ᤕᤢᤜᤢᤴᤏᤠ 9:21-35

²¹ᤁᤖ ᤂᤢᤏᤧ᤹ ᤀᤠᤰᤂᤣᤗ᤹ᤖᤡᤰ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ. ᤜᤠ᤺ᤳᤗᤧ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤐᤡᤖᤢ. ᤀᤠᤴᤇᤡᤃᤧ ᤌᤣᤀᤠᤱ ᤔᤧᤏᤡ᤺ᤛᤢᤃᤧᤴᤗᤥ॥ ᤂᤧᤴ ᤌᤠᤱᤒᤧᤴ ᤁᤧᤖᤧᤀᤠᤱ ᤘᤠ᤹. ᤀᤠᤒᤠᤅᤣ ᤐᤠ᤺ᤵᤔᤠ ᤛᤢᤰᤋᤢ᤹ᤖᤥ॥ ᤂᤢᤏᤧ᤹ᤀᤣ ᤛᤣ᤺ᤴᤗᤠᤵᤋᤧᤶᤔᤧ᤹ᤀᤥ॥”

²²ᤂᤧᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤌᤣᤀᤠᤱ ᤜᤧᤰᤁᤣ ᤐᤠ᤺ᤳᤋᤧᤳᤇᤢᤓᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤏᤢ ᤂᤢᤴᤇᤡ᤹ ᤁᤡ᤺ᤛᤧᤳᤇᤡᤀᤠᤱ ᤘᤕᤧᤳᤇᤡᤖᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤀᤠᤳᤋᤡᤸᤗᤧ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤢ᤹ ᤂᤧᤴ ᤔᤏᤠ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗ᤺ᤵᤔᤠᤍᤣ᤺ᤔᤠ ᤐᤥ᤺ᤱ ᤑᤠ᤹ᤀᤠᤱ ᤔᤢᤖᤠ ᤔᤧᤍᤱᤄᤢᤀᤠᤱ ᤔᤧᤘᤕᤧᤖᤥ॥

²³ᤂᤧᤸᤗᤧ ᤆᤥᤃᤢᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤂᤧᤴ ᤌᤠᤱᤒᤧᤴ ᤁᤧᤖᤧᤀᤠᤱ ᤘᤠ᤹. ᤂᤢᤏᤧ᤹ᤀᤣ ᤛᤣ᤺ᤴᤗᤠᤵᤋᤧᤶᤔᤧ᤹ᤀᤥ ᤑᤠ᤹ᤀᤠᤱ ᤐᤠ᤺ᤳᤋᤧᤳᤇᤢᤒᤠᤖᤥ॥

²⁴ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤱᤒᤠ ᤔᤡᤰᤑ᤺ᤶᤒᤠᤴ ᤕᤠᤶᤔᤥ ᤔᤧᤀᤢ᤺ᤳᤋᤢᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠ ᤐᤠ᤺ᤴ ᤐᤠ᤺ᤳᤋᤠ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤜᤧᤰᤛᤡᤱᤅᤧ᤹ᤀᤥ॥ ᤂᤧᤴ ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤱᤃ ᤛᤧᤰᤂᤠᤛᤠᤱ ᤗᤠᤕᤥᤒᤠᤀᤣᤖᤥ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡ᤺ᤛᤢᤶᤒᤧᤖᤥ॥”

²⁵ᤂᤧᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤢᤏᤧ᤹ᤃ ᤗᤠᤕᤥᤒᤠᤒᤡ ᤔᤧ᤺ᤶᤒᤡ ᤀᤡᤱᤃᤠ᤹ ᤌᤣᤀᤠᤱ ᤔᤧᤏᤡᤀᤠᤴᤗᤥ. ᤁᤖ ᤀᤡᤱᤃᤠ᤹ ᤗᤳᤌᤡᤰ ᤐᤠ᤺ᤴ ᤏᤡ᤺ᤛᤢᤱ॥ ᤀᤡᤱᤃᤠ᤹ ᤔᤡᤰᤑ᤺ᤶᤒᤠ ᤘᤕᤠᤱ. ᤁᤖ ᤀᤠᤸᤗᤥ ᤂᤠᤏᤡ᤺ᤔᤠ ᤛᤢᤰᤋᤢᤱᤗᤥ᥄”

²⁶ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤂᤧᤸᤗᤧ ᤂᤧᤏᤧ᤹ ᤌᤣ ᤁᤧᤈᤥᤃᤧᤀᤠᤱ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤧᤒᤣ᥅”

