ᤖᤥᤔᤡ 14:14-20

¹⁴ᤍᤠᤱᤒᤠ ᤕᤧᤛᤢᤖᤧ ᤁᤢᤕᤢᤰᤗᤠᤶ ᤀᤡᤱᤃᤠ᤹ᤃ ᤀᤠᤳᤋᤡᤴ ᤁᤢᤈᤠ᤺ᤴᤏᤠᤱ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤈᤥ᤺ᤰᤏᤧᤴ ᤑᤠ᤹ᤀᤠᤱ ᤀᤠᤏᤡᤱᤘᤠ᤹ᤀᤥ ᤏᤡᤛ᤻ᤛᤣ ᤘᤠ᤹ᤀᤠ. ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤓᤠ ᤁᤢᤈᤠᤜᤠ᤹ ᤀᤠᤈᤡ᤺ᤴᤈᤡ᤺ᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹. ᤂᤧᤱᤃ ᤂᤢᤏᤧ᤹ ᤁᤢᤗᤠᤃᤡ ᤀᤠᤈᤡ᤺ᤴᤈᤡ᤺ᤶᤒᤠᤀᤣ ᤐᤥ᤺ᤱᤗᤥ॥

¹⁵ᤂᤧᤏᤧ᤹ ᤁᤧᤈᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤴ ᤆᤵᤆᤡ ᤁᤧᤈᤥ᤺ᤰᤐᤠ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤔᤧᤒᤥ᤺ᤱᤏᤧᤸᤗᤥ॥ ᤂᤧᤏᤧ᤹ ᤁᤧᤈᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤴ ᤑᤧᤳᤔᤧᤗᤠ᤺ᤴᤍᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤂᤪᤡᤛ᤻ᤋᤧᤴ ᤛᤩᤧᤀᤠᤱ ᤘᤠ᤹ᤖᤥ॥

¹⁶ᤂᤧᤏᤧ᤹ ᤆᤠᤔᤠ ᤏᤢ᤹ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤑᤧᤳᤗᤠ᤺ᤴᤍᤢᤀᤠᤱ ᤂᤪᤡᤛ᤻ᤋᤖᤧ ᤁᤢᤈᤠ᤺ᤳᤌᤡ ᤔᤧᤒᤣ᤺ᤰᤏᤧᤴᤗᤖᤥ॥

¹⁷ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤆᤠᤔᤠ ᤏᤢ ᤌᤢᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤔᤧ᤺ᤴ. ᤁᤖ ᤛᤠᤶᤕᤥᤏᤡᤔᤠ. ᤛᤏᤠᤖᤢᤱ ᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤠᤒᤡᤒᤠ ᤛ᤺ᤵᤔᤠᤸᤗᤧ ᤁᤢᤕᤠ᤺ᤶᤒᤣᤀᤥᤏᤧᤖᤥ॥

¹⁸ᤀᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤛᤣᤘᤠ ᤁᤧᤈᤥ᤺ᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤛᤢ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧᤀᤠᤱ ᤂᤧᤴ ᤔᤏᤠ᤺ᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤋᤧᤴᤍᤡᤱ ᤔᤧᤈᤥᤃᤢ᤹ᤖᤥ॥

¹⁹ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤛᤏᤠᤖᤢᤱ ᤋᤠᤖᤢ᤹. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤗᤢᤶᤔᤥ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤐᤠ᤺ᤴ ᤆᤥᤃᤢ᤹. ᤒᤠ ᤂᤧᤴᤏᤣ ᤆᤥ᤺ᤰᤔᤠ ᤛᤠ᤹ᤖᤡᤰ ᤋᤶᤛᤡᤴ ᤆᤥᤃᤢᤶᤗᤥ॥

²⁰ᤆᤠᤔᤠ ᤌᤢᤱᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹॥ ᤁᤠᤰ ᤁᤢᤈᤠ ᤁᤢᤎᤡᤜᤠ᤹ ᤛᤢᤳᤌᤥ ᤏᤢ ᤛᤣᤛᤣ ᤆᤥ᤺ᤰ. ᤁᤖ ᤔᤏᤠ ᤁᤧᤄ᤺ᤒᤠ ᤁᤢᤈᤠ ᤆᤠᤔᤠᤃ ᤏᤢ᤺ᤒᤠ ᤔᤧᤒᤥ᤺ᤱᤏᤧᤸᤗᤥ॥