠᤗᤡᤕᤛᤣ.” ᤔᤧᤳᤋᤢᤖᤥ॥

⁴ᤁᤷᤏᤠᤗᤡᤕᤛᤖᤧ ᤁᤡ᤺ᤛᤧᤖ ᤀᤥᤔᤧᤳᤋᤢᤖ ᤀᤥᤒᤧ ᤀᤠᤍᤠᤱᤒᤣ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠᤜᤠ᤹ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤖᤡᤰ ᤁᤢᤓᤠ᤹ ᤕᤠᤱ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥”

⁵ᤀᤠᤸᤗ ᤈᤥᤵᤐᤠ ᤕᤧᤰᤕᤰᤁᤥ ᤛᤡᤔᤥᤏ ᤐᤋᤪᤢᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤀᤢ᤺ᤳᤇᤧ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤥ॥

⁶ᤂᤧᤴ ᤘᤠᤜᤱ ᤐᤣᤛᤠᤱᤒᤠ ᤛᤧᤜᤥᤒᤠᤖᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤠ᤹॥

⁷ᤂᤧᤴ ᤔᤠᤱᤗᤠᤀᤡᤱᤒᤠᤴ ᤜᤧᤰᤁᤣ ᤐᤠ᤺ᤳᤋᤢᤀᤠᤱ ᤐᤣ. ᤜᤧᤰᤁᤩᤠᤱ ᤁᤷᤏᤠᤗᤡᤕᤛᤖᤧ ᤏᤧᤵᤑᤢ ᤁᤢᤛᤣᤘᤠᤖᤥᤒᤠᤜᤠ᤹ ᤏᤢ ᤛᤠᤶᤕᤥᤒᤠ ᤁᤢᤍᤠᤱᤛᤧ᤺ᤵ ᤌᤰᤛᤢᤒᤠᤴ ᤀᤢ᤺ᤳᤋᤢᤀᤠᤱ

⁸ᤁᤴ ᤐᤠ᤺ᤴᤏᤡᤴ ᤆᤧᤰᤋᤢᤛᤡᤖ ᤈᤥᤵᤐᤠᤀᤥ ᤐᤋᤪᤢᤛᤖᤧ ᤁᤢᤗᤠ᤺ᤛᤧ ᤂᤧᤱᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡᤖᤥ॥

⁹ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ ᤈᤥᤵᤐᤠ ᤐᤣᤛᤠᤱ ᤔᤧᤃᤧᤖᤧ॥ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤔᤢᤰᤋᤧᤸᤗᤧ ᤐᤋᤪᤢᤛᤧᤴ ᤋᤢᤘᤠ ᤆᤥ᤺ᤰᤛᤧ ᤌᤠ᤺ᤱᤛ᤻ᤔᤠ ᤀᤠ᤺ᤶᤓᤥᤀᤥ ᤐᤣ॥

¹⁰ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤧᤳ ᤗᤠ᤺ᤰᤋᤧᤀᤠᤱ ᤌᤣᤀᤡ ᤆᤠᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤆᤠ ᤔᤧᤈᤥᤃᤢᤖ ᤔᤧᤒᤳᤇᤧᤸᤗᤧ ᤁᤢᤎᤏᤠ ᤗᤧᤰᤂᤧᤖᤥ॥

¹¹ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤜᤖᤧᤒᤠ ᤁᤢᤀᤡᤛᤡ᤺ᤰ ᤂᤧᤳᤌᤥᤗᤠᤶ ᤕᤶᤒᤠ ᤋᤣ᤺ᤳ ᤜᤧᤰᤋᤱᤒᤠᤴ ᤗᤡᤛᤡ ᤁᤢᤛᤢᤰᤐᤥ ᤂᤣ᤺ᤱᤔᤏᤠᤒᤠ ᤌᤩᤧᤖ ᤐᤳᤇᤧᤒᤠ ᤏᤡ᤺ᤛᤢ॥

¹²ᤂᤧᤵᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤐᤖᤡᤰᤗᤧᤴ ᤌᤰᤛᤠᤜᤠ᤹. ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤏᤢ ᤐᤢᤛᤠᤜᤠ᤹ ᤔᤧᤕᤠᤃᤧ॥ ᤂᤧᤱᤜᤠ᤹ᤀᤥ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤆᤠᤔᤠ ᤀᤠᤶᤒᤡᤏᤧᤴᤒᤠᤜᤠ᤹ᤀᤠᤱ ᤔᤧᤕᤠᤃᤧ॥

¹³ᤜᤧᤰᤁᤩᤠᤱ ᤐᤋᤪᤢᤛᤖᤧ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢ. “ᤐᤋᤪᤢᤛᤣ. ᤐᤥᤃᤧ᤹᥄ ᤛᤧᤖᤧᤛᤧ᤹ᤀᤠᤱ ᤆᤧ᤹ᤀᤥ॥”

¹⁴ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤛᤠᤱ ᤀᤰᤋᤱᤒᤠᤃ ᤀᤡᤱᤃᤠ᤹ ᤔᤧᤈᤠᤀᤠᤴᤗᤥ॥ ᤀᤠᤸᤗᤥ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤶᤒᤠ ᤆᤠ ᤌᤣᤀᤠᤱ ᤔᤧᤴᤈᤠᤀᤣ ᤘᤠ᤹ᤀᤠᤖᤥ॥”

¹⁵ᤜᤧᤰᤁᤩᤠᤱ ᤕᤠᤶᤔᤥ ᤀᤡᤰᤗᤠ᤺ᤴ ᤋᤩᤧ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤁᤢᤈᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤕᤠᤵᤔᤡ ᤁᤧᤈᤡ᤺ᤶᤒᤠ ᤔᤧᤗᤣ᤺ᤳᤋᤧᤴᤏᤧ᤹ᤀᤥ॥”

¹⁶ᤀᤰᤂᤣᤗ᤹ᤖᤡᤰ ᤁᤴ ᤛᤢᤶᤗᤧᤱ ᤌᤠᤖᤡᤰ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤴ ᤁᤢᤛᤢᤱᤔᤧᤴ ᤕᤠᤱᤎᤥ ᤋᤠᤱᤛᤠᤰᤐᤥ ᤀᤢ᤺ᤰᤂᤧ ᤋᤣ᤹ᤖᤧᤖᤥ॥

¹⁷ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤴ ᤛᤢᤑᤥ᤺ᤸᤗᤧ ᤁᤢᤒᤣ᤺ᤴ ᤌᤣᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤗ ᤐᤳᤇᤧᤸᤗᤧ ᤁᤷᤏᤠᤗᤡᤕᤛᤖᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ ᤛᤡᤔᤥᤏᤖᤧ ᤁᤢᤜᤡᤶᤔᤡᤴ ᤔᤧᤃᤥ᤺ᤳᤋᤢᤖ ᤗᤠᤶᤎᤣ᤺ᤵᤐᤥ ᤔᤧᤍᤩᤧᤖᤥ॥