ᤕᤢᤜᤢᤴᤏᤠ 9:2-17

²ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤌᤣᤀᤠᤱ ᤁᤴ ᤛᤠᤘᤠ᤺ᤴᤇᤡᤱᤅᤡᤸᤗᤧᤛᤠ ᤔᤡᤰᤑ᤺ᤶᤒᤠ ᤐᤥ᤺ᤰᤂᤧᤒᤠᤒᤣ᥅ ᤁᤴ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤗᤠᤕᤥ᤺ᤸᤗᤧ ᤆᤥᤃᤢᤸᤗᤧᤒᤡ. ᤀᤡ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧᤒᤡ᥅”

³ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ “ᤁᤱᤃ ᤀᤠᤒᤠᤅᤣ ᤁᤢᤗᤠᤕᤥ᤺ᤴ ᤏᤢ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧᤀᤠᤱ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴ ᤂᤢᤏᤧ᤹ᤀᤥ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥

⁴ᤗᤧᤴᤍᤡᤰᤛᤠ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤀᤠᤏᤡ᤹ ᤆᤥ᤺ᤰᤔᤠ ᤐᤥ᤺ᤱᤗᤥ॥ ᤛᤧᤴᤍᤡᤰ ᤐᤥ᤺ᤱᤅᤠᤱᤃ ᤜᤠ᤺ᤳᤋᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ॥

⁵ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤠ᤹ᤀᤠᤖ ᤌᤠᤖᤡᤰ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤀᤠᤖᤥ॥”

⁶ᤀᤰᤂᤣ ᤐᤠ᤺ᤳᤋᤢᤖ ᤂᤢᤏᤧ᤹ ᤂᤠᤶᤔᤥ ᤌᤩᤠ᤺ᤳ ᤌᤥ᤺ᤰᤋᤢ ᤜᤧᤰᤁᤩᤠᤱ ᤂᤠᤶᤔᤡᤴ ᤁᤢᤎᤩᤠ᤺ᤳᤋᤥ ᤛ᤹ᤖᤢᤀᤠᤱ ᤂᤧᤴ ᤔᤡᤰᤑ᤺ᤶᤒᤠᤸᤗᤧ ᤁᤢᤔᤡᤰᤁᤥ ᤑᤳᤇᤢᤖᤥ॥

⁷ᤜᤧᤰᤁᤩᤠᤱ ᤂᤧᤴ ᤔᤡᤰᤑ᤺ᤶᤒᤠᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤛᤡᤗᤥᤀᤠᤔ ᤘᤠᤒᤠᤰᤁᤥ ᤁᤧᤔᤡᤰᤁᤡᤴ ᤘᤠᤜᤵᤋᤧ᤹ᤀᤥ” (ᤜᤡᤒᤪᤢ ᤐᤠ᤺ᤴᤏᤥ ᤛᤡᤗᤥᤀᤠᤔ ᤑᤠ᤹ᤀᤡᤱᤃ “ᤐᤠᤱᤔᤏᤠᤒᤠ” ᤐᤥ᤺ᤱᤗᤥ)॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴ ᤐᤣᤀᤠᤱ ᤁᤢᤔᤡᤰᤁᤡᤴ ᤘᤠᤜᤵᤋᤢ ᤜᤧᤰᤁᤩᤠᤱ ᤂᤠᤃᤧᤏᤡ᤺ᤒᤠ ᤐᤥ᤺ᤰᤂᤧᤀᤠᤱ ᤁᤢᤜᤡᤶᤔᤥ ᤐᤣᤖᤥ॥

⁸ᤂᤧᤸᤗᤧ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤏᤢ ᤂᤧᤸᤗᤧ ᤆᤠᤏᤠ᤺ᤰᤋᤢᤒᤠ ᤁᤧᤏᤡ᤺ᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤶᤒᤧ᥄ ᤁᤴ ᤒᤠ ᤂᤧᤴ ᤆᤠ ᤁᤧᤏᤠ᤺ᤰᤐᤠᤖ ᤁᤧᤕᤢᤱᤒᤠᤴ ᤔᤧ᤺ᤶᤒᤡ᥅”

⁹ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤀᤥᤒᤧ॥” ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤴ. ᤁᤱᤃ ᤂᤧᤴ ᤜᤧᤰᤁᤣᤖᤰ ᤏᤡᤎᤠ᤺ᤵᤐᤧ॥” ᤁᤖ ᤂᤧᤴ ᤔᤏᤠ᤺ᤸᤗᤧ “ᤂᤧᤴ ᤔᤏᤠ᤺ᤴ ᤒᤠ ᤀᤡᤱᤃᤠ᤹ᤀᤣᤖᤥ” ᤔᤧᤳᤋᤢᤛᤡ॥

¹⁰ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤧᤒᤣ᥅”

¹¹ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤕᤧᤛᤢ ᤔᤧᤔᤧᤳᤋᤢᤒᤠ ᤔᤏᤠ᤺ᤸᤗᤧ ᤀᤠᤔᤡᤰᤁᤥ ᤂᤠᤶᤗᤧᤰᤘᤠ᤺ᤴ ᤑᤳᤇᤠᤱ ᤐᤡᤖᤠᤱ ᤜᤧᤰᤁᤩᤠᤱ ‘ᤛᤡᤗᤥᤀᤠᤔ ᤘᤠᤒᤠᤰᤁᤥ ᤐᤣᤃᤧ᤹ᤀᤠᤱ ᤁᤧᤔᤡᤰᤁᤡᤴ ᤘᤠᤜᤵᤋᤧ᤹’ ᤔᤧᤳᤋᤠᤱ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤀᤠᤱ ᤐᤣᤃᤠᤱᤅᤠᤱ ᤂᤧᤴ ᤀᤠᤔᤡᤰᤁᤥ ᤑᤳᤇᤠᤱ ᤐᤡᤖᤠᤱᤒᤠ ᤂᤠᤶᤗᤧᤰᤘᤠ᤺ᤴ ᤘᤠᤜᤵᤋᤢᤱᤅᤡᤸᤗᤧ ᤏᤡ᤺ᤔᤠ ᤛᤢᤰᤋᤢᤱᤗᤥ॥”

¹²ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤂᤧᤴ ᤔᤏᤠ᤺ᤴ ᤀᤠᤳᤋᤥ ᤘᤠ᤹᥅” ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ”॥

¹³ᤜᤧᤰᤁᤣ᤺ᤸᤗᤧ ᤔᤏᤠᤜᤠ᤹ᤖᤧ ᤂᤧᤴ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤱᤒᤠ ᤔᤡᤰᤑ᤺ᤶᤒᤠᤴ ᤑᤖᤡᤛᤡᤜᤠ᤹ᤖᤥ ᤔᤧᤍᤣ᤹ᤖᤢᤖᤥ॥

¹⁴ᤀᤠᤸᤗ ᤕᤧᤛᤢᤖᤧ ᤛ᤹ᤖᤢᤒᤠ ᤂᤠᤶᤔᤡᤸᤗᤧ ᤂᤧᤴ ᤔᤡᤰᤑ᤺ᤶᤒᤠᤴ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤒᤠ ᤕᤧᤴᤏᤡᤱᤃ ᤏᤠ᤺ᤶᤛᤡᤱ ᤕᤧᤴ ᤘᤕᤧᤖᤥ॥

¹⁵ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴ ᤀᤠᤰᤂᤣᤗ᤹ᤖᤡᤰ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤧᤒᤣ ᤑᤠ᤹ᤀᤠᤱ ᤑᤖᤡᤛᤡᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ॥ ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤂᤠᤶᤗᤧᤰᤘᤠ᤺ᤴ ᤀᤠᤔᤡᤰᤁᤥ ᤑᤳᤇᤢ ᤐᤡᤖᤠᤱ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤂᤠᤶᤗᤧᤰᤘᤠ᤺ᤴ ᤘᤠᤜᤵᤋᤢᤱᤅᤡᤸᤗᤧ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤠᤱᤗᤥ॥”

¹⁶ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤕᤧᤛᤢ ᤔᤧᤵᤔᤏᤠᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰ॥” ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤜᤧᤰᤁᤣ᤺ᤸᤗᤧ ᤗᤠᤕᤥᤒᤠ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤒᤣ᥅” ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥

¹⁷ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤀᤠᤸᤗᤛᤠᤱ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤕᤧᤛᤢᤖᤧ ᤂᤧᤏᤧ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤂᤢᤏᤧ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤖᤥ॥”