²⁷ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤴᤍᤧ᤺ᤴᤇᤠ ᤔᤧᤳᤏᤡᤱᤒᤠ ᤁᤖ ᤂᤡᤏᤡ᤹ ᤁᤧᤱᤄᤧᤵᤛᤢᤶᤔᤡᤴ॥ ᤌᤣᤀᤠᤱ ᤕᤠᤶᤔᤥ ᤂᤧᤶᤔᤠ ᤁᤧᤃᤥ᤺ᤳᤋᤢᤶᤒᤠᤒᤣ᥅ ᤂᤡᤏᤡ᤹ᤀᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤒᤡ᥅”

²⁸ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤏᤠ ᤔᤧᤎᤠ᤺ᤛᤢᤖ ᤔᤧᤔᤧᤳᤋᤢ. “ᤂᤧᤏᤧ᤹ᤀᤣ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤏᤧᤖᤥ. ᤁᤖ ᤀᤠᤏᤡᤃᤧᤃ ᤔᤥᤛᤠᤖᤧ ᤁᤢᤜᤢ᤹ᤛᤠᤶᤒᤠᤛᤡᤃᤧᤖᤥ॥

²⁹ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤥᤛᤠ᤺ᤴᤏᤢ ᤐᤠᤖᤧᤒᤠ ᤐᤠ᤺ᤴᤏᤥ ᤀᤠᤏᤡᤃᤧ ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤘᤕᤡᤃᤧᤖᤥ. ᤁᤖ ᤁᤴ ᤔᤏᤠ᤺ᤱᤃ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ ᤑᤠ᤹ᤀᤠᤱ ᤀᤠᤏᤡᤃᤧ ᤌᤣᤀᤠᤱ ᤔᤧᤏᤡ᤺ᤛᤢᤶᤒᤧᤴᤗᤥ॥”

³⁰ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢᤛᤡ. “ᤁᤱᤃ ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤐᤥ᤺ᤰᤂᤧᤖᤥ᥄ ᤂᤢᤏᤧ᤹ ᤀᤠᤳᤋᤥᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤴᤏᤡ᤺ᤛᤢᤶᤔᤡᤴᤗᤥ. ᤁᤖ ᤁᤴ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤠᤱᤗᤥ॥

³¹ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴ ᤁᤧᤗ᤹ᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶ॥ ᤂᤢᤏᤧ᤹ ᤛᤣᤛᤣ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤗᤰ ᤂᤧᤵᤛᤢ᤹ᤖᤥ॥

³²ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤔᤡᤰᤑ᤺ᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤒᤠᤱᤃ ᤀᤠᤳᤋᤡᤸᤗᤧᤀᤠᤱ ᤔᤧᤱᤄᤧᤶᤔᤣ ᤘᤠ᤹ᤖᤥ॥

³³ᤁᤴ ᤔᤏᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤧ᤺ᤴᤏᤡᤸᤗᤧᤃ ᤀᤰᤋᤱᤒᤠ ᤕᤠ᤺ᤶᤒᤰ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠᤖᤥ॥”

³⁴ᤂᤧᤱᤜᤠ᤹ᤖᤧ ᤂᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤛᤠᤃᤧᤘᤠ᤺ᤴᤇᤡᤱᤅᤠᤱᤎᤥ ᤗᤠᤕᤥᤀᤥᤀᤣ ᤁᤧᤘᤠ᤹ᤖᤥ᥄ ᤂᤧᤏᤧ᤹ ᤀᤠᤏᤡᤃᤧ ᤜᤢ᤹ᤔᤠ ᤕᤠᤵᤔᤡ ᤁᤧᤃᤥ᤺ᤵᤐᤡ᥅” ᤜᤧᤰᤁᤣ ᤔᤧᤔᤧᤳᤋᤢᤖ ᤂᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤏᤢ ᤗᤠ᤺ᤰᤁᤠᤳ ᤔᤧᤈᤴᤍᤢ ᤔᤧᤗ᤺ᤳᤋᤢᤖᤥ॥

³⁵ᤕᤧᤛᤢᤖᤧ ᤂᤧᤴ ᤔᤡᤰᤑ᤺ᤶᤒᤠᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤈᤴᤍᤢ ᤔᤧᤗ᤺ᤳᤋᤢ ᤁᤧᤗ᤹ᤒᤠ ᤂᤧᤵᤛᤢ॥ ᤜᤧᤰᤁᤩᤠᤱ ᤂᤧᤴᤏᤡᤴ ᤋᤢᤔᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤔᤧᤴᤇᤠᤶᤛᤠ᤺ᤴ ᤏᤛᤠ᤺ᤴ ᤁᤧᤈᤥᤃᤢ᤹ᤒᤡ᥅”