ᤕᤢᤜᤢᤴᤏᤠ 9:27-40

²⁷ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤴᤍᤧ᤺ᤴᤇᤠ ᤔᤧᤳᤏᤡᤱᤒᤠ ᤁᤖ ᤂᤡᤏᤡ᤹ ᤁᤧᤱᤄᤧᤵᤛᤢᤶᤔᤡᤴ॥ ᤌᤣᤀᤠᤱ ᤕᤠᤶᤔᤥ ᤂᤧᤶᤔᤠ ᤁᤧᤃᤥ᤺ᤳᤋᤢᤶᤒᤠᤒᤣ᥅ ᤂᤡᤏᤡ᤹ᤀᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤒᤡ᥅”

²⁸ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤏᤠ ᤔᤧᤎᤠ᤺ᤛᤢᤖ ᤔᤧᤔᤧᤳᤋᤢ. “ᤂᤧᤏᤧ᤹ᤀᤣ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤏᤧᤖᤥ. ᤁᤖ ᤀᤠᤏᤡᤃᤧᤃ ᤔᤥᤛᤠᤖᤧ ᤁᤢᤜᤢ᤹ᤛᤠᤶᤒᤠᤛᤡᤃᤧᤖᤥ॥

²⁹ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤥᤛᤠ᤺ᤴᤏᤢ ᤐᤠᤖᤧᤒᤠ ᤐᤠ᤺ᤴᤏᤥ ᤀᤠᤏᤡᤃᤧ ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤘᤕᤡᤃᤧᤖᤥ. ᤁᤖ ᤁᤴ ᤔᤏᤠ᤺ᤱᤃ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ ᤑᤠ᤹ᤀᤠᤱ ᤀᤠᤏᤡᤃᤧ ᤌᤣᤀᤠᤱ ᤔᤧᤏᤡ᤺ᤛᤢᤶᤒᤧᤴᤗᤥ॥”

³⁰ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢᤛᤡ. “ᤁᤱᤃ ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤐᤥ᤺ᤰᤂᤧᤖᤥ᥄ ᤂᤢᤏᤧ᤹ ᤀᤠᤳᤋᤥᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤴᤏᤡ᤺ᤛᤢᤶᤔᤡᤴᤗᤥ. ᤁᤖ ᤁᤴ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤠᤱᤗᤥ॥

³¹ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴ ᤁᤧᤗ᤹ᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶ॥ ᤂᤢᤏᤧ᤹ ᤛᤣᤛᤣ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤗᤰ ᤂᤧᤵᤛᤢ᤹ᤖᤥ॥

³²ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤔᤡᤰᤑ᤺ᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤒᤠᤱᤃ ᤀᤠᤳᤋᤡᤸᤗᤧᤀᤠᤱ ᤔᤧᤱᤄᤧᤶᤔᤣ ᤘᤠ᤹ᤖᤥ॥

³³ᤁᤴ ᤔᤏᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤧ᤺ᤴᤏᤡᤸᤗᤧᤃ ᤀᤰᤋᤱᤒᤠ ᤕᤠ᤺ᤶᤒᤰ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠᤖᤥ॥”

³⁴ᤂᤧᤱᤜᤠ᤹ᤖᤧ ᤂᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤛᤠᤃᤧᤘᤠ᤺ᤴᤇᤡᤱᤅᤠᤱᤎᤥ ᤗᤠᤕᤥᤀᤥᤀᤣ ᤁᤧᤘᤠ᤹ᤖᤥ᥄ ᤂᤧᤏᤧ᤹ ᤀᤠᤏᤡᤃᤧ ᤜᤢ᤹ᤔᤠ ᤕᤠᤵᤔᤡ ᤁᤧᤃᤥ᤺ᤵᤐᤡ᥅” ᤜᤧᤰᤁᤣ ᤔᤧᤔᤧᤳᤋᤢᤖ ᤂᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤏᤢ ᤗᤠ᤺ᤰᤁᤠᤳ ᤔᤧᤈᤴᤍᤢ ᤔᤧᤗ᤺ᤳᤋᤢᤖᤥ॥

³⁵ᤕᤧᤛᤢᤖᤧ ᤂᤧᤴ ᤔᤡᤰᤑ᤺ᤶᤒᤠᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤈᤴᤍᤢ ᤔᤧᤗ᤺ᤳᤋᤢ ᤁᤧᤗ᤹ᤒᤠ ᤂᤧᤵᤛᤢ॥ ᤜᤧᤰᤁᤩᤠᤱ ᤂᤧᤴᤏᤡᤴ ᤋᤢᤔᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤔᤧᤴᤇᤠᤶᤛᤠ᤺ᤴ ᤏᤛᤠ᤺ᤴ ᤁᤧᤈᤥᤃᤢ᤹ᤒᤡ᥅”

³⁶ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤂᤢᤏᤧ᤹ ᤜᤠ᤺ᤳᤏᤡᤒᤣ᥅ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹ᤏᤠ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤀᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤋᤢᤱᤗ॥”

³⁷ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤏᤡ᤺ᤛᤢᤀᤠᤱᤅᤣ ᤁᤧᤘᤠ᤹ᤖᤥ॥ ᤂᤧᤏᤧ᤹ᤏᤢ ᤁᤧᤒᤠ᤺ᤵᤐᤠᤖ ᤁᤧᤒᤵᤐᤧᤴᤏᤣ ᤂᤢᤏᤧ᤹ᤖᤥ॥”

³⁸ᤂᤧᤴ ᤔᤏᤠ᤺ᤸᤗᤧ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤛᤠ᤺ᤴ ᤆᤥ᤺ᤰᤏᤧ᤹ᤖᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢ᤺ᤴ ᤌᤢᤱᤒᤥᤜᤈ᤹ᤀᤠᤱ ᤛᤣᤘᤠ ᤔᤧᤳᤋᤢᤖᤥ॥

³⁹ᤕᤧᤛᤢᤖᤧ ᤐᤠ᤺ᤳᤋᤢ. “ᤔᤡᤰᤑ᤺ᤶᤒᤠᤜᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤔᤧᤒᤥ᤺ᤱᤗ ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡ᤺ᤛᤢᤶᤒᤧ ᤁᤧᤗ᤹ᤒᤠ ᤔᤏᤠᤜᤠ᤹ ᤔᤡᤰᤑ᤺ᤶᤒᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤂᤠᤛᤧᤴ ᤆᤥ᤺ᤰᤛᤧ ᤀᤡᤱᤃᤠ᤹ ᤋᤩᤠᤱᤒᤠᤖᤥ॥”

⁴⁰ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤏᤡᤃᤧᤀᤠᤱ ᤔᤡᤰᤑ᤺ᤶᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤵᤐᤠᤒᤡ᥅”