ᤗᤢᤁᤠ 4:22-41

²²ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤄᤧᤶ ᤁᤧᤏᤢ᤹ᤒᤠ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤔᤧ᤺ᤶᤒᤡ᥅”

²³ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤛ᤻ᤛᤣᤛᤠᤱ ᤂᤡᤏᤡ᤹ ᤁᤴ ᤂᤧᤍᤠ᤹ᤀᤡᤴ ᤀᤡᤱᤃᤠ᤹ ᤀᤠᤔᤧᤴᤏᤥ ᤁᤧᤒᤠ᤺ᤳᤋᤢᤶᤒᤡᤗᤠ. ‘ᤛᤡᤍᤠ᤹ᤛᤠᤶᤒᤣ. ᤋᤃᤡ ᤂᤧᤏᤧ᤹ ᤏᤢᤛᤡᤱᤅᤧ᤹ᤀᤥ॥’ ᤜᤧᤰᤁᤣᤗ᤹ᤖᤡᤰ ᤁᤐᤷᤏᤜᤢᤶᤔᤥ ᤁᤧᤈᤥᤃᤢᤒᤠ ᤀᤠᤏᤡᤃᤧ ᤂᤧᤵᤛᤢᤶᤒᤧᤒᤠ ᤜᤧᤰᤁᤣᤀᤣ ᤁᤴ ᤁᤧᤒᤠᤱᤈᤢᤶᤔᤥᤀᤠᤱ ᤆᤥᤃᤧ᤹ᤀᤥ॥

²⁴ᤁᤖ ᤂᤢᤏᤧ᤹ ᤔᤧᤳᤋᤢᤛᤡ. ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤳᤋᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤠᤱ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤔᤧᤴᤍᤠ᤺ᤰᤋᤢᤴᤗᤥ॥

²⁵ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧ॥ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤧᤴ ᤋᤱᤒᤣ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤛᤢᤵᤛᤡᤱᤅᤠᤱ ᤐᤠᤱᤃᤧᤴᤍᤡᤱ ᤘᤠᤜᤡ᤺ᤳ ᤔᤧᤎᤩᤧᤏᤧᤴᤏᤠᤱ ᤂᤧᤴ ᤗᤠᤈᤣ᤹ᤀᤥ ᤁᤡᤵᤔᤠ ᤁᤧᤄᤢ᤺ᤒᤠ ᤕᤶᤒᤠ ᤛᤠᤰ ᤐᤥᤃᤧᤖᤥ॥

²⁶ᤂᤧᤵᤔᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤣᤗᤡᤕᤠ᤺ᤴ ᤀᤡᤛᤪᤠᤀᤡᤗᤀᤥ ᤔᤧ᤺ᤴ. ᤁᤖ ᤛᤡᤍᤥᤏ ᤌᤢᤶᤔᤥᤒᤠ ᤛᤠᤖᤑᤋ ᤐᤠᤱᤈᤢᤶᤔᤥᤒᤠ ᤔᤣᤔᤣᤍᤢᤔᤠᤸᤗᤥᤖᤰ ᤐᤠᤱᤄᤢᤖᤥ॥

²⁷ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤛᤠ᤺ᤸᤗᤧᤀᤠᤱ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤗᤥᤃᤣ᤹ᤖᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤔᤧᤘᤕᤧᤛᤠᤱ ᤀᤠᤳᤋᤡᤴᤏᤠᤱ ᤔᤧᤏᤢᤛᤢᤴ. ᤁᤖ ᤛᤡᤖᤡᤕᤠᤛ᤻ᤔᤠ ᤏᤠᤔᤠᤏᤧᤴᤗᤰ ᤏᤢᤛᤢᤖᤥ॥”

²⁸ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧ॥

²⁹ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤕᤧᤛᤢ᤺ᤴ ᤔᤧᤍᤧᤶᤛᤢᤀᤠᤱ ᤐᤠᤱᤈᤢᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ॥ ᤜᤧᤰᤁᤩᤠᤱ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤕᤠᤰᤁᤣ᤺ᤰᤁᤥᤗᤠᤶ ᤗᤠᤵᤑᤢᤔᤠ ᤌᤠ᤺ᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤍᤣ᤹ᤖᤢ.

³⁰ᤁᤖ ᤔᤏᤠᤗᤢᤶᤔᤥᤗᤠᤶ ᤂᤢᤏᤧ᤹ ᤑᤡ᤺ᤴᤇᤡᤱᤅᤠᤱ ᤗ᤺ᤴᤍᤧ ᤐᤣᤖᤥ॥

³¹ᤜᤧᤰᤁᤩᤠᤱ ᤂᤢᤏᤧ᤹ ᤃᤠᤗᤡᤗ ᤌᤢᤶᤔᤥᤒᤠ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤐᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥

³²ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤐᤠᤖᤧᤖᤥ॥

³³ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ.

³⁴“ᤏᤠᤛᤖᤋᤒᤠ ᤕᤧᤛᤢᤀᤣ. ᤂᤧᤏᤧ᤹ ᤀᤠᤏᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤧᤏᤧ᤹ ᤀᤠᤏᤡᤃᤧ ᤔᤧᤱᤛᤧ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤜᤠ᤺ᤳᤏᤧᤒᤣ ᤑᤠ᤹ᤀᤠᤱ ᤏᤡ᤺ᤛᤢᤶᤒᤧᤖᤥ–ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠᤏᤧᤖᤥ॥”

³⁵ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤛᤫᤠ᤺ᤳ᥄ ᤂᤧᤴ ᤔᤏᤠ᤺ᤴ ᤗᤧᤖᤧ᤹ᤀᤠᤱ ᤐᤣᤃᤧ᤹᥄” ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤂᤧᤴ ᤔᤏᤠ᤺ᤴ ᤂᤢᤏᤡ᤹ ᤋᤃᤡᤀᤣ ᤐᤡᤷᤎᤠᤵ ᤌᤠᤵᤛᤢᤀᤠᤱ ᤔᤧᤱᤄᤠ᤺ᤴᤏᤣ ᤗᤧᤖᤢᤎ᤺ᤖᤥ॥

³⁶ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤰᤋᤱᤒᤠ ᤏᤡᤛᤠᤶᤒᤣ᥅ ᤁᤴ ᤔᤏᤠ᤺ᤸᤗᤧᤃ ᤕᤢᤰ ᤏᤢ ᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤸᤗᤧ ᤔᤧᤗ᤺ᤴ ᤔᤧᤒᤣ᤺ᤰᤗᤥ᥄”

³⁷ᤁᤴ ᤀᤡᤱᤄᤱᤅᤡᤴ ᤂᤧᤴ ᤌᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤛᤧ᤺ᤖᤧᤖᤥ॥

³⁸ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤐᤣ॥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤋᤢᤱᤅᤡᤸᤗᤧ ᤋᤖᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤧᤴᤏᤥ ᤕᤧᤛᤢ᤺ᤴ ᤔᤧᤔᤧᤳᤋᤢ॥

³⁹ᤕᤧᤛᤢ᤺ᤴ ᤁᤧᤍᤢᤰᤔᤠᤸᤗᤧ ᤁᤢᤏᤧᤳᤏᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤂᤧᤴ ᤋᤢᤱ ᤋᤢᤰᤔᤠᤴ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤂᤡᤔᤥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤏᤢᤖᤧᤀᤠᤱ ᤂᤧᤱᤜᤠ᤹ ᤋᤖᤣ ᤋᤥ᤺ᤛᤢᤛᤡᤖᤥ॥

⁴⁰ᤜᤧᤰᤁᤩᤠᤱ ᤏᤠᤶᤎᤩᤧᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤐᤖᤡᤰᤐᤠ ᤋᤢᤰᤔᤠᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤠᤖᤢᤛᤡ॥ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤒᤡᤖᤢᤛᤡᤀᤠᤱ ᤏᤢᤛᤢᤛᤡᤖᤥ॥

⁴¹ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤃ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤗ᤺ᤴᤍᤧ ᤔᤧᤒᤣᤖᤥ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ᤏᤧᤖᤥ॥” ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖ ᤐᤠ᤺ᤵᤔᤠ ᤔᤧᤒᤠᤱᤄᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧᤖᤥ॥