ᤖᤥᤔᤡ 15:1-18

¹ᤀᤠᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤏᤡᤱᤘᤠ᤹ ᤋᤠ᤺ᤔᤠ ᤔᤧᤏᤢ᤹ᤏᤧᤴ. ᤁᤖ ᤏᤛᤠ᤺ᤴ ᤁᤧᤛᤢ᤺ᤶᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤐᤥ᤺ᤱᤗᤥ॥

²ᤀᤠᤏᤡ᤹ ᤁᤧᤖᤧᤰᤗᤧ ᤘᤣ᤹ᤜᤠ᤹ᤖᤧ ᤗᤠᤃᤡ ᤏᤢ᤺ᤒᤠ ᤆᤥ᤺ᤰᤔᤠᤀᤠᤱ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤐᤥ᤺ᤱᤗᤥ॥

³ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤂᤡᤏᤡ᤹ ᤜᤡᤏᤠ᤺ᤶ ᤁᤧᤔᤧᤵᤐᤠᤜᤠ᤹ᤖᤧ ᤁᤧᤶᤔᤧᤳᤋᤡᤒᤠ ᤜᤡᤏᤠ᤺ᤶᤔᤡᤱᤃ ᤀᤡᤱᤃᤠ᤹ ᤀᤠᤛᤶᤍᤠᤱ ᤆᤢᤰᤋᤧᤀᤠᤱ ᤘᤠ᤹ᤖᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧᤀᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ॥

⁴ᤐᤣ ᤕᤧᤶᤔᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧ ᤀᤠᤏᤡ᤹ ᤏᤡᤛᤠᤶ ᤀᤠᤜᤢ᤹ᤖ ᤑᤠ᤹ᤀᤠᤱ ᤛᤠᤵᤋᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤏᤠᤛᤡ ᤀᤠᤎ᤺ᤳᤋᤢᤶᤔᤡᤸᤗᤧ ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤗᤠᤶ ᤀᤠᤏᤡ᤹ ᤜᤠᤱᤜᤠᤱ ᤀᤠᤗ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤖᤧᤒᤠ ᤔᤠᤱᤜᤧᤰᤜᤠ᤹ ᤁᤧᤳ ᤑᤠ᤹ᤀᤠᤱ ᤏᤡᤛ᤻ᤛᤣᤀᤣ ᤏᤡᤱᤛᤠᤱ ᤀᤠᤈᤥᤃᤢᤶᤗᤥ॥

⁵ᤀᤠᤸᤗ ᤏᤠᤛᤡ ᤌ᤺ᤵᤔᤠ ᤁᤧᤒᤠᤱᤒᤠ ᤏᤢ ᤜᤠᤱᤜᤠᤱ ᤕᤠᤵᤔᤡ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴ ᤘᤕᤧᤒᤠ ᤁᤢᤒᤡ ᤁᤢᤀᤡᤛᤡ᤺ᤰ ᤁᤧᤒᤥ᤺ᤰᤂᤡᤸᤗᤧ ᤂᤡᤏᤡ᤹ ᤗᤢᤶᤔᤥ ᤌᤡᤰᤜᤢᤵ ᤐᤥ᤺ᤱᤔᤠᤀᤠᤱ ᤘᤠ᤹ᤔᤠ ᤁᤧᤒᤠᤱᤄᤡᤖᤖᤥ॥

⁶ᤜᤧᤰᤁᤣᤗ᤹ᤖᤡᤰ ᤌᤡᤰ ᤏᤡᤱᤘᤠ᤹ ᤏᤢ ᤌᤡᤰ ᤔᤢᤖᤠ᤺ᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤁᤧᤛᤢᤰᤋᤢᤶᤗᤖᤥ॥

⁷ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧ ᤂᤪᤡᤛ᤻ᤋᤖᤧ ᤂᤡᤏᤡ᤹ ᤁᤧᤍᤠ᤺ᤰᤋᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤢᤶᤔᤥᤀᤠᤱ ᤋᤠ᤺ᤰᤁᤠᤛᤡᤶᤔᤧ᤹ᤀᤥ॥

⁸ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤠᤰᤌᤧᤒᤠᤜᤠ᤹ ᤐᤡᤖᤢᤛᤡᤒᤠ ᤔᤠᤱᤜᤧᤰᤜᤠ᤹ ᤛᤧᤰᤂᤠᤀᤣ ᤆᤥ᤺ᤰ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤧ ᤂᤪᤡᤛ᤻ᤋᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥

⁹ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤋᤩᤧᤒᤠᤖᤥ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᤁᤧᤛᤠᤵᤐᤠᤸᤗᤧ ᤛᤠᤵᤋᤢᤀᤠᤱ ᤐᤳ. “ᤂᤧᤸᤗᤧ ᤆᤥᤃᤢᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤡᤱᤃᤠ᤹ ᤏᤧᤶᤓᤥᤃᤧᤴ ᤁᤧᤏᤠᤖᤠ ᤑᤥ᤺ᤛᤢᤱᤗᤥ. ᤜᤧᤰᤁᤩᤠᤱ ᤁᤧᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤈᤥ᤺ᤰᤐᤠ ᤛᤣᤘᤠ ᤛᤠᤶᤗᤥ᤺ᤴ ᤛᤠᤶᤔᤧᤳᤋᤢᤱᤗᤥ॥”

¹⁰ᤕᤠᤶᤔᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳ. “ᤌᤡᤶᤔᤧᤴᤍᤱ ᤛᤢᤘᤠᤱᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤀᤥᤔᤢ ᤗ᤹ᤖᤧᤶᤔᤧ᤹ᤀᤥ॥”

¹¹ᤜᤧᤰᤁᤩᤠᤱ ᤕᤠᤶᤔᤥᤀᤠᤱ. “ᤁᤠᤰ ᤌᤡᤶᤔᤧᤴᤍᤱ ᤛᤢᤘᤠᤱᤛᤣ. ᤍᤠᤱᤒᤠᤸᤗᤧ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤧ᤹ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖ॥”

¹²ᤜᤧᤰᤁᤩᤠᤱ ᤕᤠᤶᤔᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤀᤠᤱ ᤛᤠᤵᤋᤢᤀᤠᤱ ᤐᤳ. “ᤕᤡᤛᤤᤖᤧ ᤁᤢᤎᤠ᤺ᤰᤗᤠᤶ ᤔᤏᤠᤎᤡᤰ ᤋᤠ᤺. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤌᤡᤶᤔᤧᤴᤍᤱ ᤛᤢᤘᤠᤱ ᤛᤶᤍᤠᤱ ᤜᤠᤱᤕᤢᤰ ᤆᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤶᤍᤠᤱ ᤏᤡᤱᤛᤠᤱ ᤔᤧᤕᤢᤰᤂᤢ᤹ᤖᤥ॥”

¹³ᤂᤡᤏᤡ᤹ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤏᤡᤱᤛᤠᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤧᤛ᤺ᤵᤐᤠ ᤁᤧᤈᤥᤃᤡᤖ ᤜᤧᤰᤁᤩᤠᤱ ᤛᤏᤠᤖᤢᤱ ᤁᤧᤒᤡᤖᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠ. ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤕᤖᤡᤰ ᤏᤡᤱᤛᤠᤱ ᤁᤧᤃᤵᤐᤠ ᤁᤧᤈᤥᤃᤡᤖᤖᤥ॥

¹⁴ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤘᤣ᤹ᤜᤠ᤹ ᤏᤢ᤺ᤖᤡᤰ ᤁᤧᤔᤧᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤕᤖᤡᤰ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤘᤣ᤹ᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤀᤡᤱᤃᤠ᤹ ᤏᤡᤛ᤻ᤛᤣ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

¹⁵ᤜᤧᤰᤁᤣᤛᤠᤱ ᤁᤢᤓᤠ ᤔᤧᤶᤒᤠ᤺ᤳᤋᤣ ᤔᤧᤶᤒᤥ᤺ᤱᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤗ᤹ᤖ ᤑᤠ᤹ᤀᤠᤱ ᤀᤠ᤺ᤴᤇᤡᤱᤅᤠᤖ ᤛᤠᤵᤋᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤗᤢᤱᤃᤢᤶᤗᤠᤶᤒᤠ

¹⁶ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣᤘᤠᤖᤥᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤛᤣᤛᤣᤔᤠᤱᤗᤠᤶ ᤛᤣᤛᤣ ᤔᤧᤒᤥ᤺ᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤛᤡᤒᤠ ᤆᤥᤓᤠ᤹ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤜᤧᤰᤁᤣ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤧᤱᤜᤠ᤹ ᤀᤡᤱᤓᤥ᤺ᤛᤢᤱᤛᤡᤱᤗᤥ॥

¹⁷ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤐᤥ᤺ᤰᤂᤠᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤥᤃᤢᤱᤒᤠ ᤀᤠᤔᤠᤱᤛᤣᤘᤠᤀᤥ ᤀᤡᤱᤃᤠ᤹ᤃ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴ ᤁᤳᤋᤢᤱᤗᤥ॥

¹⁸ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤏᤢ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤆᤥ᤺ᤰᤛᤧ ᤂᤪᤡᤛ᤻ᤋᤖᤧ ᤀᤡᤱᤃᤠ᤹ᤗᤠᤶ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤖᤰ ᤀᤠᤱᤍᤡᤱ ᤗ᤹ᤀᤠᤖᤥ॥ ᤘᤣ᤹ ᤐᤠ᤺ᤴᤜᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤀᤠᤴᤗᤥ॥